Read Banggai YESAYA 26 Bible Online

YESAYA 26 - Banggai bible

YESAYA 26

¹Doi tempodoo komian naikon manyanyikene nanyanyian nia doi tano Yehuda: “Bukan maen kona bukuanan naiya nda kota nia; Mian Bisa susuungo komo bangune Kona benteng, tukon naimbamo konda salamatan.

²Bukayomo kotataapon-tataapon mobabasal, sulano nausok kobangsa mosetia, bangsa molakukanggene ko Mian Bisa namongiasan.

³TEMENENO, Ikoo mebee damean tukon doi nasanaangan doi mian momoonggol konoano sabab yana anggayo Ikoo.

⁴Anggayokai momeenggon ko TEMENENO, sabab ko TEMENENO Mian Bisa, sidutu lindungiyo kita.

⁵Ko TEMENENO aki naiyase komian mosombong; yana manase kabus konapo kota mopinagar kayung, tukon manase kabus doi buta.

⁶Komian motalalais tukon komo sakisaa naikon komo pipiikiyo.”

⁷Komian mojujur ambakon doi loloon momoloyos, sabab Ikoomo, ko TEMENENO, komo kubaiyo konapo loloon.

⁸Oh TEMENENO, kami loingiyo Komu kaputusan, tukon kami totiiliyo Ikoo; Ikoomokai komai ngginaal tukon konoanggami napinoloonggon.

⁹Daku jiwa peleenggene Ikoo doi tempo napopookan, konoanggu moinikene Ikoo doi tempo dowa-dowa. Kalu Ikoo naikon hakimiyo kodunia, kodunia tumbuno naikon toiyo oila komo bisa.

¹⁰Maukai komian molokis nakinubai tukon monondok, bai aki natoiyo oila komo bisa. Doi negara modaano kona hukum bai yana mokubai kulokisan, tukon aki naakuiyo ko TEMENENO Nakuasa.

¹¹ TEMENENO, Ikoo siap mohukume Komu musuh, bai yanila aki napo toiyo. Batadikenemokai napo mammaa tuuno mokitayo Komu maasi motuuk doi Muumat. Batadikenemokai napo mate kabus luwedoi Mupongukum yanila.

¹²TEMENENO, Ikoomokai naikon komo kubaikami sanaang; sasaibino komai linimang, Ikoomokai komo lakukanggene tuuk doi kami.

¹³Kotuan-tuan bailonggon biasa kuasaikami, bai tongo Ikoo komai inakui, oh TEMENENO komai Mian Bisa!

¹⁴Yanila matemo tukon akimo napo tubo koidan, kouliko akimo naabali koidan. Sabab doi yaniladoo Ikoo akateyomo kabus tukon akimo mumonondok doi yaniladoo.

¹⁵Oh TEMENENO, Ikoo tealikanggamimo badaang tuuno, tukon Ikoo ekebelanemo komai lipu, tobikon doiya kami akabasale Ikoo.

¹⁶Ikoo hukumemo kami; doi mai susaan kami abali doi Ikoo, tukon komai sambeang doi-Koo, TEMENENO.

¹⁷Pokakana koboine momosuung pau makaluatek tukon nggeleamon sabab namasakitan, bunomokai doiya komai kokubai doi salaa-Mu, TEMENENO.

¹⁸Kami tianan tukon makaluatek sabab namasakitan, bai akiyo komai sinuung; aki mai mebee kasalamatan doi dunia, aki koidan nasosuungi kobanggapi doi dunia.

¹⁹Komu mian momatemo naikon tubo koidan, konapo bajan abali koidan. Komian motinadino doi buta lalomo naikon tubo tukon laba-laba. Pokakana kolinggous mosegarkanggene kodunia, Ikoo otuboiyo komian mo malumbito kona matean.

²⁰Usokokai doi mubonua, eh daku bangsa, maka potataapikene kopo tataapon. Pobasookonkai soisikeen sampe kabus ko TEMENENO nanggimalan.

²¹Ko TEMENENO bulus luwedoi nalipu dungolan doi surgaa sulano nahukume kobangkapi doi dunia sabab napo dosa.

²²Konapo mangakatean yanila moseseekene naikon tobukamo. Kobuta akimo naikon natombukiyo komian moinakate mate.