Read Banggai KIDUNG TUUNO 5 Bible Online

KIDUNG TUUNO 5 - Banggai bible

KIDUNG TUUNO 5

¹Yaku lubat doi kuasi, bibian, dinda, daku pangantin, kupototongikene komuur tukon kurampah-rampah; kukaane koani papano tukon kodokoto, kumonginum susu tukon kuanggur paisuno. Kaan tukon monginumo, tula-tulando, monginumokai sampe malangukene kobabianan.

²Yaku moolo, bai konoanggu badagai. Ndongoliyokai, kubibian moketuke kotataapon. Bukayokai kotataapon, dinda, kekasihku, kumerpati, noanggu natangobosan; koolunggu mbetak sabab soilu, kubuuk moono soilu motulo-tulo doipopook.

³Kulapasemo daku kalambi; kai naikon kupakeo koidan? Koainggu lapamo kukumesio, kai naikon kukodikitio koidan?

⁴Mbombokono-mbombokon konoanggu sabab kubibian taaniyomo kotataapon posupato.

⁵Maka yaku banguno tukon kubukayo kotataapon tuuk doi kubibian. Muur seselet luwedoi limano tukon limano sao-saono, mbetokiyo kobataanian tataapon posupato.

⁶Kubukayo kotataapon tuuk doi kubibian, bai yana abalimo tukon tauso. Yaku poloonggene tuuno kona koalalo; kuunggolio yana, bai akiyo kotakoso. Kuuange kosambuno, bai yana aki natimbane.

⁷Yaku pinosunggon saibino kopodagai kota; yanila bobokiyaku tukon pokolonio yaku, daku selendang yanila alayo tukon pakisayo.

⁸Manyanyimokai, eh koboiboine Yerusalem, kalu komuyu posunggene daku bibian, popitoikenekai doi yana, baikon yaku masakit pobianggonan.

⁹Oilakai komubibian liisiyo kobibian-bibian bailon, eh boine motambongan tuuno? Oilakai komubibian liisiyo kobibian-bibian bailon, sampe ikoo sumboliiyo kami moberjanji?

¹⁰Kubibian tambongan tukon monondok, monondok doi antara songulo kololoon komian.

¹¹Kooluno buno mosoni, mosoni tulen, kona buuk kees tukon mopook, mopook buno gagak.

¹²Komatano bunokai lapatiing doi paisu matano, lapatiing masaukene kosusu, osulang doi kolam bibilo.

¹³Pidalino buno rampah asino mobabangi, kosuungo buno bunga bakung moseseletene komur tulen.

¹⁴Kolimano mondok, basosolut mosoni tukon permata, butongo bunokai gading mobinu-bungai batu nilam.

¹⁵Koaino bunokai sudong-sudong marmer moute, tukon naalas mosoni tulen. Kooako tambongan pokakana kobunggul-bunggul doi Libanon, tukon pokakana aras batango.

¹⁶Kona basilinganan maamis tuuno, saibino kolobo doi yana menarik. Bunomo doiyakai ko bibian tukon kusobat, eh boi-boine Yerusalem!