Read Banggai PONGOTUNGGUL 7 Bible Online

PONGOTUNGGUL 7 - Banggai bible

PONGOTUNGGUL 7

¹ Kosambuno nababangian liisiyo kominyak wangi momaaling koalino; tukon oloyo matean lobian kona monondokan luwedoi oloyo tealian.

²Lobian kona monondokan taus doi bonua matean luwedoi tampat morame. Sabab kita sio ndasidutu mononook baikon kamatean totiiliyo sasamba komian.

³Kona susaan lobian kona komonondokan luwedoi kokumbitan. Mau duduso murung, asal konoano natenang.

⁴Komian moakiyo konatinoi banggadudul mololonggon nasanaangan; mian pandoi sidutu pikikene komatean.

⁵Lobian kona monondokan kalu komian monondok konoano manganuukon, luwedoi panggaal mian mo aki namangalati.

⁶Mian mobodoh nakokumbitan akiyo koalatino, buno sonit alalo motosua doi aung.

⁷Kalu mian pandoi bakala-kala, longasokai kona kokubai; kalu mian matalima doy sogoki, lusako konapikiran.

⁸Lobian kona monondokan meeng kopalakala napupusan luwedoi natambunan; lobian kona monondokan kosabaran luwedoi natodudulan babanggaal.

⁹ Inai mo sia-sia nggimal; tolongo mian mobodoh komo abos noa.

¹⁰Inaikai masadai, ‘Bulaando doi tempo looluk lobian kona monondokan luwedoi tempo nia budodoo?’ Tolongo mian mobodoh komo masadai buno doiya.

¹¹Komian motubo siokai nadaano kona hikmat; dohikmatoo anggano pokakana tukon budel;

¹²pokakana koidan tukon doy mobekene rasayo aman. Oilakai koidan motoian tentang pandoian! Indee koona naikon salamat.

¹³Palatikanggenekai ko Mian Bisa nalimang. Sabab indee komo moola koloyose oila ko Mian Bisa nasinupeton?

¹⁴Jadi potedesokai kalu ikoo daanon mountung. Bai kalu ikoo kanakon susah, inai motoliminggene baikon ko Mian Bisa komo beekene looluakon. Kita aki ndatoiyo oila komo teali banggadudul.

¹⁵Kutuboan akiyo kotakoso, bai malumbito dakutuboan aki kukitayo koidan nia. Daano kotempono mian monondok silaka, maukai yana saleh. Daano kotempono mian molokis moloas kona umur, maukai yana baladosa banggadudul.

¹⁶Inaimokai motodudul mondok tukon inai koidan motodudul mamangan komupikiran. Oila kotakoso mokakaate?

¹⁷Inai koidan motodudul kulokis kai todudul longas. Tuuk oila kogunano momate kalu akiyoon laate kotempono?

¹⁸Dedenggenemo kai kolua-luanodoo. Kalu kita matakutene ko Mian Bisa tantumokai monondok konda hasil.

¹⁹Pandoian kubaiyo kotumbuno lobian tambongan barani, luwedoi songulo komo berkuasa doi meeng kokota.

²⁰Doidunia nia akiyo komian mo talakana, akiyo komosidutu mokubai monondok tukon aki nabiasa baladosa.

²¹Inai moyase mondongolii sali-salita, indee komo toiyo ikoo daanon binatopikon meeng kopeleleani.

²²Ikoo susumukai komo sadariyo baikon komian bailon biasamo koidan ikoo batopikene.

²³Saibino doiya yaku ujio tukon kupandoian. Mau kunggoliyo sidutu dohikmatoo, pololokon modoon yana luwedoi yaku.

²⁴Indee komo posunggene koalatino natuboan nia? Todudul atean sampe aki naminangalatikon!

²⁵Maukai kubelajar tukon mounggolii pengetahuan, sulano kumalaat hikmat tukon potimbili doi sasaibino kopasadai. Yaku sobayo momangalatikene baikon dolalimdoo luwedoi longasan, tukon kulokisan daanokai komeeng kotetel.

²⁶Yaku malaat baikon boine lobian mosopot luwedoi matean. Kilakanano koboine buno buani tukon palako mo sadiamo lakoyo kona musuh. Napolobok buno putal kopoboino moonggol. Komian molakukene ko Mian Bisa namongiasan toliat luwedoi talongo, bai mian mobaladosa tantu naikon tinawan.

²⁷Kitayo, ko Sang Pemikir nabantilano: Sasaibino yaku pososunggenemo, salataa kukamatean mounggolii kopotimbilino.

²⁸Daano koidan yaku mounggolii potimbili-potimbili bailon, bai akiyo kohasilo. Doi antara soloon komian, yaku laate komeeng komala-malane moodotiiyo. Bai doi antara yanila akiyo koboine momoola kuodotiiyo.

²⁹Tolongo naiyamo dakulinaat: Mian Bisa kubayo kita sederhana tukon biasa. Bai susunggitamo komo kubaiyo kobutonggita sulit tukon susah-susah.