Read Banggai YESAYA 38 Bible Online

YESAYA 38 - Banggai bible

YESAYA 38

¹Doiya kosinggato Hizkia masakit tukon adukono mate. Nabi Yesaya Amos napau, lubotiiyo yana tukon bantile, “Ko TEMENENO bateteba sulano Tuan naalapayo sasaibino kourusan, sabab Tuan nasesel aki naikon natangalin. Akimo namalumbit Tuan naikon matemo.”

²Tomundo Hizkia bapaloson doi sasanggal betoon, maka nasambeang,

³“Oh TEMENENO, nonookakukai yaku nia lapamo kakaate molimange komu limang tukon tootubo konoanggu. Sidutu kukakaate motulutiyo komu mongiasan.” Salataa lapa mosambeang Hizkia kokiilo tukon susah.

⁴Salataa Yesaya taus, ko TEMENENO sumboliiyo yana

⁵naabali doi Hizkia tukon napelenggene nateteba nia, “Yakumo ko TEMENENO, mumbumbu Daud na Mian Bisa sinosubai, lapamo lengele komu sambeang tukon kitayomo komatamu paisuno. Yaku suungiyo komuumur songulo lima kotaun koidan.

⁶Ikoo tukon kokota Yerusalem naikon yaku olupute luwedoi tomundo Asyur. Naiya kota nia tataap yaku lindungiyo.” Maka Yesaya sumboliiyo komian molesese koarah saono tukon soutikene doi Hizkia nabisul sulano natangalin. Doibundu koidan Hizkia mansadai, “Oilakai kopaloosano baikon ko TEMENENO momoola aline daku sesel tukon moolamo kuampakon doi TEMENENO Na Bonua koidan?”

⁷Yesaya timbiliyo, “Naiyamo kopaloosano ko TEMENENO nabineekon doi Tuan sulano natapaatiyo Konaperjanjian.

⁸Kojam potudo oloyo Tomundo Ahas mokubaiyo, ko TEMENENO naikon kubaiyo kobayangano nataundur songulo kogaris.” Doibundu taunduro dobayanganoo songulo kogaris.

⁹Salataa Hizkia tangalino, yana motuliso meeng kolagu nggaalano ko TEMENENO buno naiya:

¹⁰“Dakubantilan, sodo pokuwakon dakuumur yaku sio kutauso, moakabuse daku tuboan labino doi mian momate nadunia.

¹¹Dakubantilan, akimo koidan kumambaleng TEMENENO doi dunia nia, kai mokita banggapi nai dunia nia.

¹²Daku ansaangan bontol, polongokai daku ajal, pokakana kogembala nasandung molinombo; pokakana kotoik mopinatol doi tonunan pakakaso; yaku anggene ko Mian Bisa naikon opupusemo daku tuboan.

¹³Popupuson kopopook yaku wowookon sabab namasakitan, buno pokakana kobuku-bukunggu singa moloto-lotoiyo; yaku anggene ko Mian Bisa naikon opupusemo daku tuboan.

¹⁴Koalalonggu koloso tukon lemamo, pokakana kotomisi dara yaku momongoluu. Komatanggu iyus sabab lelengea doi timbu, oh TEMENENO, oluputakukai luwedoi susaan nia.

¹⁵Oilamo komo moola kubantile? Nia TEMENENO nakokubai; aki kumoola moolo sabab kususaan.

¹⁶Oh TEMENENO, beenggukai tuboan luwedoi mubantilan tukon Mukokubai, tukon yaku salakanggene daku tuboan tongo doi-Koo.

¹⁷Daku susaan naikon tobolii teali sanaangan, Ikoo salamatanaku luwedoi bahaya; sasaibino daku dosa-dosa Ikoo ompuniyomo.

¹⁸Doi matean lalomo akiyo Komo nggaalon, komian momate aki namoinikene Komu kesetiaan.

¹⁹Tongo mian motubo Komo nggaalon, pokakana daku linakukon doi oloyo nia. Koorang tua salitaikene doi napau bulaando Komu setiaan, oh TEMENENO.

²⁰Oh TEMENENO, Ikoo lapamo aline daku sesel, tobikon doiya kami bakidung doi Mu Bonua tukon mokuti kacapi, popupuson komai tuboan.”