Read Banggai YESAYA 25 Bible Online

YESAYA 25 - Banggai bible

YESAYA 25

¹TEMENENO, Ikoomokai daku Mian Bisa, yaku akabasale Ikoo tukon yaku nggaale Kosambumu. Sabab Komu kokubai-kokubai minasaindinggon tuuno; Ikoo batetelikenemo salataa doi looluk, tukon ikoo kubaiyo tukon molole.

²Yaku manasemo kabus dokotadoo; dokotadoo mopinagar kayung teali molombo. Kokamali mian molulubaton mobangune manaso, tukon akimo nabinangun posidu-sidutukon.

³Ikoo naikon ngginaanggaal luwedoi bangsa mobukuan, tukon kobangsa-bangsa mobarani tukon lokis naikon matakutene ko TEMENENO.

⁴Sabab Ikoo teali mian moaki nabukuan nasoopan, tampat mian motalalais narasaano aman. Ikoomokai kosoopan luwedoi sokoy, soopan luwedoi pintal momoonas tuuno. Sabab ikoo lokis doi mulubatan momolobosi pokakana kosokoy doi tempo timul,

⁵pokakana kombombuul pintal doi buta mokindololon. Bai Ikoo kubaiyo komai musuh aki nabiyok-biyok, yaku atadeiyo komian molokis nanggele-nggeleamonan, pokakana kosoopan doi bunom mopopookiyo kooloyo matano momoonas.

⁶Doi Bunggul Sion, ko TEMENENO Mobabasal Konakuasa yana sadiakonemo koramean motuuk doi sasaibino kobangsa doi dunia. Yana sidake kokinaan momaamis tuuno tukon anggur paisuno mopinili.

⁷Doi bunggul bunggonodoo. Yana naikon sobiiyo kobunom susaan motombukiyo sasaibino kobangsa-bangsa.

⁸ Ko TEMENENO Mobabasal Konakuasa naikon akateyo kabus komaut polong sidutu-posidutukon! Yana naikon apuse komian matano paisuno moluwedoi doi sasamba komian duduso, tukon edeenggene kopototulai doi naumat motanggunge doi posaapon kodunia. Ko TEMENENO lapamo bantile, tukon doiya pasti teali.

⁹Doitempodoo komian naikon bantile, “Konatutuuwan, iyanamokai konda Mian Bisa; iyanamokai konda tinotiili, sulano nda sinalamaton. Tutuu, naiyamokai ko TEMENENO; iyanamokai konda tinotiili. Budodoiya kita wookon laba-laba, sabab iyana salamatenemo kita.”

¹⁰ Ko TEMENENO naikon lindungiyo ko Bunggul Sion, bai ko Moab pinipiik pokakana kolembut doi nainabosan.

¹¹Kotumbuno naikon ulule kolimano pokakana komian mobatotobo kayok doi tobun. Bai ko TEMENENO naikon akiyenggene konapo babanggaalan tobikon doiya akinapo moola mokubai oioila.

¹²Ko Moab nabenteng-benteng tukon kopagaro mobinetoon motatandak tuuno naikon linubang tukon tinikakon doi buta teali manas buno abu.