Read Banggai YESAYA 41 Bible Online

YESAYA 41 - Banggai bible

YESAYA 41

¹Ko Mian Bisa bantile, “Inai popelek tukon pondongolii Yaku, kotano-tano moodoon tuuno. Pobatotobokai sulano poampakon doi pengadilan, pomajukai tukon poajukanggene kopo palakala. Maimo nda posidang singgat-singgat sulano naputuskanggene indee komo bisa, tukon indee komo salah.

²Indee komo sumboliiyo koponguasa moluwedoi tolopot, tukon mobeena kamanangan momeenggon? Indeekai komo kubaiyo yana molungguiyo kobangsa-bangsa, tukon kotomundo-tomundo somba doiyana? Kona sabel tealikene yanila benga dombaa doisumai pokakana koambata mbombuul mopuule, kona panah tealikene yanila sasabul pokakana kolabuwe batango mbombuul mobengakene.

³Yana momeenggon lelenggene tukon yana maju akiyo kona minatakuton; kona laakonan mosoisobit, adukon aki namotudang buta.

⁴Indee komo lakukene doiya sasaibino? Kotundun loloono indeekai komo tantukene? Yakumo, ko TEMENENO, Yakumo komo tumbe-tumbeno, tukon Yaku tataap daano polong doi napupusan.

⁵Kotano-tano moodoon tumbuno moola nakitayo oila komo lapamo Kukubaiyo. Yanila nggimnggim tukon lolondong sabab napo matakutan, tobikon doiya yanila pototongimo sasaibino maka napo lubat.

⁶Sasaibino komian sio napotulungi, tukon sio napokoonggoli noa.

⁷Kotukang kayung ekeenggele kotukang mosoni noano, komian motutuke kologam nateali manipi tukon martelee sio nanggaale komian motutuke kologam nateali manipi doi landasan bunggono. Konabantilano, ‘Monondok tuuno komo limang’, maka napinaat tukon paku sulano naaki naunggot.

⁸ Bai ikoo, Israel, Daku peleleani, Daku umat pinilih, ikoo Kusobat Abraham, nakaturunan.

⁹Ikoo Yaku ndokiikon luwedoi dunia bundu-bunduno, Yaku uanggon luwedoi lipu-lipu moodoon. Daku bantilano, ‘Ikoomokai Daku peleleani; aki Kutolake Daku mian pinilih.’

¹⁰Inai momatakut, sabab Yaku loolainggon, inai mobosan, sabab Yaku mu Mian Bisa. Ikoo naikon Yaku keenggele tukon tulungikon, tukon Limanggu berkuasa Yaku tandane komuyu.

¹¹Kitayokai, sasaibino komian mo nggimolii komuyu, naikon linungguimo tukon mamaamo. Komian molawane ikoo, naikon silaka tukon mamaamo.

¹²Komian molawane ikoo naikon ikoo umboliiyo, bai aki mupososuunggene yanila. Komian mupolobosian diabudodoo silakamo tukon lapuso.

¹³Sabab Yakumo ko TEMENENO, mu Mian Bisa, tataap taaniyo kolimamu bakalingano; Daku bantilano, ‘Inai momatakut, Yaku naikon tulungi-Kon.’ ”

¹⁴Ko TEMENENO nabantilano, “Inai matakut, Israel, maukai mupoipoisik tukon mumuyuk. Yakumokai ko TEMENENO, mutulungikon, Momoliyous, Israel miano na Mian Bisa doiyamo komo Salamatanggon.

¹⁵Kitayokai, Yaku naikon tealikonggon pokakana kokayung pangalaas, moboolu, mamangan tukon kongolingo lua pododolii. Ikoo poalaasene kobunggul-bunggul maka mumanase; kobunggo bungkono ikoo tealikene buno labuwe kulito.

¹⁶Ikoo tapise yanila, maka napo binengakon mbombuul tukon sasabulo sabab sokoy mopuule. Ikoo naikon laba-laba sabab Yaku, ko TEMENENO, ikoo babanggaal sabab Yakumo, ko Israel miano na Mian Bisa komo loolainggon.

¹⁷Kalukai daku bangsadoo mosoe mounggolii paisu, sabab kobulungoila motuulo namolouwan, maka Yakumo, ko TEMENENO, naikon timbiliyo konapo sambayang; ko Israel miano na Mian Bisa akikai natinggale Konaumat.

¹⁸Yaku lubatene kopaisu-paisu molombaiyo kobunggul-bunggul mokindolon; kopaisu matano sumbot luwedoi seanono. Kopadang gurun Yaku tealikene telaga; kopaisu totipas doi buta momotuul.

¹⁹Kopadang gurun Yaku naikon sakakoniyo kayung kauwalu, tukon kayung zaitun, kayung murad maka kayung akasia. Kopadang moluas Yaku tealikene bokulung, tukon eru bokulungo, beronga tukon kauwalu bokulungo.

²⁰Maka sasaibino komian kitayo tukon toiyomo baikon Yaku, ko TEMENENO komo lakukanggene. Yanila naikon palatikanggenemo tukon alatiyomo, Israel na Mian Bisa momoliyous komo tealikene doiya.”

²¹Ko TEMENENO, tomundo Israel, Yana bantile doi pilogot-pilogot, “Poajukanggenemo kopo urusan, poloolukonggene kopo alasan-alasan!

²²Polubatokai, tukon potantukenemo oilamo naikon komo teali, sulano mai toiyo naikon kona pupusan. Pobontiikenekai kokajadian-kajadian doi loolukoo, potarangkanggene koalatino sulano mai palatikanggene.

²³Pobantilekai oilamo naikon komo teali, sulano mai toiyo baikon komuyu tutuu daano kopo kuasa. Polakukenekai komo daano kogunano kai komo lubatene korugian, sulano mai masaindinggene.

²⁴Kona tutuuwan, komuyu tukon kopo kokubai akiyo, tukon sasaibino komo sosubaiyo ikoo tongo mosikit konoano.

²⁵Yaku lapamo gerakanggene komeeng komian moluwedoi tolopot; Yaku uangemo nalubat sulano nausokiyo kokota luwedoi lembet. Sasaibino kosambu-sambu naikon piniipiiki pokakana kolapetak, pokakana komian momokubai tobunan tano mopipiikiyo kobuta ndonduun.

²⁶Indee luwedoi komuyu komo lapamo nubuatkanggene sulano mai akuiyo yana? Bai komuyunokon akiyo komeeng komian momoola popitoikene, akiyo komo lengele komuyu mobasalita.

²⁷Yakumo, ko TEMENENO, kotumbe-tumbeno mobabilitakene doi Sion; Yaku makapatumo komo babayo kobilita momonondok doi Yerusalem.

²⁸Doi tempo Kuunggoliiyano kopilogot-pilogot, akiyokai komeeng komian momebee potudoikon, akiyo komo motimbili.

²⁹Tutuu, dopilogot-pilogotoo akiyo kogunano, yanila tongo timbalang mokinubai moakiyo kogunano, tukon aki namoola mokubai oioila.”