Read Banggai YESAYA 3 Bible Online

YESAYA 3 - Banggai bible

YESAYA 3

¹Kona tutuuwan, ko TEMENENO Mobabasal Konakuasa naikon alayo luwedoi Yerusalem tukon doi Yehuda sasaibino kokinaan tukon kolangge moininum molapamo yanila sadiakene. Tukon sasaibino komian yanila mobalaanggene:

²sasaibino kotalenga tukon suludadu, hakim, nabi, mian modaano kona motoiyan tukon pongotunggul,

³suludadu kapalano, paupaulakai tukon tusambu-sambu negara, modaano kona motoiyan molokis tukon komo toiyo komotoiyan patanggal.

⁴Ko TEMENENO naikon oduduke kotabo-tabo nateali katuaiyo korayat, tukon yanila naikon maparenta luwe napo mongiasan.

⁵Komian naikon polailainggon. Kotabo-tabo pandangentenge koorang tua, tukon komian mopoipoisik lailainggene komian mobabasal.

⁶Doi tempodoo komian naikon tudoyo komeeng koutuso napau maka nabantile doiyana, “Tongo ikoo komo daano komu pakean mopantas; tobikon doiya tealimo mai katua doi loonu nia momoono susaan.”

⁷Bai yana timbiliyo, “Yaku bolikon dukun! Tukon koidan akiyo daku kinaan tukon pakean. Inai posumboliiyaku mokatuaiyo kobangsa!”

⁸Tutuu, ko Yerusalem tuwongo! Ko Yehuda tabaako! Sabab konapo bantilan tukon napo kokubai lawane ko TEMENENO tukon Kona kakuasaan.

⁹Konapo kokubai mosombong okitakene konapo kulokisan. Terus terang konapo dosa pokakana ko Sodom doi loolukoo. Yanilakai silakamo! Yanila komo lubatene kosilakaan doi dilinoila.

¹⁰Ko TEMENENO bantile, “Pelenggenemokai doi mian motaat doiya-Ku baikon yanila sanaango tukon salamat, yanila rasakanggene konapo limang hasilo.

¹¹Bai komian molokis toupiyo kosilakaan! Konapo kinubaiyan pokakana konapo kubaiyano lokis komian bailon.

¹²Komian mobiasa bangakakon tukon momakaan doy yanila lailainggene Dakuumat. Sasaibino komo katuaiyo Dakuumat yanila akakene sampe akimo napo toiyo konapo loloon linoloy.”

¹³Ko TEMENENO batotobomo sulano nagugate tukon naadiliyo Kona umat.

¹⁴Ko TEMENENO kubaiyo kotindakan sulano naadiliyo sasaibino komo katuaiyo Kona umat. Naiyamokai ko TEMENENO natuduhan motuuk doi yanila: “Komuyumokai komo ndikuke koasi anggur hasil-hasilo; kopo bonua moono tukon lolonggu komuyu molambase luwedoi mian motalalais.

¹⁵Bulaando komuyu molailainggene Dakuumat tukon komian motalalais komuyu akakene? Yaku, TEMENENO Moinakatandak Tuuno tukon Mobabasal Konakuasa lapamo bantile.”

¹⁶Ko TEMENENO bantile, “Sombong tuuno koboiboine doi Yerusalem! Yanila todudul bagaya, kilayo babonggoti tukon napo ampakon sombong. Konapo lenggang tongo kinukinubai, tukon palandiling koalalo konapo kulaluk doi ainoila.

¹⁷Bai Yaku naikon hukume yanila; koolunoila moono tukon takatol tobikon doiya sio nadinalulu.”

¹⁸Naikon kalu laate kotempono ko TEMENENO alayo sasaibino koboiboine doi Yerusalem nahiasan-hiasan yanila mobabanggaakene: doiyamo pokoot olunoila, kulaluk doi ainoila, inoon,

¹⁹kulaluk doi limanoila,

²⁰toik potutup dudusoila, toik potutup olunoila, ajimat-ajimat doi limanoila tukon doi owakoila,

²¹sousolut tukon anting-anting doi ngooloila,

²²pakean momono-monondok, dompet,

²³kalambi momanipi, pakean lenan, pokoot bulungoila tukon potombuki olunoila mobulusan.

²⁴Budodoiya konapo pinake minyak-minyak mobabangi, bai nalaate kotempono koboonoila teali boowan. Konapo poboboi owakoila moalus sinoboli tukon putal mokasar. Koolunoila kobuuko momonondok naikon dinalulu. Konapo pakean momono-monondok naikon sinoboli tukon rombengan. Budodoiya yanila tambongan; bai naikon kondodoongoila teali lokis sabab binee cap.

²⁵Komala-malane, koidan mobukuan, naikon mate doi polobosian lalomo.

²⁶Doi kota tataapono mobabasal komian naikon susa tukon kokiil, tukon dokotadoo susuungo pokakana koboiboine molinalau moosulang doi buta.