Read Banggai YESAYA 44 Bible Online

YESAYA 44 - Banggai bible

YESAYA 44

¹Ko TEMENENO bantile, “Ikoo Yakub Daku peleleani, ndongoliiyokai, ikoo ko Israel miano, Dakuumat pinilih!

²Yakumokai ko TEMENENO motealikonggon, mokubaikon salataa doi tialalom, tukon motulungikon. Inai momatakut, ikoomokai Daku peleleani, Kuumat pinilih Yaku mo mamaasikene.

³Sabab Yaku naikon kubaiyo kopaisu doi buta momotuul, tukon lombakene kopaisu-paisubatango doi buta mokindolon. Yaku naikon beekene Daku kuasa doi mukaturunan, tukon koidan Yaku balakaatiyo komu pau tumbu.

⁴Yanila naikon tubo subur pokakana kobulung moloolani kopaisu, pokakana kogandarusa batango doi paisubatango bibilo.

⁵Memeeng kopau naikon akuiyo kodilino Kumilik, tukon lubat pomeenggon tukon Yakub nakaturunan. Suwe-suwele tulise doi limano: TEMENENO na Milik, tukon koidan yanila bantile kodilinoila Mian Bisa Naumat.”

⁶ Naiyamokai ko TEMENENO Mobabasal Konakuasa nabantilano, Tomundo tukon polindung Israel, “Yakumokai ko Mian Bisa Mo Meeng, motumbe tukon napupusan.

⁷Indeekai komo buno Yaku? Sumboliiyomokai namangaku! Sobiiyomokai napopitoikene tukon nabuktikanggene doiya-Ku! Indeekai komo tantukenemo oila komo teali doi loonu salaando salataa doi tumbe-tumbeno polong doi napupusan koloonu?

⁸Daku bangsa, inai momatakut kai ngginggim; bolikonkai luwedoi looluk polong diabudodoo Yaku lapamo tantukene oila komo teali? Komuyumokai Daku sakisi-sakisii. Akiyo kopelindung bailonggon tukon koidan aki Kutingoniiyo.”

⁹Komian mokubaiyo kopilogot timbalango doiya akiyo kogunano, tukon kopilogot-pilogot yanila mososubaiyo akiyo kona guna doiyaniladoo. Komian mososubaiyo dotimbalangoo piit tukon aki namotoy oioila, tobikon doiya yanila malaat maa.

¹⁰Tongo sia-sia yanila momokubai timbalang maka napo sosubaiyo salaku napo temeneno!

¹¹Tutuu, sasaibino komian mososubaiyo kotimbalang pasti yanila mamaa. Komian mokubaiyo dotimbalangoo tongo banggapi biasa. Sumboliiyomokai napo maju polaing-laing; pasti yanila matakut tukon mamaamo.

¹²Kotukang besi mangala meeng kopatolo kologam maka nasuayo doi bilat lalomo maka natutuke tukon martelu mobabasal. Yana limange tukon totubo konoano tukon koidan gunakanggene kobukuno modaano doiyana. Salataa yana balimang pasti yana malaal, molou, tukon pakadak.

¹³Kotukang kayung ukure kokayung. Yana gambare kobagan tukon kapur, botik-botike tukon napakakas tukon tealikene manusia motambongan, maka naabese doi nabonua lalomo.

¹⁴Ugaatene kokayung yana mopakeyo luwedoi kayung kauwalu, kayung eru kai kayung terpentin yana motapeyo doi sumolot. Mungkin koidan yana masakakon kayung salam maka natotiiliyo koudan sulano nateali tubo.

¹⁵Kosoobos luwedoi kayungo tinealikon tumbal mosinua tuuk balalangan tukon mosuaan roti tukon bapanggangan sail, maka yana nabiay. Yana balalang maka nabantile, “Wah, sanaang tuuno tukon matalanas! Tutuu nabilatia kubaiyo kosanaangan!” Kayungdoo labino pinake nakinubai timbalang. Yana somba mososubaiyo tukon sambeang, “Ikoomokai daku temeneno, salamatanakukai!”

¹⁸Tutuu kona longasan komian mobuno doiya! Yanila tutupe komatanoila tukon konoanoila sampe akiyo konapai inalati oioila.

¹⁹Domo kubaiyo dotimbalangoo aki napolong kona popikikon, “Kayungdoo kosoobos yaku suayo, tukon koayongo yaku pakeyo mosuaan roti mapanggangan sail moteali kukaane. Maka kayungdoo labino yaku tealikene timbalang. Jadi diabudodoo yaku sosubaiyo komeeng kokayung patolo!”

²⁰Dokokubaidoo pokakana kita momakaan abu. Domianoo kona pikiran molokis nggabutemo konoano, sampe akimo namoola tinulungi koidan. Yana aki namoola akuiyo baikon dotimbalangoo modaano doi limano doiya tongokai ponipuan.

²¹Ko TEMENENO bantile, “Neneekekai naiya sasaibino, ikoo ko Israel, sabab ikoo kupelelani. Yaku kubaikon, tukon ikoo Kupelelani, Israel, aki naikon Kutomilinggonggon!

²²Komu kasalahan Yaku saakene pokakana kobunom, komudosa Yaku sakukene buno bunom monggabut. Abalimokai doi Yaku, sabab Yaku lapamo olupute komuyu!”

²³Pokokuweiskai laba, ikoo kotimbu, pokokuweiskai, eh meeng koobos doi dunia lalomo! Pokokuweiskai laba, ikoo kobunggul-bunggul! tukon koidan kosumolot tukon sasamba kokayungo modaano doi lalomo! Sabab ko TEMENENO okitakene Kona babasalan tukon tobuusemo Kona umat doi Israel.

²⁴Bunokai naiya ko TEMENENO mupasalamat nabantilano mokubaiyo ikoo salataa doi kandungan. “Yakumokai ko TEMENENO motealikene sasaibino kolangge, tongo susuungo komo beleatene kotimbu, tukon akiyo komo tomboniiyo motealikene kodunia.

²⁵ Yakumokai komo gagalkanggene kotukang patantukon nalangge tinantukanggon, tukon Yaku maemaenggene komian motoiyo tantukanggene komian nanasib. Komian mopandoy nabantilan-bantilan Yaku bantayo, konapo pandoiyan Yaku tealikene bongguan.

²⁶Yakumokai komo ekenggele Daku peleleani nabantilan, tukon Yaku lakukanggene Daku bito-bito natetel yana mookitakene. Yaku bantile koidan baikon ko Yerusalem naikon dinungolimo koidan, tukon kokota-kota Yehuda Yaku naikon bangune koidan; kokota-kota lapamo tinealikon kota koidan.

²⁷Yakumokai komo bantile doi tobun nadasar: Sumboliiyomokai! Yaku iyasemo mokotuuliyo komu paisu-paisu batango.

²⁸ Yakumokai komo bantile doi Kores, ‘Ikoomokai naikon komo maparentah tuuk doiya-Ku, tukon lakukanggene sasaibino Daku mongiasan. Maparentakenemokai sulano ko Yerusalem nabinangun koidan, tukon ko TEMENENO Na Bonua nakinubaimo konadasar.’ ”