Read Banggai PONGOTUNGGUL 2 Bible Online

PONGOTUNGGUL 2 - Banggai bible

PONGOTUNGGUL 2

¹Yaku putusemo tuuk mosanaanggene kobutongo tolong sulano kutoiyo komo monondokon. Bai tokita doiya akiyo kotakoso.

²Yaku sadaro baikon kokokumbitan doiya kobodokan tukon kosanangan akiyo kotakoso.

³Konoanggu iyaso mupaodoiy, yaku kakate sulano kubasanang-sanaang tukon monginum anggur tukon mokubai lamean mobabasal. Yaku anggene kocara monondok tuuno doi banggapi sulano nalasakanggene konatuboan mopalus doi dunia nia.

⁴ Kolimang-limang babasal lapamo kulakukene. Yaku bangune kobonua-bonua tuuk doiyaku. Yaku kubaiyo taman-taman tukon koasi-asi kusakaiyo tukon anggur batango tukon sasaibino korupano kokayung batango modaano kosaono.

⁶Yaku makali goot-goot sulano kopaisu nalolo nambetokiyo kotaman-taman tukon ndopasi-pasidoo.

⁷ Yaku daano badaang daku ata, komo yaku mooliyo, mau komo sinuung doi bonua. Daku iyayon piniala badaang tuuno liisiyo komian modungol looluikon doi Yerusalem naiyayon piniala.

⁸ Kupototongikene kosuasa tukon mosoni luwedoi lulu hasilo doi tomundo-tomundo molaate doi tano-tano niaiya, Yaku mokuasaiyo. Kopenyanyi musik tukon kopenyanyi boine sanaanggene konoanggu tukon napo nyanyian-nyanyian. Tukon koidan badaang daku boloki piala.

⁹ Tutuu, yaku lobioniiyo daku babasalan luwedoi mian mobiasamo dunggol doi Yerusalem, tukon daku pandoiankai tataap monondok.

¹⁰Sasaibino daku minomoaton, yaku ambabule; aki pernah yaku, motaane kobutonggu sulano monikmatio kokasanangan. Yaku laba doi saibino daku pakadakan hasilo, tukon doiyamo daku tambo.

¹¹Bai doi bundu kutelitio saibino daku limang, tukon koidan saibino daku pinakadakon tuuk mo alapayo daku limang-limang, maka yaku sadario baikon saibino doiya akiyo koalatino. Daku usaha doo sia-sia bunokai mololonggon mombuul tolong.

¹²Bulaandokai koidan meeng ko tomundo tolongo moola lakukene kooila molapamo kotomundo-tomundo lakukene doi looluk. Maka tambuno yaku bapikir: oila koartino moteali mian mopandoi kai longaskai donggang?

¹³Bisa, yaku toiyo, “Pandoian lobian monondok luwedoi nadonggangan, bunokai madialan lobian monondok luwedoi kalipookan.

¹⁴Mian pandoy moola kitayo konaarah tujuan; bai komian mobodok naapakon naampakon baino bata-taap.” Bai yaku toiyo koidan baikon konasib mopokakana naikon tepakiyo yanila saibino.

¹⁵Maka kupikikene, ‘Konasib mo motepakiyo komian mobodoh naikon kualamiyo koidan. Jadi, oila kotakoso sasaibino daku pandoian?’ Maka yaku mangala kasimpulan baikon dopandoianoo bisa akiyo kotakoso.

¹⁶Komian bodoh mosobit natinomilinggon. Maukai mian mopandoi aki naikon aki naninonook. Kita sasaibino sio namate, mau mian mopandoi maukai mian mobodoh.

¹⁷Tobikon doiya ko tubo akiyo koalatino doiyaku. Saibino sia-sia: Yaku tolongo lapamo mololonggon mombuul tolong.

¹⁸Saibino daku balimangan hasilo tukon daku pandapatan akiyo naikon kotakoso doi yaku, sabab yaku sio kutinggoliikene doi mosobaliyaku.

¹⁹Tukon indee komotoiyo oilakai yana pandoi kai bodoh? Bai mau nabulandomokai koidan yana naikon teali hakiyo dakuusaha hasilo molapamo yaku laate doi kutuboan namalumbitan doi dunia nia balakaat kupakadakan tukon kupandoian. Jadi, doiya kai sia-sia.

²⁰Diabudoo yaku manasalo molapamo balimang kokobukuan.

²¹Sabab kobanggapi balimang kokobukuan tukon sasaibino kopandoian, komotoian tukon napinandoikon tuuk nalaatano komeeng kolobo. Bai doinalapaan yana sio tinggale saibino kohasilo napinakadakan doi mian moakiyo kona lumbas. Jadi, doiyakai sia-sia, tukon tutuu aki naadil!

²²Pomatekon kobanggapi balimang babalat tukon basusah-susah: maka yaando kohasilo napinakadakon momoola binanggaakon?

²³ Selama kona tuboan oilamo konakinubai tolongo lubatene kosakisaawan tukon kubaiyo masakit konoano. Doi tempo popook kai konoano susah. Jadi saibino doiya sia-sia tuuno.

²⁴ Akiyo komo lobian kona monondok doi banggapi luwedoi kinaan, monginum tukon monikmatio kona balimangan hasilo. Yaku sadar baikon doya Mian Bisa nabineekon.

²⁵Indeekai komomoola makaan tukon bala-bala sanang kalu akiyo ko Mian Bisa?

²⁶ Mian Bisa Beena pandoian, pengetahuan tukon namonondokan doi mian mokindedeke Konoano. Bai komian mobaladosa Yana sumboliyo nabalimang monggolii napakah tukon atambuno kohasilo sulano nasinalakanggon doi mian mo sananggene Ko Mian Bisa noano. Jadi saibino doo sia-sia buno usaha mololonggon mombuul.