Read Banggai YESAYA 14 Bible Online

YESAYA 14 - Banggai bible

YESAYA 14

¹Ko TEMENENO mamaasikene Konaumat doi Israel, tukon Yana abalinggene teali Namian koidan. Yana naikon abese koidan yanila doi napo tano suwe-suwele. Komian molulubaton lubat mopomeenggon tukon yanila.

²Badaang kobangsa naikon motulungiyo kobangsa Israel moabali doi napo tano ko TEMENENO mobeekenemo doi yanila, tukon indaa koidan dobangsa-bangsadoo baata-ata doi Israel mianodoo. Ko Israel miano taane komian mobiasa taane yanila tukon parentayo komian mobiasa lailainggene yanila.

³Ko TEMENENO naikon bebaskanggenemo kobangsa Israel luwedoi napo masakitan tukon sakisaawan, tukon doi limang mobabalat mopinakisaakon doi yanila.

⁴Kalukai ko TEMENENO lakukanggene doiya, yanila naikon totulaiyo kotomundo Babel buno naiya, “Ko Tomundo mobarani lokis tuwongo! Akimo namoola bala-balainggon koidan.

⁵Ko TEMENENO opupusemo koponguasa-ponguasa molokis namaparentaan

⁶tukon doi nanggimalan yana lalainggene kobangsa-bangsa tukon momeenggon yana sakisaayo yanila.

⁷Bai konapupusan posaapon kodunia aman tukon dame, tukon sasamba komian menyanyi laba-laba.

⁸Ko Eru batango tukon kokauwalu doi Libanon laba-laba sabab dotomundodoo molokis tuwongo, tukon sambuno yana taus akiyono komo sumboliiyo napo tinape!

⁹Doi mian momate nadunia yanila rame-rame mosambute dotomundodoo Babel. Sambuno bunodoiya maka tabanguno kouliko komian mobalakuasa looluk doi dunia, tukon sasaibino kotomundo uliko bangun doi nakamali.

¹⁰Yanila sasaibino pelenggene doiyana, ‘Eh! Budodoiya ikoo pokakanamo kami, muyuko tukon akimo namoola mokubai oioila!

¹¹Loolukon ikoo inodotii tukon kasapi, bai budodoiya ikoo daanomo doi lipu mokiis doi mian momate nadunia. Kobesuk-besuk teali mukoy tukon kototolong muonggulos?’

¹² Eh tomundo Babel, doi lolukonoo ikoo teali mandala molalaangan, bai budodoiya tuwongo luwedoi timbu. Doi loolukoo ikoo lungguiyo kobangsa-bangsa, bai budodoiya ikoo tinikakon doi buta.

¹³ Ikoo batetel moliba doi timbu tukon ikoo abese komu kamaling doi bituwon-bituwon pauno bunggono motatandak tuuno! Yaku pikikene ikoo teali tomundo doi bunggul taalikon doi babo doi lembet sembeleng, kodewa-dewa napototongian.

¹⁴Ikoo bantile, baikon ikoo naikon liba doi babo natatandakan kobunom tukon pokakana Moinakatandak Tuuno.

¹⁵Baanggokai ikoo kinusokon taalikon doi matean doi mian momate nadunia.

¹⁶Yanila modaano idoo naikon mbalenge tukon pateekene ikoo. Yanila naikon mansadai, ‘Naiyamokai komiano komo nggiyeke kodunia tukon sasaibino kobatomundoan-batomundoan somba doiyana?

¹⁷Iyanamokai komo manase kokota-kota tukon boliiyo kodunia teali padang moluas? Tukon naiyamokai komo aki nabiasa sobiiyo komian motinaan kai sumboliiyo napo mule?’

¹⁸Sasaibino kobekaas tomundo doi bangsa-bangsa kinubur tukon monondok doi nakinuburan suwe-suwele,

¹⁹bai koomu akiyo komu kinuburan; komayatomu sinakukon buno kayung sopiino modinuwokon, maka natinombuni tukon pejuang-pejuang mayato momate doi polobosian lalomo, tukon sinakukon posinggat-singgat yanila doi batu leengo, pokakana kobunit mopinipiik.

²⁰Ikoo akabusemo komu tano tukon ikoo akateyomo komu bangsa susuumu. Tobikon doiya ikoo aki mukinubur pokakana kotomundo bailonggon. Akiyokai maunabaino meeng komu kaluarga molokisoo naikon komo salamat.

²¹Komokolotan naikon mosobito natinambuun! Komu mala-malane naikon mate sabab napo mbumbu nalalim. Akiyokai komeeng doiyaniladoo naikon komo teali pamarentah doi dunia kai momoola bangune kokota-kota.”

²²Ko TEMENENO Mobabasal Konakuasa bantile, “Yaku naikon lubat molobosiyo ko Babel tukon yaku alapusemo. Akiyokai komeeng komian daku sinalamaton, tukon koidan kolabuk-labuk akiyo daku sinobii motubo. Yaku, ko TEMENENO, lapamo bantile doiya.

²³Yaku tealikene dolaak ko Babel kalu modungoliyo. Yaku naikon sasapuwo ko Babel sampe bilisii. Yaku, TEMENENO Mobabasal Konakuasa, lapamo bantile.”

²⁴ Ko TEMENENO Mobabasal Konakuasa batotopimo: “Komo lapamo Yaku rencanakanggene pasti teali.

²⁵Ko Asyur miano modaano doi Israel doi Kutanodoo, naikon Yaku akateyo kabus, tukon komo daano doi Kubunggul-bunggul naikon Yaku pipikiyo. Yaku naikon bebaskanggenemo Dakubangsa luwedoi nalinailainggonan tukon luwedoi napo tanggungan mopinakisaakon doi Asyur miano.

²⁶Naiyamokai Daku rencana motuuk doi dunia; totidokon Kolimanggu tuuk mohukume kobangsa-bangsa.”

²⁷Ko TEMENENO Mobabasal Konakuasa lapamo putusiyo sulano nakubaiyo buno doiya. Yana tidekene kolimano sulano nahukume komian, tukon akiyokai komeeng komian momoola pantane Yana.

²⁸ Naiyamokai koteteba moinumumkanggon doitempo Tomundo Ahas namatean.

²⁹ Eh kobangsa Filistin, kotongkat mokinubai pongumbas doikoo molotomo. Bai inai molaba-laba, sabab kalu meeng kobinda mate, daano koidan kobinda molobian kona kulokisan molubat mosoboliyo domo matedoo, tukon dobindadoo nanggalau buungikene konaga modaano kokapilo.

³⁰Komuyu naikon tinepaki malaalan mohebat, tukon sasaibino komian labino naikon inakate. Kobalino, komian motalalais tuuno moluwedoi TEMENENO Naumat naikon malaat kinaan, tukon komian moakimo namoola mokubai oioila naikon tubo tukon aman tuuno.

³¹Pomandaungkai, tukon ponggeleamonkai momakabi tulung, eh kokota-kota Filistin! Komuyu sasaibino naikon bingung sabab pomatakutan! Kobunom alimbotuno kobung luwedoi lembet doiya teali paloosan baikon lubato komusuh; akiyo komeeng komian moaki namatakut doiyaniladoo.

³²Konapo potimbili oila naikon konda bineekon doi utusan-utusanoo molubat luwedoi bangsa Filistin! Kita naikon bantile doi yaniladoo buno naiya baikon ko TEMENENO nabangunano ko Sion, tukon Kona umat mosakisaa naikon malaato soopan idoo.