Read Banggai KIDUNG TUUNO 7 Bible Online

KIDUNG TUUNO 7 - Banggai bible

KIDUNG TUUNO 7

¹Oh boine motambongan, mondok tuuno koainu tukon dosandaalo. Kobanamu matimbuk buno bungabunga, meeng komian seniman nalimang.

²Koolumu buno sasangil momatimbok, moaki nabisa kakurangan anggur pasambul. Kotiamu bunokai gandum momatimbuk, bunga-bunga bakung potikungon.

³Kosusuumu bunokai danga napau lua, kijang mopinga.

⁴Kobulungo buno manara mobeet. Komatamu buno dolak-dolak doi Hesybon, lolani kotataapon babasal doi Batrabim. Songamu buno manara doi Libanon Bunggulo, mosasalane kokota Damsyik.

⁵Koolumu bunokai Karmel bunggulo, komu buuk moinikat buno lembayung, maukai kotomundo bai masaindinggene.

⁶Tutnu ikoo tambongan, ikoo kinilakon doi antara mo sinananggon.

⁷Butomu pokakana kokurma batango, kosusuumu napotangian kosaono.

⁸Yaku yase molibai dokurmadoo batango, tukon malaat kosao-saono. Bilisii kosusuumu nabuno, napotangaian koanggur saono, komuansaang babangi buno apel saono,

⁹kosuumu maamis buno anggur paisuno! Sodiiyomo kai doangguroo nalomba doi kubibian, tukon aki nabotol-botol; tukon olubate kocinta asmara, tukon doi mian-mian mo daano moolo.

¹⁰Yaku kubibian koona, yana memetene yaku.

¹¹Ikoo dakubibian, maimo ndataus doipadang, tukon moolomo doi asi, doi bunga babianan tanga-tangano.

¹²Maimo nda badowa-badowa doi asi, tukon kitayo oilakai koanggur batango, lapamo sopii, tukon bungano tebelekamo; oilakai kodelima batango bungaimo. Indaa naikon kubeekene dakubibian doikoo.

¹³Arak batango babangi koboono, doi nda tataapon mololani daano kosao-saono momaamis, momalumbito konapinupuian tukon mosoodo; doiya kuabese tuuk ikoo, kubibian.