Read Banggai YESAYA 40 Bible Online

YESAYA 40 - Banggai bible

YESAYA 40

¹Bunokai naiya komu Mian Bisa nabantilano, “Hibure-hiburekai Daku bangsa!

²Tenangkanggenekai ko Yerusalem miano noano, bantilekai baikon konapo inataiyan pupuso. Konapo kasalahan Yaku ompuniyomo, konapo dosa-dosa Yaku hukumemo lua luunggon paku.”

³ Daano komian alalo mobantile, “Posadiayo kololoon doi padang lalomo motuuk doi TEMENENO. Pokoloyose kololoon babasal doi padang moluas tuuk doi nda Mian Bisa!

⁴Sasamba kopepelako sio natinombuni, bunggul tukon bunggono sio nakinesea. Kobuta mobunggukon naikon teali seanono, tukon komo polipatek naikon kinoloyos.

⁵Maka ko TEMENENO nababasalan naikon inokitakonggon; sasaibino kobanggapi naikon sakisiiyo. Tutuu, ko TEMENENO janjikenemo!”

⁶ Daano komian alalo mobantile, “Babilitakenekai!” Yaku mausaday, “Oilakai daku binabilitakon?” “Babilitakenemokai baikon kobangkapi talongo buno bulung, tolongo pokakana kobubunga motolongo soisik kona takitaan momonondok.

⁷Kobulung teali motuul tukon kobubunga teali molooyu, kalukai ko TEMENENO lubatene kombombuul momoonas. Tutuu dobangsadoo tongo buno bulung.

⁸Kobulung teali motuul tukon kobubunga teali molooyu, bai konda Mian Bisa nabantilan bataanggon sidutu-posidutukon.”

⁹Toliboiyakai dobunggulo motatandak, tukon umumkanggenekai kobilita momondok doi Yerusalem! Wookonai tukon alalomu mobulungan, tukon umumkanekai kobilita momonondok doi Sion! Bantilekai doi kota-kota Yehuda baikon konapo Mian Bisa naikon lubat!

¹⁰ Kitayo, ko TEMENENO Mian Bisa lubat tukon kuasa yana mokubai tindakan mobolikon langge. Yana linoolaing luwedoi mian molapamo olupute.

¹¹ Pokakana komeeng kogembala mopialayo Kona iyayon tinotooli; Yana susuungo komo pototongikene yanila. Kodomba-domba napau yana lambine, tukon doi nakosabaran Yana oindune kotina-tinano.

¹²Indee komo moola ukure kotobun doi dapang tukon limano salaano, kai moukure kodapang doi timbu tukon ukure doi tubon? Indee komo moola ukure kobuta sakean tukon liter kai motimbange kobunggul bunggono tukon kilo?

¹³ Indee komo pimpine ko TEMENENO, kai mootunggule Yana salaku teali napongotunggul?

¹⁴Doi indee komiano ko TEMENENO namansadaiyan sulano namalaat motoiyan kai panagalatian? Indee komo beena potudoikon doiya-Na sulano namokubai tindakan motapaat?

¹⁵Doi TEMENENO ko bangsa-bangsa tongo buno paisu idan natulo doi ember, tongo buno meeng koambata batuno doi timbangan; kotogong-togong tongo buno ambata moalus kona mimilaanan.

¹⁶Sasaibino koiyayon doi Libanon bokulungo aki nasukup nakinubai sosubakon mosinua; kokayung-kayungo tongo soisik tuuno kalu kinubai kayung posuano.

¹⁷Sasaibino kobangsa akiyo koalatino doiya-Na, tongo buno moakiyo Kona sinasalaan.

¹⁸ Jadi indee komu pinokakanakon ko Mian Bisa? Indee komu inaanggon mopokakana tukon iyana?

¹⁹Yana aki nabaino pokakana kotimbalang tukang-tukang mokubaiyo, timbalang molinapis mosoni tukon suasa.

²⁰Komian moaki namoola mongoli mosoni kai suasa, yanila molilik kayung moaki namosobit manas. Yana mounggolii tukang moasli sulano namokubai timbalang moaki nagampang manas.

²¹Aki namungkin moaki mutoiyo tukon mulengele, tukon aki mupinailukonggon salataa doi looluk? Masakan moaki mumangalatikene salataa doi tumbe bulaando kona tambuunan nadunia nia?

²²Komo pasitakayo yana bantile luwedoi dunia nia namatimbumbukan, kotumbuno tokita poipoisik tongo buno betek. Yana banatene kotimbu buno toik mobinanaton, tukon konoikene buno sandung atono modungoliyo.

²³Yana kubaiyo sasaibino koponguasa akimo napo toiyo oilamo konapo kinubai, tukon sasaibino kosambu akiyono konapo kakuasaan.

²⁴Doi yaniladoo pokakana kotanaman momongula mosodo tubo koalono. Kalukai ko TEMENENO lubatene kombombuul, yanila motuul tukon binengakon pokakana kolabuwe batango momotuulo.

²⁵Indee komu inaanggon komo pokakana tukon ko Mian Bisa Momoliyous? Tukon indee komu pinokakanakon tukon Yana?

²⁶Mbalengekai kotimbu, tukon palatikanggenekai! Indee komo pasitakayo kobituwon-bituwon pauno? Iyanamo komo ature yanila pokakana kopasukan, Yana toiyo konapo badaangan, tukon moola nauange suwe-suwele tukon sambuno. Mau nabaimo meengkai akiyo komo lopus, karena TEMENENO nababasalan Konakuasa!

²⁷Jadi Israel, bulaando ikoo motodudul susah, buno pokakana ko TEMENENO mu Mian Bisa aki natoiyo ikoo mosusa? Buno pokakana yana aki napopusinggon komu nasib, tukon aki napalatikanggene komu hak?

²⁸Masakan moaki mutoiyo tukon mulengele? TEMENENOkai ko Mian Bisa mokekal, mopasitakayo kodunia tukon timbu. Yana aki narasayo pakadak kai iyus; Kona pikiran aki nda moola toiyo.

²⁹Yana tealikene bukuan komian momuyuko kobukuno, tukon beena samangatan doi mian moakimo natoiyo kona kinubai.

³⁰Komian motabo-tabokon teali pakadak tukon iyus koremaja-remaja tuwong takait.

³¹Bai komian mobalaanggene ko TEMENENO, naikon malaat bukuanan mosoodo. Yanila pokakana kotomisi rajawali mobenga tatandak tukon kapilo nabukuanan. Yanila bulen bai aki napo pakadak, yanila ambakon bai aki napo iyus.