Read Banggai YESAYA 42 Bible Online

YESAYA 42 - Banggai bible

YESAYA 42

¹ Ko TEMENENO bantile, “Naiyamokai Daku peleleani Yaku tomboniiyo, kumian linilik mosanaanggene Konoanggu. Yaku lapamo beena kuasa doiyana, sulano nababayo kokaadilan doi sasamba kobangsa.

²Yana aki naikon nanggeleamon kai nauang tukon alalo mobabasal, koalalo aki nalongol doi loloon.

³Koaok motobonunuk aki nalotoyo, koposi mokolot-kolot aki naposoiyo. Tukon nasotiaan yana nyatakanggene kona tutuuwan,

⁴aki nabimbang kai moloto konoano, polong kokaadilan nakinoonggolan doi dunia. Kotano-tano moodoon pelenggene kona otunggul.”

⁵ Ko TEMENENO Mian Bisa mapasitaka tukon bukayo luwas kotimbu; yana kubaiyo kodunia tukon sasaibino komo tubo doi bungkono. Yana beena kobanggapi ansaangan tuboan tukon nyawa. Yana pelenggene nateteba nia doi Napepeleani,

⁶ “Yakumo, ko TEMENENO, mouanggon tukon mobeenggon tugas sulano mujalanggene kokaadilan. Yaku bimbinge tukon pialayo ikoo sulano nateali perjanjian doi banggapi, tukon teali taraang doi sasaibino kobangsa.

⁷Sulano natobuka komian mopiit komatano, tukon natobuatene komian mokalipookan doi talunggu lalomo.

⁸Yakumokai ko TEMENENO, doiyamokai Kosambunggu; Dakubabasalankai akiyokai komeeng komian Daku bineekon; Daku tololongolan aki Kusalakanggene doi patung.

⁹Diabudodoo Daku tinantukon tealimo tokita; tukon Yaku iyasemo mopopitoikene kolangge-langge moboolu; moakiyoon doiya nateali, lapamo Yaku pailukonggon.”

¹⁰Manyanyikenekai kolagu moboolu doi TEMENENO, nggaalekai iyana, eh posaapon kodunia! Pomomuukokai, eh kotobun tukon sasaibino koantoko, kotano-tano moodoon tukon sasaibino kotumbuno!

¹¹Siokai kopadang mokindolon tukon kokota-kotano nanggaale ko TEMENENO, tukon koidan ko Kedar tumbuno nanggaale iyana! Siokai kokota Sela tumbuno natolo-toloukon, tukon nauwang-uwang doi bunggul bunggono!

¹²Siokai napo kabasale ko TEMENENO, tukon napo bapilongolikene yana luwedoi tano-tano moodoon.

¹³Ko TEMENENO maju momolobosi pokakana komeeng kotalenga, tukon pokakana komeeng kosuludadu mosamangat tuuno doi napolobosian lalomo. Yana bunyikanggene kona sinapan alalo, tukon okitakene Kona baranian doi nalawan.

¹⁴Ko Mian Bisa bantile, “Malumbito Daku bapongaian; Yaku batingaakon tukon taane kodilinggu. Doibundu laatemo kotempono Daku mokubaiyan tindakan, sio Kunggeleamon pokakana koboine momosuung.

¹⁵Kobunggul tukon bunggul bunggono sio Kutealikene kindolon, sasaibino komo tubo kutealikene namolooyu. Kopaisu pepelako-pepelako Kuboliiyo nateali padang mokindolon, sasaibino kodanau Kutealikene mooti.

¹⁶Daku bangsa mopiit Yaku tataaniyo lolo doi loloon moaki napo toiyo; tukon Yaku andane yanila doi loloon moaki napo tingoniiyo. Kokalipookanan Yaku tealikene madialan tuuk doi yanila, tukon kololoon mobunggul-bunggul Yaku keseayo. Doiyamokai Daku linakukanggon doi yanila, tukon pasti Yaku laksanakanggene.

¹⁷Komian moanggayo kopilogot timbalango tukon moakuiyo salaku temeneno yanila, naikon tinotulai tukon inakamaa.”

¹⁸Ko TEMENENO bantile, “Polengelekai, komuyu komian mobongol! Pokitayokai, komuyu komian mopiit!

¹⁹Indeekai komo lobian konapiitan luwedoi Israel Daku peleleanidoo? Indeekai komo lobian kona bongolan luwedoi Kusosumboliidoo?

²⁰Israel, badaang komu kinita, bai aki mupalatikanggene, kotolingaimu tobuka, bai aki mundongoliiyo.”

²¹Ko TEMENENO yase momasalamaton: Yana yase Kona hukum nainodotii tukon nakinabasal.

²²Bai dobangsadoo kabuso morinampok; yanila tinaan doi buta lalomo modaano koleleengo, tukon yanila tinaano doi talungguan lalomo. Yanila komo teali korban parampokan, tukon akiyo komo lubat momebee tulungan.

²³Indee doi komuyunokon komoiyase ndongoliiyo nalangge-langge nia, tukon moiyase palatikanggene momeenggon?

²⁴Indeekai komo salakanggene ko Israel sulano narinampok? Bolikonkai TEMENENO susuungo? Tuuk doi Yanamokai konda baladosaan, kita tubo aki ndaloingiyo Kona parentah, tukon aki nda tulutiyo Kona otunggul.

²⁵Tobikon doiya Yana kubaiyomokita sulano nda rasakanggene Konaliitan mohebat tuuno, tukon kita sakisaa tuuno sabab polobosian molokis tuuno. Kona nggimalan kait doi Israel pokakana kobilat, bai aki nda sadariyo, tukon aki nda tealikene pangalaman luwedoi nda inalami.