Read Banggai YESAYA 30 Bible Online

YESAYA 30 - Banggai bible

YESAYA 30

¹Ko TEMENENO bantile, “Silakamokai sasaibino kokatua doi Yehuda, sabab yanila tongo nggimolii Yaku. Yanila tongo loingiyo kotetel mobolikon Kutetel. Yanila tanda tanganiyo koperjanjian mopototonggulung Daku mongiasan. Jadi pololokonokai potimbuni konapo dosa.

²Yanila taus doi Mesir aki napo palamisi doiyaku. Yanila soop doi Mesir tukon yanila moinikene kotomundo Mesir natulungan.

³Bai dotomundodoo tongo kubaiyo yanila susa, tukon kosoopan yanila momoinikene doi Mesir naikon aki nateali yanila kubaiyo soopan.

⁴Maukai ko Yehuda miano nabito-bito napolongo doi kota-kota Zoan tukon Hanes doi Mesir,

⁵sasaibino komian naikon teali mamaa sabab lapamo yanila banggaakene kobangsa moakiyo kogunano doi yanila. Konapo linaat bolikon kauntungan kai tulungan, bai tongo pototulai.”

⁶Bunomokai naiya ko Temeneno nateteba tentang koiyayon-iyayon modungoliyo kobuta lalom, “Sasaibino kobito-bito yanila mangalakit keledai tukon napo unta maka napo hadia-hadia, maka napo loloiyo kolipu mobadaang kosilakaan singa modungoliyo, binda moupason tukon naga modaano kokapilo. Donapo hadia-hadiadoo yanila sosubakene doi meeng kobangsa moaki namoola tulungiyo yanila.

⁷Ko Mesir nabantuan tongo palasuma. Tobikon doiya Yaku beena totumai, ‘Naga moaki nasilakaiyo komian’.”

⁸Ko Mian Bisa sumboliiyaku motulise konaumat nakulokisan doi meeng kokitab lalomo salaku poingotii motuuk sodutu-posidutukon.

⁹Sabab, doi yaniladoo meeng kobangsa moiyase tumbak-tumbak doi Mian Bisa, yase bakala-kala tukon aki napo yase mondongolii otunggul moluwedoi TEMENENO.

¹⁰Yanila bantile doi sasaibino konabii, “Potutupe kobabamuyu! Inai pomabantilan-bantilan mokakana doi kami, bai tongo oila komai iniyase linongol doiyamo kopo binantil. Sobiiyomo mai batingaakon.

¹¹Posaakonokai, tukon pomangala mo loloon bailonggon. Inai poganggukami tukon Israel miano na Mian Bisa moliyous.”

¹²Tobikon doiya ko Israel miano na Mian Bisa moliyous yana bantile buno naiya, “Komuyu tolake dakubantilan tukon komuyu moinikene kopo balai-lainggonan tukon pobatipuan.

¹³Tobikon doiya komuyu malaat sala. Komuyu pokakanamo kosasanggal betoon motatandak momapasa tuwong luwedoi babo polong doi bilit; jadi bunomo lakon komuyutongo sosinggot komuyu tolubango.

¹⁴Komuyu tobisili pokakana kotobunan buta momapasa tebeason, jadi dobisilodoo akiyono komo moola pinake motuuk mangalaan bara doi poolu kai mopinake teali mataukan paisu doi baak lalomo.”

¹⁵Ko TEMENENO Moinakatandak tuuno, Israel miano na Mian Bisa moliyous, Yana bantile doi Naumat, “Pobadodoloono tukon potataap tanaang, tukon kalu komuyu ndongoliiyaku Yaku salamatene komuyu. Poanggaakukai tukon noamuyu mosanaang, maka kutealikene komuyu mian mobukuan.” Bai aki poiyase!

¹⁶Bai tongo komuyu mokubai tetel sulano podambasene kobutomuyu luwedoi pomusuh-musuh tukon komuyu molokiti adalan momodoling tuuno. Monondoko! Takainomo siokai poobulen. Kopo popikikon dopo adalanoo momodoling tuuno kona obulenan, padahal domo lelenggenedoo komuyu konapo adalan lobiyoniiyo kona modolingan dopo adalanoo.

¹⁷Sololoon komian naikon komo dampas tongo meeng konapo musuh moancame yanila, tukon kalu lima komian moancame komuyu pasti sasaibinggomiyu dambas. Luwedoi mupasukan baino meeng kobandera sudongo mototinggal doi bunggul bunggulo bunggono.

¹⁸Maukai nabuno doiya, ko TEMENENO baimo totiiliyo kotempono kona okitakangganano Kona maasi doi komuyu. Yana siap mobasadia sulano namamaasikene komuyu. Sabab ko TEMENENO doiyamo ko Mian Bisa molakukanggene sasaibino kolangge tukon tapaat. Kinatauwanai komian momoini doiya-Na.

¹⁹Eh komuyu modungol doi Yerusalem, akimo naikon pokokiil momeenggon. Ko TEMENENO daano kona maasi, tukon mosobit timbili komuyu kalu komuyu uwang makabi tulung doiya-Na.

²⁰Ko TEMENENO beenggumuyu loonu percobaan momotoong motuuk naotunggalano komuyu. Bai dia budodoo Yana susuungo lolainge komuyu tobikon doiya komuyu toupiyo Kona daanoan doi komuyu.

²¹Bai kalu komuyu isa luwedoi loloon, doi tonggulumuyu naikon longol koalalo mobantile, “Naiyamokai kololoono; loolaingemokai Naloloonia.”

²²Komu pilogot timba-timbalango molinapisi suasa tukon mosoni sio posakukene pokakana kolembut mosinakukon, maka kubantile, “Poambakonokai luwedoi yaku!”

²³Kalu komuyu motipason kolibuang, ko TEMENENO lubatene koudan sulano dolibuangoo natubo tukon ko hasilo nabadaang tuuno tuuk napo kaanan.

²⁴Kosapi langgilo tukon kokeledai mopinake pabajak mukombung naikon bulung momonondok tuuno kona kinaan mosinadiakono tuuk doipo sapidoo langgilo tukon dokeledaidoo pabajak mukombung.

²⁵Doi oloyo komu musuh-musuh nabenteng-benteng nakinopuungan tukon nainakatean komiano, sasamba kobunggul tukon kobunggul bunggulo naikon tobuatene kopaisu batango pauno.

²⁶Kobituwon naikon lalaangan buno oloyo matano pitu luunggon kona taraangan luwedoi nabiasaan, pokakana kona taraangan pitu kooloyo napinototongikon teali meeng. Sasaibino doiya teali doi tempo ko TEMENENO napakuliano tukon natangalingganano Konaumat napakol-pakol tinanggung.

²⁷Ko TEMENENO Nakakuasaan tukon Kona babasalan tokita luwedoi naodoonan. Kobilat tukon tibolungo doiya okitakene Kona liitan. Yana posalitai tukon yanila, tukon Kona bantilan-bantilan moonas pokakana kobilat.

²⁸Yana parentayo kombombuul Naloolukoniyo pokakana kolomba mopolong doi mian bulungo kopaisu molaline sasaibino kolangge-langge. Yana akateyo kabus sasaibino kobangsa-bangsa tumbuno, tukon Yana akiyenggene konapo tetel molokis.

²⁹Bai komuyu, ko Mian Bisa Naumat, naikon komuyu laba-laba tukon manyanyi pokakana doi tempo popook nalinamekonan koagama lamekanano. Komuyu laba-laba pokakana komian moamba-ambakon tukon linolaing musiik motaus doi TEMENENO Na Bonua, Israel miano napembela.

³⁰Ko TEMENENO naikon olongolikene koalalo mobabasal, tukon sasamba komian naikon rasakanggene Konakuasa mohebat tuuno. Kona liitan naikon olubatene kobilat mosuayo mokopul komian, koudan mobabasal tuuno, udan batu tukon sokoy.

³¹Ko Asyur miano naikon nggabut kalu yanila lengelemo ko TEMENENO alalo tukon kalu yanila rasakanggenemo Kona hukuman momotoong.

³²Daanoon doi napo rasakangganano kona pukulan-pukulan, ko TEMENENO Naumat basa-basanaang tukon musik mopake bobolon tukon kasapi. Mian Bisa susuungo komo polobosi lawane ko Asyur miano.

³³Salataa doi looluk lapamo sinadiakon kona sinuaan kotomundo Asyur. Dotampatoo atean tukon bebelan inontoki tukon kayung mosinua posusun-susuni. TEMENENO naikon komo suayo tukon tongo puule tukon naansaang pokakana kopaisu batango momoono belerang.