Read Banggai YESAYA 43 Bible Online

YESAYA 43 - Banggai bible

YESAYA 43

¹Israel, bunonaiyakai ko TEMENENO nabantilano, “Yakumokai komo tealikonggon tukon mokubaikon. Inai momatakut, pasti Yaku salamatonggon! Yaku uanggomon tukon bantile kosambumu, ikookai Kumilik.

²Kalu ikoo pintosiiyo kopaisu, pasti Yaku loolainggon, maukai mususah bai aki musool. Kalu ikoo loloiyo kobilat, bai aki mumokopul, maukai nadaano koporcobaan mobabalat bai aki musilaka.

³Sabab Yakumokai ko TEMENENO, mu Mian Bisa, Israel miano na Mian Bisa momoliyous, komo Salamatonggon. Ko Mesir Yaku beekonggon salaku pabaloso ikoo, ko Sudan tukon Syeba salaku posoboli ikoo.

⁴Ikoo daano koanggano doi Matanggu, Yaku odotiikon tukon mamaasikonggon; tobikon doiya Yaku beekonggon kobanggapi posobolino ikoo, tukon kobangsa-bangsa teali posoboli munyawa.

⁵Inai momatakut, sabab Yaku tataap lindungikon. Luwedoi talise tukon luwedoi tolopot Yaku sumboliiyo komupau tumbu nalubat pototongi.

⁶Yaku parentayo kolembet tukon lalom, sulano napo mosobit sinobii. Sobiiyomokai komupau-pau malaneno naabali luwedoi naodoonan, tukon komu pau-pau boineno namule luwedoi dunia bundu-bunduno.

⁷Sabab yanila inuango luwedoi Sambunggu, tukon Yaku pasitakayo yanila sulano nakabasale Yaku.”

⁸Ko Mian Bisa bantile, “Sumboliiyomokai napo maju doi muka daku bangsa mopiit, maukai nadaano komatano; mobongol, maukai nadaano kotolingaino.

⁹Sumboliiyomokai sasaibino kobangsa napototongi tukon sasaibino yase napomeenggon. Kai daano konapo pilogot-pilogot komo moola popitoikene oila naikon komo teali diabudodoo? Indee doi yaniladoo komo moola tantukene oila komo teali doi loonu salaando? Sobiiyomokai konapo sakisi-sakisii namaju doi muka, tukon sio napo buktikanggene baikon yanila tutuu bisa, sulano sasaibino komian mondongoliiyo yanila nabantile, baikon tutuu bunodoiya!

¹⁰Eh Daku mian, komuyumokai Daku sakisii-sakisii, Yaku lilikemo komuyu teali Kupelelani-peleleani, sulano potingoniiyaku tukon poanggaa-Ku, tukon mangalatikene baikon Yakumokai ko Mian Bisa. Yakumo ko Mian Bisa Mo Meeng, akiyo kobailonggon doi naakiyoonan Kudaano tukon salataa doi Kudaanoan.

¹¹Yakumo susuunggukai ko TEMENENO, sangalaasan Yaku akiyo komo moola salamatene kobanggapi.

¹²Yaku lapamo popitoikene doi komuyu, Yakumokai komo salamatene komuyu, tukon bolikon temeneno bailon molulubaton modaano doi antara komuyunokon; tukon komuyumokai komo teali Kusakisii-sakisii. Tukon Yakumo, Yakumo niakai ko Mian Bisa,

¹³polong posidutukon Yaku tataap Mian Bisa. Akiyo komo moola luput doi Kukuasa, kai komo halangiyo Daku tetel.”

¹⁴TEMENENO Mupasalamat, Momoliyous doi Israel, Yana bantile, “Luwedoi komuyu, Yaku makapatu suludadu doi Babel, tukon koposupat talunggu tataapono Yaku duduwo; ko Kasdim miano nalaba-labaan Yaku boliiyo teali mandaungan.

¹⁵Yakumokai ko TEMENENO, mu Mian Bisa Momoliyous, mu Tomundo mopasitakayo ikoo, eh Israel!”

¹⁶Ko TEMENENO mokubaimo meeng kololoon mololoiyo kotobun, loloiyo kopaisu mobabokolan.

¹⁷Yana mosumbolii suludadu tukon suludadu-suludadu kapalano momolobosi, tukon yanila maju mapake kereta adalan motandane. Bai yanila tuwong, tukon akimo napo moola bangun koidan, yanila mate pokakana kolampu sumbuno moposo.

¹⁸Ko TEMENENO bantile, “Akiyo kogunano mau nda neneeke kololoono molapa, palasuma kita motandandayo kolangge-langge molapamo.

¹⁹Popalatikanggenekai, Kukubaiyo komeeng kolangge moboolu; diabudodoo Yaku tambuuneno, akikai pokitayo? Yaku naikon mokubai loloon doi padang mokindolon, tukon paisu-paisubatango doi padang moluas.

²⁰Koiyayon mombosolo naikon akabasala-Ku; koserigala tukon tomisi unta naikon nggaala-Ku sabab Yaku lombakene kopaisu doi padang mokindolon, tukon paisu-paisu batango doi padang moluas sulano Daku mian linilik namoola monginum.

²¹Yanilamokai kobangsa Yaku mokubaiyo tuuk doi dilinggu, sulano napo moola babilitakene konggaalano Yaku.”

²²Ko TEMENENO bantile, “Bai ikoo ko Israel, aki musosubai Yaku, tukon akimo koidan pobakaleda doiya-Ku.

²³Ikoo akimo mumababa domba salaku musosuba mosinua, tukon akimo muodotiiyaku luwedoi musosubakon. Padahal akikai Kubeemu tanggungan tukon sosubakon, kai mokubaiyo ikoo susah sabab ikoo tinuntut tukon kemenyan.

²⁴Ikoo maunaaki mumongoli dupa mobabangi tuuk doiya-Ku, akikai nakabaiya-Ku puas tukon muiyayon sosubakon inakko. Kobalino ikoo beena tanggungan doiya-Ku tukon polalim-lalim, tukon komuyu Kubaiyaku susah luwedoi pokasalahan-kasalahan.

²⁵Muakai Yakumo ko Mian Bisa moapusanggene komu lalim, Yaku ompuniyo ikoo sabab bunomo doiya Daku sifat; aki Kuneneeke komu dosa-dosa.

²⁶Ingotiikana-Kukai, maimokai nda taus doi pangadilan, lapurkanggenemo komu ulusan sulano natokita baikon ikoo bisa.

²⁷Komu mbumbu tumbeno baladosamo, sasaibino komu katua yanila lawana-Kumo,

²⁸koimam-imam kubaiyomo manggilit Daku Bonua. Tobikon doiya ko Israel Yaku salakanggenemo sulano natinotulai, Yakub nakaturunan yaku pataikenemo nainakate kabus.”