Read Banggai PONGOTUNGGUL 3 Bible Online

PONGOTUNGGUL 3 - Banggai bible

PONGOTUNGGUL 3

¹Sasaibino kolobo doi dunia nia teali doi tempo Mian Bisa motantukenemo.

²Mian Bisa tantukene kotempo tuuk mosuungan tukon tempo tuuk matean, tempo tuuk basakakonan tukon tempo tuuk mokibute,

³tempo tuuk mangakate tukon tempo tuuk moaline, tempo tuuk mobarombak tukon tempo tuuk mobangune.

⁴Mian Bisa motantukene kotempo tuuk kokiil tukon tempo tuuk kokumbitan, tempo tuuk mandaung tukon tempo tuuk osulengan,

⁵tempo tuuk pokooloi tukon tempo tuuk aki napokooloi, tempo tuuk polobok tukon tempo tuuk taane kobutongo.

⁶Mian Bisa tantukene tempo tuuk posunggene tukon tempo tuuk molapus, tempo tuuk posunggene tukon tempo tuuk moakabuse,

⁷tempo tuuk bendinge tukon tempo tuuk kaute, tempo tuuk aki nabiok tukon tempo tuuk basilingan.

⁸Mian Bisa tantukene kotempo tuuk moseseang tukon tempo tuuk misikit, tempo tuuk polobosi tukon tempo tuuk podamean.

⁹Oilamokai saibino konda pakadakan hasilo?

¹⁰Yaku toiyo baikon Mian Bisa beena tanggungan mobabalat doi kita.

¹¹Yana tantukanggene kotempo motapaat tuuk doi sasaibino kolobo. Yana beena kita koyasano toiyo kooloyo mosinasalaan, bai aki nasanggup mangalatikene ko Mian Bisa nakakabai luwedoi tumbeno polong doi napupusan.

¹²Yaku toiyo baikon tuuk kita akiyo komo lobian monondok luwedoi tedesan tukon rasakangganano kondatuboan popupuson kondaumur.

¹³Konamonondokan kita sasaibino tongokaan tukon monginum tukon rasakanggene konda balimangan hasilo. Doiya daanon Mian Bisa nopebeekene.

¹⁴Yaku toiyo baikon saibino ko Mian Bisa nalimang naikon tataap daano sidutu-posidutukon. Kobanggapi aki namoola sungiyo kai nakurangiyo. Tukon Mian Bisa natindakan bunodoiya sulano kita matakut doi Yana.

¹⁵Diabudodoo komo teali, lapamo teali doi nakiyoonan. Naikon komodaano, malumbito kai konadaanoan. Mian Bisa tantukene sulano komo molapamo nateali koidan.

¹⁶Daano koidanda dakukinita doi dunia nia: siokai nadaano kokaadilan tukon monondokan, sabab naidunia daano kokulokisan.

¹⁷Kupikikene, Mian Bisa naikon adiliyo komian momonondok maukai mian molokis; sabab sasamba kolobo tukon sasamba kotindakan naikon teali doi tempo Mian Bisa natantukanano.

¹⁸Daku kaputusan doiyamo: Mian Bisa ujio kita tuuk motudoikene baikon konda tuboan akiyo konaposasalaan tukon iyayon natuboan.

¹⁹Mau nabulaandokai koidan, kobanggapi natuboan tukon iyayon daanon pokakana. Komeeng naikon mate, bunomo koidan kobailon. Kolua-luano pokakana ko iyayon. Jadi kobanggapi aki lobian konauntung luwedoi iyayon, sabab tuuk kolua-luano dotuboanoo dosia-sia.

²⁰Yanila tujuiyo kotampat mopokakana. Yanila konaasal luwe doi ambata tukon naikon abali doi ambata.

²¹Kita aki ndaloiyo, oilakai kobanggapi naroh liba doi bungguk tukon iyayon naroh obulus doi buta lalomo.

²²Tobikon doiya yaku sadariyo baikon akiyo komo lobian konamonondokan doi banggapi luwedoi narasakangganano kona limang hasilo. Sangalaasan doiya akiyo komoola yana lakukene. Aki namoola yana toiyo oila naikon komo teali kalu yanila matemo.