Read Banggai YESAYA 11 Bible Online

YESAYA 11 - Banggai bible

YESAYA 11

¹ Daud nakaturunan pokakanamo kokayung motinapemo. Bai mau nabuno doiya pokakana kotuwol mosopii tukon tubo kosopiino moboolu, bunomo lakon doi Daud nakaturunanoo naikon sumbot komeeng kotomundo.

²Ko TEMENENO nakuasa naikon lindungiyo yana, tukon tealikene yana monondok konoano tukon pandoy tuuno, pandoy mangala kaputusan tukon laksanakanggene; toiyo ko Mian Bisa namongiasan tukon lakukanggene ko Mian Bisa naparentah.

³Konakinilakon tongo taatan doi TEMENENO. Aki natongo sabarang Kona adiliyano komian kai tongo luwedoi mian nabantilan.

⁴ Yana hakimiyo komian motalalais tukon adil, komian moputus asa yana belayo tukon jujur; komian mosalah hinukum luwedoi naparentah, yana akabuse komian molokis.

⁵ Konatindakan adil tukon setia luwedoi langge-langge sasaibino.

⁶ Koserigala podungoli kodomba, komacan tutul baubanggon doi mbembe lisuko. Kosapi pauno makaan bulung polaing kosinga napau, tukon kopau mopoipoisik tandane yanila.

⁷Kosapi makaan bulung polaing koberuang, konapau-pau pookooloi. Kosinga kaane kobulung buno sapi.

⁸Tukon koidan meeng kopau lumboon aki napakolon kalu balamaen loolaniyo kobindanda moupason.

⁹ Doi Sion, Mian Bisa na Bunggo, akiyo komo lokis kai komo rusayo. Sasaibino kotano moono pandoiyan tentang Mian Bisa, pokakana kopaisu mokoonoiyo kotobun.

¹⁰ Laatemo naikon kotempono komeeng kotomundo moluwedoi Daud naturunan sasaibino kobangsa moteali anggayo doiyana. Yanila naikon lubat doiyana, tukon kona dungolan ngginaanggaal.

¹¹Doi oloyodoo ko TEMENENO naikon koidan pakeyo kona kakuasaan tukon babayomo mule kona umat labino doi Asyur tukon Mesir, tukon koidan doi tano Patros, Sudan tukon Elam, doi Babel, Hamat tukon togong-togong moodoon.

¹²Ko TEMENENO naikon libakene komeeng kopanji-panji motuuk doi bangsa-bangsa. Doiyamokai kopaloosano baikon Yana mopototongikenemo koidan ko Israel tukon Yehuda miano mosasabulo doi posaapon kodunia tukon Yana iyasemo mobabayo mule doi yaniladoo.

¹³Kobatomundoan doi Israel akimo namosikitene kobatomundoan doi Yehuda, tukon koidan kobatomundoan Yehuda akimo namusuwo kobatomundoan doi Israel.

¹⁴Bai yanila pomeenggono moseraange ko Filistin miano doi talise yanila rampasemo kobangsa-bangsa doi tolopot. Kobangsa Edom tukon Moab tukon koidan kobangsa yanila taklukanggenemo tukon tunduko doi yanila.

¹⁵ Ko TEMENENO naikon kootiyo ko Suez Minangano paisuno. Yana kubaiyo kombombuul momoonas mopuul sampe ko Efrat Paisunobatango teali pitu kopangano tukon pepende kopaisuno, sampe sasamba komian moola napintosiiyo maukai namapake sapatu.

¹⁶Doi Naumat labino naikon daano kololoon mobabasal sulano napo moola tobuat luwedoi Asyur, pokakana ko Israel miano natobuatan luwedoi Mesir.