Read Banggai YESAYA 19 Bible Online

YESAYA 19 - Banggai bible

YESAYA 19

¹ Naiyamokai koteteba tentang Mesir. Ko TEMENENO lubat doi Mesir tukon lakit doi bunom momodoling. Komian mobapilogotan doi Mesir lolondong doi salaano tukon ko Mesir miano paupaunomo konoanoila.

²Ko TEMENENO bantile, “Yaku naikon tealikene kopolobosian utus mondoutus doi Mesir; utus lawane kona utus, komo poloolanikon lawane kona poloolanikonan, kokota lawane kokota tukon kobatomundoan lawane kobatomundoan.

³Ko Mesir miano natetel yaku akiyenggene tukon yaku lotoyo kona po semangat. Yanila naikon makabi tulung doi napo pilogot, yanila makabi otunggul tukon potudoikon doi dukun-dukun tukon doi ulik-ulik.

⁴Yaku naikon sarahkanggenemo ko Mesir doi meeng kotomundo mobarani tukon lokis kona parentaano yanila. Yaku, TEMENENO Mobabasal Konakuasa, basilingano.”

⁵Ko Nil Paisunobatango naikon mbeeng tukon naikon motuul.

⁶Kokolam-kolam naikon boowan koikano kalu mootimo kopaisuno. Ko Gelagah tukon bulungo naikon molooyumo.

⁷Posaapon kotampat mokidadian kolibuang popupuson ko Nil Paisunobatango naikon motuul kokabus maka mbombuul nabengakene.

⁸Sasaibino kotolosabang mobiasa bapeka doi paisudoo yanila mongoluu tuuno maka napo kokiil sabab konapo peka tukon konapo buani akiyono kogunano. Sasaibino komian mobapete putus asa;

⁹yanila tukon mian mosinasai susa tukon akiyono konapo samangat.

¹¹Tutuu kona longasan kokatua-katua doi kota Zoan! Ko Mesir miano mopandoy kubaiyomo yanila bodoh! Yanila barani tuuno mobantile doi tomundo baikon yanila katurunan mian mopandoy tukon tomundo nakaturunan doi loonu loolukon!

¹²Eh, kotomundo Mesir, inaandomokai dopo tuan mopandoy mebee otunggul? Uga-ugaatene yanila toiyomo ko TEMENENO Mobabasal Konakuasa natetel motuuk doi Mesir.

¹³Sasaibino komo katuaiyo ko Zoan tukon Memfis doiya mian molongas. Yanila bolikonkai pakatuai kota bai doi yaniladoo tongo tealikene konapo bangsa nasilaka.

¹⁴Doi yaniladookai TEMENENO komo kubaiyo longas tobikon doiya konapo otunggul salamo tuuno. Koakibato, ko Mesir tealimo sala doi sasaibino kolangge, tukon unggo-unggoto pokakana komian momalangu motenggelusiyo konauta susuungo.

¹⁵Doi Mesir akiyono komeeng komian komo toiyo kopikiran momonondok, maukai pamarentano tukon rayato, maukai paulangkaino kai mian mobiasa.

¹⁶Kalu naikon nalaate kotempono kobangsa Mesir teali buno meeng koboine momolisuk tukon monggotokuton. Yanila teali lolondong kalu yanila kitoyomo ko TEMENENO mopasekenemo kolimano nahukumano yanila.

¹⁷Kotano doi Yehuda kubaiyo bingung ko Mesir miano kalu iningotiikono ko TEMENENO Mobabasal Konakuasa nakaputusan tentang doi yaniladoo.

¹⁸Doi tempodoo lima kokota doi Mesir komo pakeyo kosilingan Ibrani. Komian indaa mokubai totopi tukon TEMENENO Mobabasal Konakuasa sambuno. Daano komeeng dokotadoo sinombuikon “Kota Oloyo matano.”

¹⁹Doi tempodoo kokota Mesir pusato daano komeeng kobalabaan motuuk doi TEMENENO, tukon doi napokalalatan inabos komeeng kobatu koidan motuuk doi TEMENENO.

²⁰Dobalabaanoo tukon dobatudoo doiya meeng kopalosan nadaanoan ko TEMENENO Mobabasal Konakuasa doi Mesir. Kalukai naikon dobangsadoo linailainggon, tukon kalu yanila uango doi TEMENENO momakabi tulung, ko TEMENENO kapatuwo komeeng komian sulano nasalamatene yanila.

²¹Ko TEMENENO okitakene kobutongo doi bangsa Mesir, tukon ko Mesir miano naikon tingoniiyomo tukon sosubaiyomo Yana, maka napo mababa sosubakon tukon napo sosuba doiya-Na. Yanila mabantil perjanjian doiya-Na tukon batotopian yanila molaksanakanggene.

²²Ko TEMENENO naikon ajare ko Mesir miano, bai salataa laate konapupusan Yana seseangemo yanila. Yanila abalimo doi TEMENENO, tukon ko TEMENENO lengelemo konapo sambeang tukon Yana oluputemo yanila doi silakaan lalomo.

²³Doi tempodoo naikon daano kololoon mobabasal napokalalatanan ko Mesir tukon Asyur. Dotanodoo molua kotumbuno naikon mule loloiyo dololoono tukon yanila kaleda posinggat-singgat.

²⁴Doi tempodoo ko Israel nakadudukan pokakana ko Mesir tukon Asyur, tukon dobangsadoo motolu teali balakaat doi posaapon kodunia.

²⁵Ko TEMENENO Mobabasal Konakuasa naikon balakaatiyo yanila tukon bantile, “Yaku balakaatiyomo komuyu, eh komuyu Daku umat doi Mesir, Asyur Yaku mopasitakayo, tukon Ko Israel Kuumat linilik.”