Read Banggai YESAYA 1 Bible Online

YESAYA 1 - Banggai bible

YESAYA 1

¹ Naiya kitabpia koantoko doiyamo teteba-teteba motuuk tentang Yehuda tukon Yerusalem ko Mian Bisa monyatakanggene doi Yesaya, Amos napau, doi tempo Uzia, Yotam, Ahas tukon Hizkia nabasambuan doi Yehuda.

²Eh ikoo kotimbu lengelekai, ikoo kodunianokon palatikanggenekai! Ko Temeneno nabantilano, “Kopau-pau molapamo yaku piarayo yanila lawanakumo.

³Kosaapi tingoniiyo kotumbuno, kokeledai toiyo kona tampat kaanan molapamo tumbuno sadiakene. Bai daku mian doi Israel aki napo tingoniiyaku; tukon aki napo pahamiyo.”

⁴Komuyunokon kobangsa mobaladosa komuyukai silakamo, tukon komuyu komian molokis konakalakuan tukon mian molokis! Sabab luwedoi polalim-lalim komuyu sakisaamo. Komuyu tolakemo ko TEMENENO tukon totonggulungemo ko Mian Bisa Momoliyous mo sio posombaiyo.

⁵Bulaando motongo komuyu bantayo? Komuyu yase poinukum lobian kona motongan koidan? Koolumu moonomo tukon pakol-pakol moboowan, konoamuyu tukon popikiran masakito.

⁶Luwedoi olumu polong doi aimu palalaino akiyo komo sehat doi butomu. Kobutomu boboongan, kopakol laalo mobulusan doi kulitomu tukon pakol-pakol. Komupakol-pakol akiyoon nakinumosi kai akiyoon napinorban tukon toik patolo mobilisii, tukon akiyoon koidan napinakuli tukon likison.

⁷Komutano minanaso; komukota-kota sinuamo kabus. Doi matamu salaano komian molulubaton alayo komu buta tukon manase sasaibino kololongguno.

⁸Tongo Yerusalem komo totinggal, bai teali kota motataap linubotii tukon linobosi tukon kala, pokakana kosandung doi anggur asino kai buno sabu-sabua doi ontimun asino.

⁹ Kalu andeno ko TEMENENO Mobabasal Konakuasa aki naolupute komoimoiya komian doi kita, kita sasaibino inalapuso kabus, pokakana ko Sodom tukon Gomora.

¹⁰Yerusalem, sasaibino kokatua tukon komu bangsa tealimo pokakana ko Sodom tukon Gomora miano. Pondongoliiyokai oilamo ko TEMENENO nabinantil doi komuyu; popalatikanggenekai oilamo konda Mian Bisa nainotunggulikon kita.

¹¹ Ko TEMENENO bantile, “Ikoo sangkayo baikon Yaku naikon yase sasaibino kososubakon momomeenggon ikoo mososubakene doiyaku? Yaku mangaekenemo tukon komu sosuba domba-domba mosinua tukon komu saapi pauno inakko. Kosapi langgilo sauno, domba tukon mbembe akimo kuiyase.

¹²Indee komo sumboliiyo komuyu mobabayo dososubakonoo doitempo polubatan bakaleda doiyaku? Indee komo sumboliiyo komuyu momababa dombaa-dombulo doi Ku Bonua Moliyous?

¹³Akiyo kogunano mau mubabayo domu sosubakonoo. Koboono adukon kutoluwekene. Aki kuiyase momokita kalu komuyu lamekene ko Bituwon mo Boolu, oloyo-oloyo Tadean tukon oloyo-oloyo babasal tukon rapat-rapat agama. Doiya sasaibino tealimo lokis sabab podosa-dosa tukon buno meeng kotanggungan doiya-Ku; tukon Yaku pakadako motanggunge.

¹⁵Kalukai komuyu tidekene kolimamuyu maka posambeang, bai aki kumapalatikanggon. Mau nabadaang luunggon musambeang bai aki kumopusinggon, sabab dolimamudoo badaango komu inakate. Kumosiyo kobutomu sulano nabilisii.

¹⁶Sasaibino kokulokisan komuyu mokubaiyomo siokai mutadeiyomo. Jadi, inaimo koidan momokubai kulokisan,

¹⁷balajarokai momokubai monondokan. Ekeenggelekai kokaadilan tukon akiyenggene kolailaingganano kotulanggita; beekene kopautuboon nahaak tukon belayo sasaibino kobalu naulusan.”

¹⁸Ko TEMENENO bantile, “Mai nda alapayo naurusan nia. Maukai komu dosa namemela buno kasumba, bai yaku naikon kumosiyo komuyu na teali moute bilisii pokakana kokapos. Maukai komu dosa-dosa nabadaang tukon nababalat, bai yaku ompuniyo.

¹⁹Kalu komuyu yase taat doiyaku, komuyu naikon toupiyo kolangge-langge momondok moluwedoi mutano.

²⁰Bai kalu komuyu lawanaku, komuyu mate naikon doi polobosian. Yaku, TEMENENO, lapamo basilingan.”

²¹Kokota loolukon motaat, budodoiya pokakana komeeng komian motombololowaon! Loolukon kotumbuno adil tukon jujur, budodoiya pangakate-pangakate dungoliyomo.

²²Yerusalem, looluk ikoo pokakana kosuasa, bai budodoiya akiyono koanggano koidan. Looluk ikoo pokakana koanggur momaamis, bai budodoiya tongo bapaisu tukon akimo namaamis.

²³Sasaibino kopo katua tealimo mian molokis tukon koaino limano tealimo pondikuk; yanila tolongo yase mantalima hadiah tukon doy tambo. Aki napo yase ndongoliiyo kobalu-balu napangaduan.

²⁴Tobikon doiya ko TEMENENO Mobabasal Konakuasa, ko Israel miano na Mian Bisa nabantilano: “Eh, Daku musuh-musuh, Yaku naikon balase Daku dendam doi komuyu, sulano naakimo pokubaiya-Ku susah koidan.

²⁵Yaku naikon tindokiiyo komuyu. Pokakana komian momosopu logam, Yaku naikon sopuwo komuyu; sasaibino komo manggilit liate doi komuyu.

²⁶Yaku naikon beena komuyu hakim-hakim tukon pongotinau pokakana doi looluk. Tobikon doiya kokota Yerusalem sinombuikono kota moadil tukon setia.”

²⁷Ko TEMENENO adil, maka Yana naikon salamatene ko Yerusalem tukon komian-mian momanasalkene kona dosa.

²⁸Bai komian-mian molawane ko TEMENENO yana naikon inakate kabus, tukon sasaibino komo otinggale ko TEMENENO naikon inakabus koidan.

²⁹Yanila naikon malaat maa sabab sosubaiyo kokayung-kayung batango tukon yanila mokubai kombung balambeaan.

³⁰Yanila naikon teali buno kayung mobabasal momolooyu koloono tukon buno kombung moaki nalinombai paisu.

³¹Pokakana kosumolot motosua tongo luwedoi meeng kosolo batuno, bunomo doiya koidan komian modaano kona kuasa naikon inakate luwedoi nakokubai-kokubai molokis, tukon akiyo komo moola atadeyo dosilakaanoo.