Read Banggai YESAYA 34 Bible Online

YESAYA 34 - Banggai bible

YESAYA 34

¹Eh kobangsa-bangsa, pomaimo nda pototongi tukon pondongoliiyo. Naikon posaapon kodunia tukon sasaibino komo tubo doi lalomo yanila lubat tukon ndongoliiyo.

²Ko TEMENENO nggimoliiyo sasaibino kobangsa tukon sasaibino konapo suludadu. Ko TEMENENO naikon hukume tukon akateyo kabus yanila.

³Kopai bajanoila aki nakinibul, bai tongo binatadikon nateali boowan tukon daano koboono. Kobunggul-bunggul teali memela sabab linombai saunoila.

⁴ Kooloyo matano, bituwon tukon bituwon-bituwon pauno naikon manas. Kotimbu naikon linulun pokakana kokalataas. Kobituwon-bituwon pauno naikon topudas pokakana kokayung loono motupudas.

⁵ Ko TEMENENO sadiayomo konasabel doi surgaa, tukon diabudodoo dosabeloo tepakemo kobangsa Edom molapamo tinuwongikon kohukuman tukon naikon inakate kabus.

⁶Ko TEMENENO nasabel moono sau tukon moono inakoila pokakana koiyayon mosinosubakon sauno tukon inakko. Sabab ko TEMENENO sadiayomo kososubakon doi Bazra, tukon kubaiyo komokolotan iyayon doi tano Edom.

⁷Komian naikon mate pokakana kosapi mombosolo tukon saapi momongula. Konapo tano naikon memela tukon sau tukon moono inak.

⁸Tobikon doiya ko TEMENENO nabelayo ko Sion tukon balase kona liitan doi Namusuh-musuh.

⁹Ko Edom pai-paisunobatango naikon tobolii pokakana koteer, tukon kobutano teali bolerang. Sasaibino kotano kait bunoteer.

¹⁰ Dobilatoo aki naposo mau popook tukon oloyo, tukon kotibolungo kalikobungan luwedoi yana sidutu-posidutukon. Butadoo naikon tininggalo tukon tealimo kindolon paisosoboli koturunan, tukon akiyokai komeeng komian naikon mololoiyo dotanodoo.

¹¹Baimo tomisi Undan tukon Landak komo dungoliyo, kotomisi kolu tukon tomisi gagak naikon dungol indaa. Ko TEMENENO naikon tealikene dotanodoo nggabut, tukon akiyo kopodungolino pokakana moakiyoon natinealikon kotimbu tukon dunia.

¹²Akiyo kotomundo momaparenta doi tanodoo, tukon sasaibino konapoo katua lapuso.

¹³Kobenteng-bentengo tukon kokota-kotano mopinagar kayung molinapis buta naikon tinuboimo laing mosoniton tukon bulung, tukon dinungoli asu lobo maka tomisi unta.

¹⁴Koiyayon mobarani dungol dombaa dombulo doi lalomo; kokolu-kolu potimban-timban, tukon kokolu popook mounggolii mooloan.

¹⁵Doi tampatoo kobinda mokubai telea namanggalauwan, monggoloy tukon napialaano konapu-pau. Kotomisi alap-alap pototongi memeeng kopasang.

¹⁶Pounggoliiyokai tukon pobacayokai doi TEMENENO na Kitab lalomo! Akiyokai komeeng komahluk naikon komo lapus kai komo akiyo konapasangan. Sabab bunomokai doiya ko TEMENENO naparentah, tukon Iyanamokai komo pototongikene yanila.

¹⁷TEMENENOkai komo obosikene yanila dotanodoo tukon suwe-suwele talimayo konaobos. Idoo yanila dungol sidutu-posidutukon, tukon butadoo tealimo napo buta suwe-suwele polong doi napaisobolian konapo katurunan.