Read Banggai YESAYA 37 Bible Online

YESAYA 37 - Banggai bible

YESAYA 37

¹Salataa Tomundo Hizkia lengele dolapuranoo moluwedoi mianoo motolu, yana siakemo konapakean tukon mapakemo toik karung salaku paloosan susaan, maka naampakon doi TEMENENO Na Bonua.

²Doibundu yana utuse Elyakim domo kapalaiyodoo kobatomundoan, Sebna dulutulis negara tukon sasaibino koimam modaano konatugas sulano napo taus pososuung Nabi Yesaya, Amos napau. Mau yanilakai mapake toik karung.

³Naiyamokai tomundo Hizkia nateteba yanila mopelenggene doi Yesaya, “Naiya oloyo nia daano kosusaan; kita hinukum tukon tinotulai. Kita buno boine moadukono mosuung, bai akimo nabukuan.

⁴Tomundo Asyur utusemo kona suludadu kapalano motatandakoo kona pangkat sulano natotulaiyo ko Mian Bisa motubo. Indee komo toiyo ko TEMENENO Mian Bisa uga-ugaate lengelemo dopototulaidoo tukon doi yaniladoo mobantile naikon yana hukumemo! Tobikon doiya sambeangokai doi Mian Bisa tuuk doi nda mian modaanoon motubo.”

⁵Salataa talimayo dotetebadoo moluwedoi Tomundo Hizkia,

⁶Yesaya sumboliiyomo sasaibino doutusanoo sulano napo pelenggene kona potimbili nia, “Ko TEMENENO bantilemo, tuan inai momatakutene tentang doi tomundo Asyur naata-ata nabinantil sabab ko TEMENENO tataap aki nasobiiyo kita.

⁷Ko TEMENENO naikon kubaiyo tomundo Asyur tongo palatikanggene komeeng kobulita mbombuul sampe yana abali doi natano susuungo tukon indaa yana naikon inakatemo.”

⁸Dosuludadudoo kapalano motatandak konapangkat malaat bilita baikon kona tomundo otinggalemo kokota Lakhis tukon daano mopolobosi lawane kokota Libna. Aki naodoon luwe idoo. Doibundu yana tauso indaa sulano napososuung kona tomundo.

⁹Ko tomundo Asyur mantalimamo bulita baikon ko Mesir napasukan Tirhaka komo katuaiyo luwedoi Sudan naikon lubato mosoraange yanila. Tobikon doiya, tomundo Asyur makapatu surat doi Hizkia,

¹⁰tomundo Yehuda. Dosuratoo nabantilano, “Inai mototipu luwedoi Mian Bisa naperjanjian ikoo mobalaanggene baikon ikoo aki kulungguikon.

¹¹Ikoo lengelemo sasaibino kokota-kota ko Asyur tomundo-tomnudono mosoraange inakamanas kabus. Inai mosangkayo ikoo momoola luput.

¹²Doi tempo dakumbumbu namanasano kabus kokota Gosan, Haran tukon Rezef, tukon koidan yanila akateyo ko Eden miano modungol doi Telasar, akiyokai komeeng donapo dewa-dewadoo momoola salamatene yanila.

¹³Inaandokai kotomundo-tomundo doi kota Hamat, Arpad, Separwaim, Hena tukon Iwa?”

¹⁴Salataa Hizkia talimayo dosuratoo moluwedoi sasaibino doutusanoo maka nabacayo. Doibundu yana tauso doi TEMENENO Na Bonua maka nabeleatene dosuratoo doi TEMENENO salaano,

¹⁵maka yana sambeang, kona bantilano,

¹⁶ “Ko TEMENENO Mobabasal Konakuasa, Israel miano na Mian Bisa, mo osulang doi kerub bunggono, tongo ikoomo ko Mian Bisa mokuasaiyo sasaibino kobatomundoan doi dunia bunggono. Ikoomokai komo pasitakayo kotimbu tukon dunia.

¹⁷TEMENENO palatikanggenekai oilamo komo daanoon moteali budodoiya tukon kami. Lengelekai sasaibino Sanherib napototulai motuuk doi-Koo, Mian Bisa motubo.

¹⁸Kami sasaibino toiyo, oh TEMENENO, baikon kotomundo-tomundo Asyur badaango konapo bangsa-bangsa inakate kabus tukon yanila manase kabus konapo tano-tano.

¹⁹Konapo dewa-dewa sinua tukon minanas kabus, sabab konapo dewa-dewa akiyokai kona kuasa. Donapo dewadoo tongokai timbalang moluwedoi kayung tukon batu yanila mokubaiyo.

²⁰Oh, TEMENENO komai Mian Bisa, olupute kami luwedoi Asyur miano, sulano sasaibino kobangsa doi dunia natoiyo baikon tongo Ikoo ko TEMENENO.”

²¹Doibundu koidan Yesaya makapatu teteba doi Tomundo Hizkia salaku napotimbili luwedoi tomundo nasambeang.

²²Ko TEMENENO nabantilano, “Kokota Yerusalem kokumbite tukon piadayo ikoo, Sanherib!

²³Ikookai toiyo indee domu tinotosiidoo tukon domu tinotulaidoo? Yakumo, ko Israel miano na Mian Bisa, Mian Bisa Momoliyous.

²⁴Ikoo makapatu bito-bito sulano nasombong-sombong, sabab balaanggene kona badaangan komu kereta polobosi, tukon ikoo taklukanggenemo kobunggul-bunggul motatandak doi Libanon. Ikoo babanggaal sabab lapamo mutapeyo konapo cemara batango motatandak tukon motambongan tuuno, tukon ikoo lapamo dadange kobokulung-bokulung mobadaang tuuno kokayungo.

²⁵Ikoo koidan babanggaal sabab ikoo makalimo bubung tukon monginum paisu doi mian bailon nalipu, tukon baikon sasaibino komu suludadu pipiike ko Nil Paisunobatango sampe teali motuul.

²⁶Baanggokai akiyoon mulengele doiya yaku lapamo batetelikene salataa doilooluk? Tukon diabudodoo yaku laksanakanggenemo. Yakumokai komo beemu kuasa sulano mumanase kabus kokota-kota mopinagar kayung molinapis buta.

²⁷Komian mondoong indaa yanila pusingo; yanila ngginggim tukon matakuto. Yanila pokakanamo kobulung doi padang kai buno bulung motubo doi ato bunggono, motuul kalu puulo kombombuul tolopot.

²⁸Bai Yaku toiyo sasaibino tentang kodilimu. Yaku toiyo oilamo komu linakukanggon tukon inaando komu tausan. Yaku toiyo baikon ikoo nggimolii Yaku tuuno,

²⁹tukon Yaku lapamo ndongoliiyo tentang komu nggimalan tukon komu sombongan. Diabudodoo Yaku kaite tukon pakait kosoongamu tukon Yaku tambange kobabamu, sulano kububuton mule lolo doi loloon ikoo mololoiyo salataa doi mulubatan.”

³⁰Yesaya kapatuwe koidan nateteba nia doi tomundo Hizkia, “Naiyamokai komo teali paloosan doikoo. Nataun nia tukon taun doi salaando komian naikon makaan gandum motongo tubo susuungo. Bai kalu lapamo doiya yanila moolamo masakakon gandum tukon anggur tukon yanila rasaiyomo naikon kohasilo.

³¹Ko Yehuda miano modaanoon motubo naikon sanaango pokakana kotanaman koalono moatean tuuno tukon badaang kosaono.

³²Doi Yerusalem tukon doi Sion bunggulo bungkono naikon daano komian mosalamat, sabab ko TEMENENO Mobabasal Konakuasa tantukenemo baikon dolanggedoo naikon teali.

³³Naiyamokai doi tomundo Asyuroo nabinantil: ‘Yana aki naikon nausokiyo ko Yerusalem kai motembakene kona panah doi kotadoo. Kosuludadu-suludadu modaano kona sinapan aki naloolaniyo dokotadoo, tukon doi napotikunggonan aki nabinangun kopoppot musuh naloloon.

³⁴Kotomundo Asyur naikon abalimo lolo doi loloon yana mololoiyo salataa nalubatan, tukon aki nausokiyo dokotadoo. Yakumo, ko TEMENENO, lapamo bantile.

³⁵Kokota Yerusalem Yaku belayo tukon lindungiyo tuuk doi Kuinodotiian tukon tuuk doi Kuperjanjian tukon Daud Daku peleleanidoo.’ ”

³⁶Doi popookoo koidan lubat ko TEMENENO namalaekat doi Asyur miano nabasandungan tukon mangakate 185.000 kosuludadu. Modoakon dowa-dowa kopai bajan-bajano sasabulo.

³⁷Doibundu Sanherib, tomundo Asyur, yana unduro tukon abalimo doi Ninewe.

³⁸Daano kooloyo meeng, doi tempo nabakaledaan doi Pilogot Nisrokh bonuano, Adramelekh tabase mate yana tukon Sarezer namala-malane. Salataa lapa doiya yanila dampas doi Ararat. Doibundu komo soboliyo yana doiyamo namalane Esarhadon komo teali tomundo.