Read Banggai YESAYA 21 Bible Online

YESAYA 21 - Banggai bible

YESAYA 21

¹Naiyamo kotetebano tentang Babel. Buno sokoy momomuuk mololoiyo ko padang gurun, bunomokai doiya kona lubatan kosoe molokis tuuno mo luwedoi tanodoo.

²Yaku malaat pokita tentang langge-langge moteali molokis; tentang poloilokisan tukon nainakamanasan kabus kotano Babel. Majumokai, ikoo ko talenga Elam, lobosiyomokai! Eh ko talenga Madai, kopuungemokai! Sabab ko Mian Bisa naikon opupusiyomo sasaibino kosakisaawan Babel momangaanikene.

³Dopokitadoo kubaiyaku pusing sampe akimo kumoola kitayo kolipu tukon kubaiyaku bongol. Yaku tealimo nggotokuton tukon nggosokitono, pokakana komeeng koboine moadukon mosuung.

⁴Konoanggu aki natanaang; yaku matakut tukon lolondong konoanggu. Kopopook yaku morindukanggene tongo lubatene komatakutan.

⁵Yaku kitayo koidan kolamean molapamo tasadia; komian moinundang naosulangan tasadiamo. Yanila kaan tukon inum. Bai sosinggoton longol komeeng koparentah: “Eh kosuludadu-suludadu kapalano! Posadiayo kopo sinapan!”

⁶Maka ko TEMENENO bantile doiyaku, “Potausokai poabese komeeng kopototooli tukon pailukene doiyana sulano oilamo kotana kinita sio nalapurkanggene.

⁷Kalu yana kitayo kopasukan molakit adalan yanila lubat polaing-laing lua, kopasukan momolokiti keledai tukon unta, yana sio nakitayo mono-monondok.”

⁸Doibundu koidan dopadagaidoo sio nanggeleamon, “Tuan, yaku badagaimo sasamba kooloyo mau doi oloyo maukai doi popook.”

⁹ Kitayokai, ndaiyamo yanila! Kopasukan momolokiti adalan yanila lubat polaing lua-lua. Doibundu koidan dopadagaidoo yana babulitakene, “Ko Babel tuwongo! Konapo timbalang-timbalang sinosubai manaso tukon sasabulo doi buta.”

¹⁰Daku bangsa Israel! Ikoo linai-lainggono tukon piniipiiko pokakana kogandum batu-batuno. Budodoiya yaku pelenggene doikoo kobilita momonondok molapamo yaku lengele moluwedoi TEMENENO Mobabasal Konakuasa, Israel miano na Mian Bisa.

¹¹Naiyamo kotetebano tentang ko Edom. Daano komian mobantile doiyaku moluwedoi Edom, “Eh, padagai, kai daanoon momalumbit konapopokita?”

¹²Daku potimbili, “Kododowa naikon lubat, bai tataap popook koidan. Kalu ikoo yase mansadai, lubatokai momansadai koidan.”

¹³Naiyamokai kotetebano tentang ko Arab: Eh, ko Dedan miano, komu mian mobadaang moampakon doi padang pasir yanila mokubaimo sandung doi Arab lipuno.

¹⁴Eh kotano Tema tumbuno, pobeenakai namonginum paisu komian momolou molubat doikoo, tukon pobeenakai nakaan komian molulubaton.

¹⁵Sabab yanila bulenggene kodilinoila luwedoi silakaan, luwedoi pana mopinanakono, tukon luwedoi polobosian mohebat.

¹⁶Maka ko TEMENENO bantile doiyaku, “Tapaat baino meeng kotaun koidan ko Kedar bense-benseno namakmuuran naikon akiyono.

¹⁷Ko Kedar miano napamana-pamana takainomo mian mopandoi barani. Bai soisik komo salamat. Yaku, ko TEMENENO Israel na Mian Bisa basilingano.”