Read Banggai PONGOTUNGGUL 9 Bible Online

PONGOTUNGGUL 9 - Banggai bible

PONGOTUNGGUL 9

¹Saibino doo kupikikene tukon talakana. Mian Bisa ature komian monondok natuboan tukon momamangan konapikiran, tukon kai kalu domianoo mosikitene kai yase. Akiyo komo toiyo oila naikon komo teali oloyo doibundu.

²Bisa, nasib mopokakana tepakiyo sasamba komian; Mian mojujur maukai mian lokis, mian monondok maukai mian lokis, mian bilisii maukai mian mominosikiton, mian mo mososubakon sosubakon muakai moaki. Mian monondok aki namujur tuuno luwe doi mian mobaladosa, mian mo batotopi pokakana kai tukon mian moaki nayase batotopi.

³Jadi konasib mopokakana koidan tepakiyo yanila saibino. Tukon doiya meeng kolobo mosusa bunokai koidan saibino komo teali doi dunia. Kobanggapi kalu daanon motubo moonoh kulokisan, tukon konapikiran kai moonoh longasan. Maka sosinggot yana posunggene kona matean.

⁴Bai sementara kita danoon motubu tetel monondok, kita daano koidan konda moinian. Bolikonkai asu motubo lobian konabahagiaan, luwedoi singa moakiyo kona ansang?

⁵Komian, motubo, pasir toiyo baikon koajal totiiliyo yana, komian mate aki namotoiy oioila. Tuuk doiyana akiyo konda patambo kai imbalan jasa, tukon kosambuno tinoliminggono.

⁶Kilakanano, mosikit tukon nanafsu, saibino mate polaing yana. Yana akimo namangala obos oioila sasaibino komo teali doi dunia lalomo.

⁷Ayo, kaanemokai tukon tedes, inumemokai komu anggur tukon sanaang. Ko Mian Bisa aki nakabaratan, bai Yana pokonoi.

⁸Sodiiyomo kodudusomu nacerah tukon tambongan.

⁹Rasakanggenekai kotuboan tukon muboloki ikoo mamasikene sementara mutuboan moakiyo kotakoso, ko Mian Bisa mobeekene doikoo doi dunia. Rasakanggene sasamba kooloyo maukai naakiyo kotakoso. Sabab tambo mupakadakan tolongo doiya tolong.

¹⁰Limangemokai sasaibino komulimang tukon kokobukuan. Sabab naikon akiyono kopikiran kai balimang. Akiyo koilmu kai hikmat doi mian momate nadunia. Tukon dombalaamokai naikon komu tausan.

¹¹Doi dunia nia daano koidan daku kinita: kobakurebean aki sidutu mian momodoling obuku komo menaang, polobosian aki sidutu mian mobukuan komomenaang. Mian momamangan konapikiran aki sidutu malaat hasil baunggolian. Tukon mian mopandoi aki sidutu malaat kasaan. Koidan saibino koahli aki sidutu teali tololongol. Sabab indee komianno tolong bai kanakon tuboan mo soe.

¹²Banggapi aki toiyo oila kotempono konalubatan. Buno tomisi kona talong tukon ikan binuani, buno doiya kobanggapi tinepak silakaan doi tempo moaki natinoi.

¹³Koikoidan daano komeeng kocontoh bulaando komian naodotiyano kohikmat:

¹⁴Daano komeeng kokota popoisik mosoisik komo dungoliyo. Doi meeng kooloyo meeng kotomundo babasal lubat lobosio dokotadoo. Yana kepuunge tukon basa-basadia moduduwo kona beton.

¹⁵Doi kota doo daano komeeng komian motalalais momamangan konapikiran. Yana salamatene dokotadoo. Bai sabab yana talalais, najasa tinoliminggono tukon akiyo komeeng komian kai moneneke yana.

¹⁶Jadi bisamokai daku pandapat baikon kohikmat lisiiyo kobukuanan. Maukai nabunodoiyo, komian matalalais nahikmat akiyo koanggano. Konabantilan-bantilan akiyo komo mapalaatikanggon.

¹⁷Lobian kona momondokan mondongolii bantilan-bantilan meeng komian pandoi tanaang luwedoi meeng komian mowookon moberkuasa doi kumpulan lalomo mian-mian molongas.

¹⁸Kohikmat liisiyo kogunano tukon kosenjata, bai kocet mau natongo soisik mola, narusayo kosusu meeng kobelanga.