Read Banggai PONGOTUNGGUL 8 Bible Online

PONGOTUNGGUL 8 - Banggai bible

PONGOTUNGGUL 8

¹Bukanamaen konasanaangan komian momamangan konapikiran. Yana toiyo kopotimbilino doi sasaibino kopalakala. Pandoian kubayo yana boit tedes, tobikon koduduso tambongan sidutu.

²Anggayokai kalu tomundo mebee parentah, tukon inai mokubaiyo koperjanjian momosobit doi Mian Bisa.

³Tomundo moola kubaiyo sasaibino konatindakan, kalu yana aki napokonoi, tadukai mudedenggene yana.

⁴Tomundo tindokiyo tukon nakuasa; akiyo komo barani bantayo!

⁵Komian motaat doi yana, naikon aman tukon sanaang; komian pandoi toiyo kotempo tukon bulaando kai kotaatiano kotomundo.

⁶Doi sasaibino kolangge daano kotempono tukon cara susuungo, bai soisik tuuno konda pinahami!

⁷Akiyo komeeng komian kai komo toiyo oila komo totiiliyo konanasib, tukon akiyo komo moola mobantile oila mo naikon komo teali.

⁸Akiyo komeeng komian kai moola tahane kai tundayo kona matean. Doiya perjuangan moaki namoola kita tinggale, aki nomoola yana luput luwedoi yana, maukai tukon pongokolii tukon bakokolii.

⁹Sasaibino yaku kitayo salataa kupalaatikanggene sasaibino kokejadian doi dunia. Daano kotempono kobanggapi pakeo kona kuasa tuuk silakaiyo kotulano.

¹⁰Biasamo kukitayo komian lokis momate tukon kiniburkai. Bai tempo komian-mian mule doi bakiburan, yanila nggaale yana doi kota tampat nalakukanggano kokulokisan. Jadi doiya kai sia-sia.

¹¹Bulaando buno doiya konagampangan komian molakukene kokulokisan? Sabab kohukuman aki namosobit bineekon.

¹²Maukai nasakat kokulokisan luwedoi meeng komian baladosa nalinakukon, yana tataap tubo tukon bulusan kona umur. Kalu, indee komo taat doi Mian Bisa, tantu kona tubuan monondok.

¹³Kobalino, komian molokis badaang kokasusahan kona linaat. Kona tuboan mosobit taus buno bayangan. Yana naikon mate doi naumur namangulaan sabab yana aki nataat doi na TEMENENO.

¹⁴Mau nasasaibino doiya kala-kalaan tuuno. Kitayo tolong oila komo teali doi dunia: Daano komian mosaleh mo inukum bunokai pokulokis, daano komian lokis mo inukum bunokai mian saleh. Jadi, doiyakai sia-sia.

¹⁵Daku kaputusan doiyamo baikon komian sio natedes. Sabab kona tuboan doi dunia lalomo akiyo kona sanaangan bailon motuuk doiyana baimokai kaan, monginum tukon tedes. Doiya tolong komo moola narasaiyo doi napakadakan tangano, Mian Bisa beena tuboan momalumbit doi yana.

¹⁶Salataa yaku berusaha momalaat hikmat, tukon kupalatikanggene saibino komo teali doi dunia nia, maka yaku sadaro baikon maukai ndaberusaha tuuno madialan popook akiyo kotadean,

¹⁷kita aki namampu mangalatikene ko Mian Bisa natindakan. Bulaamo kai kita moberusaha, aki nanggoola kita pahamio. Mian pandoi akuyo baikon yana toiyo, bai kona bisaan yana aki natoiyo.