Read Banggai YESAYA 33 Bible Online

YESAYA 33 - Banggai bible

YESAYA 33

¹Silakamokai konda musuh-musuh! Yanilakai pondikuk maukai naaki napo ndinikuk, tukon yanila bakulokisanggono, maukai naaki napo kinulokisanggon. Bai salataa yanila pondikuk tukon bakulokisanggono, yanilamokai komo teali korban doi pondikukan tukon doi bakulokisanggonan.

²Oh TEMENENO, seseanggamikai. Ikoomokai komai moinian. Lindungikamikai sasamba kooloyo tukon salamatanggamikai doi tempo susaan.

³Kalukai Ikoo bangun tukon lengele koalalo-Mu mobabasal, pasti kobangsa-bangsa naikon bulen tukon topobandakon.

⁴Pokakana kobetek tambuno badaang komian molubat tukon lobosio maka napo ndikuke konapo buat.

⁵Ko TEMENENO babasal Konakuasa; Yana kuasaiyo sasaibino kolangge modaano doi dunia nia. Yana ekenggele kohukum tukon kokaadilan doi Yerusalem

⁶tukon beena kaamanan doi Naumat. Kobuat mosalamatene yanila doiyamo pandoiyan tukon pangatahuan maka odotiiyano ko TEMENENO.

⁷Komian motambongan barani nggeleamon makabi tulung; sasaibino kobito-bito mousahakanggene kopodamean yanila kokiil susa.

⁸Kololoon mo babasal silaka tuuno tobikon doiya teali kiis; akiyono komian mololoiyo. Yanila akiyenggenemo koperjanjian ko pomeenggonan yanila tolakemo. Akiyono konapo pinusinggon.

⁹Kotano tininggal teali kiis. Kobokulung-bokulung doi Libanon teali susa, tukon ko Saron Pepelako tealimo buno padang mokindolon. Doi Basan tukon doi Karmel Bunggulo kokayung-kayung loono kabus matanas.

¹⁰Ko TEMENENO bantile doi bangsadoo, “Diabudodoo Yaku naikon abalimo tukon yaku mokubaimo tindakan mookitakene Daku kakuasaan.

¹¹Komu tetel tongo sia-sia, tukon sasaibino kopo linakukanggon akiyo kotakoso. Komunggimalan pokakana kobilat mosuayo kobutomu.

¹²Komuyu pokakana kobatu nggalanggang mosinua tabali kapur; pokakana koanggal mosoniton tukon linokomi maka tinape kokayungo maka nasinuakon.

¹³Tukon koidan sasaibino komian moloolani kai moodoon naikon yanila ndongoliiyo tentang Daku kokubai tukon yanila akuiyo Daku bukuanan.”

¹⁴Komian doi Sion yanila lolondong sabab napo matakutan. Konapo bantilano, “Ko Mian Bisa nakaputusan pokakana kobilat mokolot-kolot polong sidutu-posidutukon. Kai daano komian momoola bataanggon doi bilatoo lalomo mosuayo komian?”

¹⁵Moola pobataanggon kalu komuyu mabantil tukon mokubai kokubai momonondok. Inai pokubaiyo mangambalan komian motalalais, tukon inai momantalima doy sogok. Inai mopolaing komian mobatetel mangakate kai mokubai langge molokis bailonggon.

¹⁶Kalu buno doiya komuyu naikon linindungi tukon aman, pokakana komuyu modaano doi benteng lalomo momoonggol. Kokinaan tukon langge-langge moininum tasadiakono doi komuyu.

¹⁷Naikon nalaate kotempono komuyu kitayo komeeng kotomundo momaparenta doi namonondokan luwedoi tano motopopong doi sasaibino kolipu.

¹⁸Kopo matakutan doi loolukoo motuuk doi patagi lulu, pamarenta tukon pangawas molulubaton doiya baimo teali tondoon tolong.

¹⁹Akimo pokitayo koidan komian molulubaton molokis konakalakuan mobasalita tukon silingan moaki poalatiyo.

²⁰Pombalengekai kokota Sion, tampat nda lame-lamekanano koagama lameano. Pombalengekai ko Yerusalem! Bukan maen konaamanan dotampatoo tukon monondok nadinungoli, pokakana kosandung moaki nabiniyol-biyol, kopapatoko aki nakinibut-kubut tukon koaloso aki nabontol-bontol.

²¹Ko TEMENENO okitakene konababasalan doi kita. Kita naikon tubo doi paisu batango mobebelan, komusuh nakapal aki namoola tolobutiyo.

²²Sasaibino konapo alat polobosian modaano doi kapal akiyo kotakoso; konapo kadut aki napo labute! Sasaibino kosuludadu nabuat kita naikon rampase, tukon koanggano badaang tuuno, tobikon doiya maukai mian mo lemat bai malaat obos. Sabab doiya ko TEMENENO teali nda tomundo: Iyanamo komo maparentah, keenggele kohukum tukon salamatene kita luwedoi ndamusuh.

²⁴Akiyokai komeeng komian doi nda tano naikon komo mongoluu sabab masakit, tukon yana ompuniyo sasaibino kodosa.