Read Banggai YESAYA 23 Bible Online

YESAYA 23 - Banggai bible

YESAYA 23

¹ Naiyamo kotetebano tentang ko Tirus. Eh komuyu ko Tarsis miano mobiasa tala-talabut mopintosiiyo kodapang, pomandaungokai! Doitempo potalabutan tukon popolong doi Siprus, komuyu pinopitoikon baikon kokota Tirus manaso. Kopelabuhan tukon kopo bonua manaso sasaibino.

²Eh komuyu kopesisir tumbuno, pomangadumokai, tukon kopedagang-pedagang Sidon! Sabab komuyu biasa makapatu mian motaus doi tobun sembeleng sulano napo babalukon tukon mongoli Mesir miano nagandum tukon sulano napo badagang doi sasaibino kobangsa.

⁴Eh kokota Sidon, komu inodotiiyan akiyono! Kotobun dapango moatean akimo naakuiyo ikoo koidan, konabantilano, “Yaku akiyoon kubiasa mosuung pau, akiyoon kubiasa mopiala pau malaneno kai boineno.”

⁵Tukon koidan ko Mesir miano yanila masainding tukon nggabut kalu yanila lengele baikon ko Tirus mosilakamo.

⁶Komuyu kopesisir tumbuno, pomandaungai, tukon podampasokai doi Tirus!

⁷Pokitayokai kopokota Tirus modaanomo doi loonu loolukon. Naiyamokai dokotadoo mobiasa basa-basanaang? Kai naiyamo dokotadoo mo makapatu miano motaus doi tobun sembeleng sulano nalausala indaa?

⁸Padahaal kona pedangang-pedang mian moturunan sambu tukon inodotii doi dunia nia? Indeekai komo putusiyo sulano ko Tirus nainotuwong. Sabab naiyamo kokota moberkuasa tuuno?

⁹Ko TEMENENO Mobababasal Konakuasa, Iyanamokai komo putusiyo. Iyanamo komo putusiyo sulano naatadeyo dokotadoo tumbuno nabangga-banggaalan luwedoi napo hasil yanila molaate, tukon yanila yase pipiike komian moinodotii doi dunia.

¹⁰Eh ko Spanyol tumbuno, poambakonokai polimange kopo kombung, sabab kotampat mokubaiyan kapal akiyono.

¹¹Ko TEMENENO tidekenemo kolimano doi tobun bunggono tukon nggolinggenemo kobatomundoan-batomundoan. Yana maparentakenemo sulano ko Fenisia nabenteng-benteng naminanas kabus.

¹²Ko TEMENENO bantile, “Eh kokota Sidon! Ikoo akimo mubasa-basanaang koidan. Komo dungolikon linai-lainggono. Maukai napo dampas doi Siprus, bai akikai napo aman.” (

¹³Bolikon bangsa Asyur, baikai bangsa Babel komo pataikene kokota Tirus nakinuasai iyayon mobarani. Yanilamokai komo mokokondong menara polobosian, tukon yanilamo komo manase tukon benteng-benteng sampe dokotadoo teali manas.)

¹⁴Eh komuyu komian mobiasa tala-talabut, pomandaungokai! Kokota komuyu mobalaanggene manasokai.

¹⁵Naikon nalaate kotempono maka ko Tirus tinoliminggono pitu kolono kotaun konakalumbit, pokakana komeeng kotomundo naumur. Kalu liisemo dotempodoo, ko Tirus naikon buno meeng koboine motombololowaon mobuno naiya konyanyiano:

¹⁶Mangalamokai kasapi, boilingiyokai kokota, eh ikoo kotombololowa motinomilinggono! Kutiyokai kokasapi, tukon manyanyikai koidan, sulano muninonook koidan.

¹⁷Salataa kabus dotaunoo mopitu kolono, ko TEMENENO neneeke koidan ko Tirus tukon naikon koidan yana lakukene konalimang buno doi looluk. Yana badagang tukon sasaibino kobatomundoan modaanoon doi dunia.

¹⁸Konapo untung tukon konapo tambo aki naikon napo abese, bai yanila tongo sosubakene doi Temeneno. Komian mososubaiyo ko TEMENENO naikon mapake dodoydoo sulano napo kubaiyo pongoli oilamo konapo kapalaluuwan.