Read Banggai YESAYA 13 Bible Online

YESAYA 13 - Banggai bible

YESAYA 13

¹ Naiyamo ko Mian Bisa nateteba, Yesaya Amos napau motalimayo tentang Babel:

²Popasekenemokai kopanji-panji polobosian doi bunggul bunggono mo kindolon! Popelenggenemokai doi sasaibino kosuludadu polobosi, tukon pesekene kololosuamu sulano napo sorbuwo dokotadoo mobabanggaal tataapono mobabasal.

³Ko TEMENENO uangemo kona pejuang-pejuang Yana molilikemo. Yanila bar ani tambongan, anggayo kobutongoila tukon moola Nabangaakene. Ko TEMENENO tugaskanggene yanila sulano nahukume komian mokanakon Naponggimolii.

⁴Polengelekai kobobolon alalo doilipuno mobunggukon, mopokakana komian mobadaang mopototongi alalo. Polengelekai kona nggalanggaabutan kobatomundoan-batomundoan tukon kobangsa-bangsa modaanoon mopototongi. Ko TEMENENO Mobabasal Konakuasa pareksayo kosuludadu polobosian.

⁵Yanila lubat luwedoi tano-tano moodoon doi dunia bundu-bunduno. Doi Konanggimalan lalomo ko TEMENENO pakeyo yanila sulano napo lopuwo kabus komian doi posaapon kodunia.

⁶ Mandaungokai, ko TEMENENO naoloyo lubatan loolanimo, doiyamo oloyo silakaan TEMENENO Mobabasal Konakuasa molubatene.

⁷Sasamba komian rasayo lemato kolimano tukon lapuso kona baranian.

⁸Doi yaniladoo sasaiibino tinepaki matakutan mohebat tukon makaluwatek buno boine momosuung. Yanila pombaleng paumeeng tukon paumeeng, kodudusoila memela sabab mamaa.

⁹Ko TEMENENO naoloyo lubatan, tukon doi oloyodoo ko TEMENENO tobuatene Konanggimalan tukon naliitan mohebat tuuno. Kodunia teali padang mokindolon, tukon sasamba komian mobaladosa naikon sinilakamo.

¹⁰ Sasamba kobituwon pauno tukon bituwon pauno napokombulian naikon tade kolaango; kooloyo matano teali kalipookan doi tempo nasumbotan, tukon kobituwon akimo naikon nalalaangan koidan.

¹¹Ko TEMENENO bantile, “Yaku hukume ko dunia sabab nakulokisan, tukon komian molokis sabab napai dosa-dosa. Sasamba komian mobabanggaal naikon Yaku rendahkanggene, komian mobatinggai tukon lokis naikon Yaku hukume.

¹²Komian mosinalamaton tongo sosisik tuuno, yanila soisik komo linaat buno mosoni tulen.

¹³Yaku tealikene kotimbu nalolondong tukon naunggot kodunia doi natangabosan doi kuoloyo, TEMENENO Mobabasal Konakuasa, Yaku okitakene Daku nggimalan.

¹⁴Komian modungol doi Babel naikon teali pobabandakon tukon bulen doinatano suwe-suwele. Yanila buno donga mobulenggene kobutongo doi mian moasuwo, kai buno domba meeng kotambuno moakiyo kopototoolino.

¹⁵Indeemo komo linako yana tinobok mate.

¹⁶Yanila naikon sakisiiyo konapopau-pau lumboon molinopu, konapo bonua-bonua rinampok kololongguno tukon konapo bolo-boloki kinooloy.”

¹⁷Ko TEMENENO bantile koidan, “Yaku gerakanggene kobangsa Madai sulano nalubat molobosiyo ko Babel. Doi yaniladoo aki namoola tinambo tukon suasa kai mosoni.

¹⁸Tukon napo pana batango tukon panano yanila mo komo akateyo kotabo-tabo. Aki napo seseange kopau lumboon tukon labuk-labuk,

¹⁹ Luwedoi sasaibino kobatomundoan, Batomundoan Babel komo monondok tuuno tukon kotumbuno babanggaakene. Bai Yaku, ko TEMENENO, naikon akamanasemo, pokakanamo Daku lakukangganano ko Sodom tukon Gomora.

²⁰Akiyono komeeng komian modungol indaa. Akiyono komeeng ko Arab miano molausala momokubai sandung doi lipudoo tukon akiyono kopototooli naikon mobabayo kona mbembe kai domba momakaan bulung idoo.

²¹ Dolipudoo naikon komo dungoliyo baino iyayon-iyayon mombosolo. Kotomisi kolu mokubai telea doi napo bonua-bonua, tukon kotomisi unta naikon dungol indaa. Kombembe-mbembe mombosolo potanduk-tanduk doi lipu natabaakan.

²²Koasu lobo natataluaungan naikon koalalo longol doi sabu-sabua tukon doi kamali-kamali doi Babel. Kona loonu manasan loolanimo tukon akimo koidan nabinolii kotempono.”