Read Banggai PONGOTUNGGUL 4 Bible Online

PONGOTUNGGUL 4 - Banggai bible

PONGOTUNGGUL 4

¹Lapa doiya yaku palatikanggene koidan kona akian naadil sasaibino komo teali doi dunia nia. Komian-mian mopinipiik kokil tukon akiyono komo yase tulungiyo yanila. Akiyo komeeng komian kai moyase tulungiyo, sabab saibino komo pinipiikoo daanon kona kuasa mo babasal.

²Yaku nia neneeke komian-mian momalumbito mate sabab yanila lobian sanang luwedoi mian-mian modaano motubo.

³Bai komo lobian kona sanaangan koidan doiyamo mian moakiyon nasinuung, sabab yanila akiyon nakitayo kokulokisan mokinubai doi dunia nia.

⁴Yaku toiyo koidan baikon kobanggapi balimang bunodoiya kona matikasang, tolongo sabab masakit konoano kitayo kona usaha hasilo napokolanian. Sasaibino doiya sia-sia tuuno buno usaha mololonggon mombuul.

⁵Kalu laate kotempono, tolongo mian tolong moosulang lipate kolimano tukon mosodiikene kobutongo mate malaal.

⁶Mungkin doiya bisa, bai lobian komomonondok kobuat mau natongo soisik bai kubaiyo sananggane konanggita kalu bamo kita mobalimang kokobukuan bai akiyo kokalo jadi pokakana kita mololonggon mbombuul.

⁷Daanon kai koidan natuboan nia lalomo mosia-sia.

⁸Daanon komian motubo susuungo akiyo konapau, kai utuso. Maukai bunodoiya yana balimang tuuno banggadudul tukon konoano aki nabiasa biai tukon nabuat. Tuuk indee kai yana masaukene kolumbos tukon tolayo saibino kokasanangan? Doiyakai sia-sia tukon meeng kocara tuboan mosakisaa.

⁹Kalu luwa komian badaang kountungo bai kalu tongo meeng komian soisik kountungo. Kalu yanila balimang konahasil naikon lobian monondok.

¹⁰Kalu meeng komian otuwong dono meengoo moola natulungiyo. Bai kalu tongo meeng komian kalu yana otuwongo, silakamo yana, sabab akiyono komoola tulungio.

¹¹Doi popook mokumelon lua komian momoolo polouli moola napomatalanas, bai bulaando kai komian moola teali matalanas kalu tongo susuungo?

¹²Lua komian moampakon polaing moola motangkise kopolobosi, bai komian motongo susuungo moola nalinunggui. Tolu koalos mopinutal teali meeng, susah nabinotol.

¹³Komian motalalais moola teali tomundo, tukon meeng komian motinan moola biol doi kursi batomundoan. Bai kalu tomundo doo motuamo todudulo konalongasan momatalima otinau, maka kona tuboan lobian kulokis tadumokai meeng kopemuda mo talalais bai pandoi.

¹⁵Kupikikene tetang saibino komian doi dunia nia, maka yaku sadar baikon doi antara yanila pasti daano komeeng kotabo naikon mosoboliyo kotomundo.

¹⁶Korayat yana pimpine aki nateali tangait konakadaang, bai salaata yana ampakon akiyo komo batalima kasih moneneeke konajasa. Bisa saibino sia-sia buno usaha mololonggon mombuul.

¹⁷Pohati-hatikai kalu ikoo yase moampakon doi TEMENENO Na Bonua. Tadukai poampakon idoo sulano pobalajar kalu baino komuyu mososubakon sosuba, pokakana komian bodoh nalinakukon. Yanila doo aki namoola posalakene yaando komo bisa tukon yaando komo salah.