Read Banggai YESAYA 36 Bible Online

YESAYA 36 - Banggai bible

YESAYA 36

¹Doi taun kosongulono sangkap Hizkia tomundo Yehuda nabasambuan, kokota-kota Yehuda modaano kobentengo linubotii tukon linobosi tukon Sanherib, tomundo Asyur lungguiyomo.

²Sambuno lapa doiya yana utuse kona suludadu kapalano motatandak kona pangkat luwedoi Lakhis taus doi Yerusalem tukon nasuludadu mobadaang sulano natuntute Tomundo Hizkia namangaku kalah. Salataa yanila polong doi kotadoo maka yanila mangalamo tampat doi kombung mosinombuikon Kombung Penatu, loolani kosausalul mo lomba luwedoi kolam tambikon doi babo.

³Daano Hizkia napagauwe tolu komo lubat pososunggene doi tomundo Asyur nasuludadu kapalano motatandako konapangkat. Dopagauwedoo motolu kosambunoila doiyamo Elyakim Hizkia napau konatugas kapalaiyo korumah tangga doi tomundo nakamali. Sebna konatugas dulutulis negara, tukon Yoah Asaf napau, dulutulis doi kamali.

⁴Doi tomundo Asyur nasuludadu kapalano bantil doi yanila, “Polenggenekai doi Hizkia natom undo nia Asyur nabantilan, ‘Bulaando ikoo morasaiyo kodilimu mobukuan?

⁵Ikoo anggene tongo bantilan tolong moola nasoboliyo kosuludadu nasiasat tukon nabukuanan? Indeekai komu binalaanggon sampe ikoo barani molawane ko Asyur?

⁶ Ikoo takainomo komo moinikene ko Mesir nasuludadu, bai doiya tongo buno pokakana komian momapake tongkat moluwedoi alang-alang batango; — tukon naapa dotongkatoo moloto naikon taduke kolimamu. Bunomokai doiya kotomundo Mesir nakokubai doi sasamba komian momoini doiyana.’ ”

⁷Boobus koidan suludadu Asyur kapalano doo bantil, “Kai ugaatene komuyu bantile baikon komuyu moini doi TEMENENOmu Mian Bisa? Doi tempo Hizkia mamparentakene sulano Yehuda palentayo tukon Yerusalem miano tongo bakaleda doi balabaan salaano doi Yerusalem, bolikon kai Naminanasdoo balabaang tukon tampat-tampat sosubaiyano ko TEMENENO?

⁸Diabudodoo yaku luwedoi tomundo Asyur sambuno barani mopotaani baikon kalu komuyu binee lua kololoono kokuda, pasti akiyo kopo mian mobuno doiya kona badaangan malokitiyo.

⁹Akikai pomoola lungguiyo kosuludadu Asyur kapalano mau natongo pepende kosambu. Maukai ko Mesir namakapatu bantuan kareta polobosian tukon pasukan momapake adalan!

¹⁰Komuyu anggene kami lubat molobosiyo kopo tanodoo akiyo ko TEMENENO nabantuan doi kami? TEMENENOkai komo sumboliikami molubat tukon lobosiyo sampe manas kabus.”

¹¹Maka Elyakim, Sebna tukon Yoah yanila bantile doi tomundo Asyuroo nasuludadu kapalano, “Tuan maukai mubasilingan tukon silingan Aram, kamikai mangalatikene. Inai mobasilingan tukon silingan Ibrani, sabab kalu ikoo basilingan tukon silingan Ibrani korayat modaano doi pagaroo mobinetoon bunggono yanila moola alatiyo.”

¹²Dotomundodoo Asyur nasuludadu kapalano timbiliyo yanila, “Sulano potoiyo aki natongo komuyu maka potomundo komo pinailukon nabantilan nia bai polong doi sasaibino korayat? Jadi yaku koidan sio kubasilingan doi sasaibino korayat modaano doi pagaroo mobinetoo bunggono sulano napotoiyo, tukon komuyu naikon singgat-singgat mokaane kopo tai susuumuyu.”

¹³Doibundu koidan dosuludadudoo kapalano yana kokondongo maka nanggeleamon tukon basilingan silingan Ibrani, “Polengelekai oilamo kotomundo Asyur nabinantil,

¹⁴‘Inai poiyase Hizkia natipukomuyu! Yana aki namoola salamatene komuyu!

¹⁵Inai poiyase lengele kona bujukan sulano pomoini doi TEMENENO. Inai poanggene ko TEMENENO naikon salamatonggumuyu kai pantane ko suludadu Asyur molambase kopokota.

¹⁶Inai polengele Hizkia! Yaku tomundo Asyur nabinantil sulano komuyu kaluar doi kota tukon namangaku kalah. Kopoo kinaan naikon anggur saono doi pokombung, tukon komuyu rasakanggene kopo arah saono, tukon kopo ininum paisu moluwedoi bubung,

¹⁷sampe polong doi kupindaano komuyu doi meeng kotano moadukon pokakana kopo tano. Inai nadaano kokombung anggur kohasilo tuuk doi komuyu, tukon daano kogandum kombungo mohasilkanggene kotarigu teali pokinaan.

¹⁸Inai polengele Hizkia! Yana tongo tipuwo komuyu tukon bantile baikon ko TEMENENO naikon salamatene komuyu. Daanokai komian molulubaton nadewa momoola salamatene kotano moluwedoi kukakuasaan?

¹⁹Inaandokai ko Hamat tukon Arpat nadewa-dewa? Inaadokai ko Sofarwaim nadewa-dewa?

²⁰Daanokai komo lubat mosalamatene ko Samaria? Indeekai kodewano komo moola olupute konatano moluwedoi kukakuasaan? Aki namungkin ko TEMENENO mosalamatene ko Yerusalem!’ ”

²¹Salataa yanila lengele doiya, ko Yerusalem tumbuno aki napo motimbili, sabab Tomundo Hizkia lapamo parentayo yanila sulano naaki napo motimbili.

²²Sambuno lapa doiya Elyakim, Sebna tukon Yoah yanila siake konapo pakean salaku paloosan susaan, salataa lapa koidan yanila tauso molapurkanggene doi tomundo oila komo lapamo do Asyuroo nasuludadu kapalano nabinantil.