Read Banggai YESAYA 16 Bible Online

YESAYA 16 - Banggai bible

YESAYA 16

¹Luwedoi kota Sela doi padang gurun, kobangsa Moab makapatu domba pauno teali hadiah doi pamarentah Yerusalem.

²Ko Moab miano totiili doi Aruon Paisunobatango bibilo maka napo amba-ambakon bai yanila bingung pokakana kotomisi mosiniika luwedoi natelea.

³Tukon yanila bantile doi bangsa Yehuda, “Pobantilemokai oila komai linakukanggon. Tealikai mai soopan momomol doi oloyo namoonasan, tukon sobiiyomokai mai dungol doi musoopanoo. Kami nia mian modampas; sokanggamikai tukon inai moloilokisami.

⁴Pataikanggami momonumpang doimutano nia. Lindungikamikai luwedoi mian-mian moiyase akatekami.” (Kopalailainggon tukon komangakatean naikon pupuso, tukon komian momanas tukon molailainggene kotano Israel naikon lapuso.

⁵Doibundu naikon daano komeeng komian moluwedoi Daud naturunan doiyamo naikon komo teali tomundo, tukon naikon yanamo komo parentayo kona bangsa tukon mamaasikene maka nasetia. Yana ekeenggele kokaadilan tukon mosobit mokubai tindakan mokakana.)

⁶Kobangsa Yehuda bantile, “Kami lengelemo tentang ko bangsa Moab nasombongan. Kami toiyo baikon yanila babanggaal tukon sombong. Konapo bantilan tongo bantilan moakiyo koantoko.”

⁷Tobikon doiya kobangsa Moab miano yanila pokokiili. Sobiiyomokai napo kokiil kalu yanila neneeke konapo kinaan momaamis doi kota Kir-Hareset. Sobiiyomokai napo putus asa tukon napo bakalaakon.

⁸Kokombung-kombung moloolani ko Hesybon tukon koanggur asi-asino doi Sibma linopumo kabus, koasi-asi mobiasa konahasil momonondok tuuno tukon tuuk doi mokuasaiyo kobangsa tukon kalu yanila inume teali yanila malangukene. Doiloolukonoo doanggur-angguroo asino bebelan polong doi kota Yaezer; tukon doi tolopot polong doi padang pasir, tukon taalikon talise polong doi Tobun Mate sembeleng.

⁹Budodoiya yaku kokiiliyo koanggur batango doi Sibma pokakana daku kokiiliyano ko Yaezer. Tokumbe komatanggu leelo tuuk doi Hesybon tukon Eleale, sabab konapo asi lololungguno musuh kaanemo kabus.

¹⁰Akiyokai komeeng komian molaba-laba doi kombung-kombungoo mosubur. Akiyono komeeng komian motolo-toloukon labaan kai momanyanyi doi anggur asino. Akiyono komo mopiis anggur sulano kopaisuno nakinubai anggur, yaku atadeyomo konapo wowookonan molaba.

¹¹Manggadidi konoanggu tukon manasal tuuno konoanggu kalu kukitayo ko Moab ndondoongo tukon Kir-Heres.

¹²Ko Moab miano kakaate tuuno motoliboiyo kobunggul basosubakonan doi napo lipu bakaledaan tukon napo sambeangan, bai akiyo kotakoso.

¹³Doiyamokai koteteba doi loolukoo TEMENENO mobeekene tentang doi Moab miano.

¹⁴Tukon budodoiya ko TEMENENO bantile koidan : “Tapaat tolu kotaun koidan, sasaibino ko Moab miano nabuat yanila mobakiallakene naikon lapuso. Kona rayat mobadaang naikon tealimo soisik tukon muyuko.”