Read Banggai YESAYA 29 Bible Online

YESAYA 29 - Banggai bible

YESAYA 29

¹Silakamo kokota Yerusalem mosinombuikon Mian Bisa nabalabaan! Silakamokai Daud nakota basandungan! Posobiyomokai napaisosoboli kotaun-taun naliname-lamekonan.

²Bai ko Mian Bisa olubatene kobalaa doi kotadoo, tobikon komian nggimal tukon mangaduh. Sasaibino kokota pokakana kobalabaan momoono sau.

³Ko Mian Bisa lobosiyo tukon lubotiiyo mokopuunge doi potikunggon dokotadoo.

⁴Ko Yerusalem pokakanamo kokolu mokakaate nalengele koalalo doi buta lalomo, tukon koalalo kalaleengan luwedoi ambata lalomo.

⁵Bai sasaibino komian molulubaton domo lokisoo naikon yanila lapuso pokakana koambata kai sekam mbombuul mopuule. Tukon sosinggot tukon aki natinoon-toon.

⁶Ko TEMENENO Mobabasal Konakuasa naikon bebaskanggenemo dokotadoo luwedoi sokoi molokis tukon teali mobabasal. Yana naikon lubatene kosokoy polaing kobilat momakansang.

⁷Maka komian mo lulubaton sasaibino kona pasukan molubat lobosiyo ko Yerusalem, Mian Bisa nabalabaan kotano, sasaibino komo lubat tukon lobosiyo dokotadoo, naikon lapus buno monii doi popook.

⁸Kobangsa-bangsa mopototongi sulano nalobosiyo ko Yerusalem yanila naikon baino pokakana komian momalaal moolumenggene yana modaanoon mokaan, padahal nabangun yana tataap malaal, kai buno mian momolou moolumenggene yana momonginum paisu, bai nasosimbu kobulungo motuul tuuno.

⁹Banggadudulkai komasa-masaindingan tukon totutup komatano pokakana komian mopiit! Potealimokai pomalangu, bai bolikon pomonginuman anggur. Poambakonokai potodu-toduwokon, bai akikai pomonginum suka.

¹⁰ Yana tealikene komuyu popiit tukon pomoolo tombosookon. Yana tombukiyo sasaibino konabi matano tukon popokiyo sasaibino komian motoiyo kopokita duduso.

¹¹Sasamba kopokita alatino akimo pomangalatikene, pokakana kokitab mosinegel. Kalu dobukudoo binabakon doi meeng komian sulano nabacakanggene doi komuyu, yana naikon tongo bantile aki namoola, sabab dokitabpoo sinegelo.

¹²Kalu naikon binabakon doi mian mobuta huruf, yana naikon timbiliyo baikon yana aki natoiyo mobacayo.

¹³ Ko TEMENENO bantile, “Domian-mianoo tongo sosubai Yaku tukon nabantilan tolong, bai konoanoila odoon doiya-Ku. Konapo agama tongo manusia naatulan komo hinapal.

¹⁴ Tobikon doiya Yaku odinggalayo yanila tukon pongumbas mobadaang luunggon. Komian mopandoi naikon teali bonggu, tukon sasaibino konapo pandoiyan akiyono kogunano.”

¹⁵Silakamokai komian moseekene konatetel doi Temeneno! Yanila momokubai tindakan tukon aki napo biyok-biyok, tukon yanila anggene akiyokai komeeng komian komo kitayo kai motoiyo oilamo konapo linakukanggong.

¹⁶ Sasaibino kolangge yanila putar-putare. Indeekai komo lobian kona pentiingan, mian momokubai tobunan kai buta tobunan? Uga-ugaate komo kinubai yana bantile doi mokubaiyo, “Bolikon ikoo komo kubaiyaku”? Kai dolanggedoo mokinubai bantile doi mokubaiyodoo, “Ikoo akiyo komutotuuk”?

¹⁷Daano komeeng kososombot kona binantilan buno naiya, “Akimo namalumbit koidan kobokulung tabalimo buta kanggian, tukon kobuta kanggian naikon abalimo teali bokulung.”

¹⁸Doiya kotempono komian mobongol naikon moolamo nalengele kobantilan-bantilan moluwedoi meeng kokitab mobinacakon, tukon komian mopiit naikon moolamo namokita.

¹⁹Komian motalalais tukon moakiyo kona kaliangan naikon abali rasakanggene kotuboan momonondok Israel miano na Mian Bisa momoliyous mobeekene doiyanila.

²⁰Idoomokai kona kabusan komian molai-lainggene komian bailon tukon akiyenggene ko Mian Bisa. Ko Mian Bisa naikon akateyo kabus sasaibino komian mobaladosa,

²¹mian moiyase bafitanaa, mian moaki napataikene komian molokis nainukum, tukon komian mobabayo kosalita-salita mokala sulano komian mojujur naaki namalaat kaadilan.

²²Tobikon doiya ko TEMENENO, Israel miano na Mian Bisa mobebaskanggene Abraham, diabudodoo bantile, “Ikoo Daku bangsa, komuyu akimo potinotulai koidan tukon kodudusomu akimo nakokombol koidan sabab pomamaawan.

²³Sabab kalu komuyu kitayo kopo pau-pau Yaku mobeekonggonmuyu, maka naikon poakuiyo baikon Yakumokai ko Mian Bisa moliyous Israel miano na Mian Bisa. Komuyu naikon odotiiya-Kumo tukon matakutana-Kumo.

²⁴Komian molongas naikon inotunggul sulano namoola mangalati tukon komian mosidutu mondommuk yanila sanaang moinotunggul.”