Read Banggai YESAYA 45 Bible Online

YESAYA 45 - Banggai bible

YESAYA 45

¹Ko TEMENENO lapamo piliyo Kores moteali tomundo; yana tinudo sulano nalungguiyo kobangsa-bangsa tukon sulano nalotoyo kotomundo-tomundo nakakuasaan. Ko TEMENENO naikon bukayo kokota tataapono mobabasal tuuk doiyana, akiyokai komeeng komo tutupe. Doiyana ko TEMENENO bantile,

²“Yaku naikon sadiayo kololoon motuuk doikoo; kobunggul tukon bunggul bunggono naikon Yaku keseayo, kotataapon tambaga naikon Yaku pasayo, tukon koposupat-posupat besi Yaku lotoyo.

³Maka ikoo Yaku beemu buat motosookon, sulano mutoiyo Yakumokai ko TEMENENO, Israel miano na Mian Bisa, mouwangemo kosambumu.

⁴Yaku uwange ikoo tukon Yaku beenggon totumai, maukai naaki mutingonii Yaku. Yaku pelentahkon motulungiyo ko Israel Daku peleleani, sabab doi yaniladoo Kubangsa pinilih.

⁵Yakumokai ko TEMENENO akiyo kobailonggon, tongo Yakumo ko Mian Bisa Mo Meeng. Lapamo Kubeemu sinapan, maukai naaki mutingonii Yaku.

⁶Sasaibino doiya Yaku lakukene sulano luwedoi tolopot polong doi talise sasaibino komian toiyo baikon Yakumokai ko TEMENENO, akiyo ko temeneno bailonggon bai tongo Iyaku.

⁷Yakumokai komo tealikene komadialan tukon kalipookan, Yakumokai komo lubatene kobalakaat tukon balaa. Yakumokai ko TEMENENO molakukene sasaibino doiya.

⁸Luwedoi timbu Yaku bulusene komanaangan pokakana koudan, kodunia bukayo kodilino sulano natalimayo, maka nalubatene kosalamatan tukon kobebasan; Yakumokai ko TEMENENO komo kubaiyo doiya sulano nateali.”

⁹ Silakamokai komian mobantayo komo Pasitakayo; yana pokakana kotobunan molawane komian mokubaiyo. Oilakai kobuta tobunan moola mansadai doi momokubai tobunan, “Oila komu pinikikon?” Oilakai kotobunan moola namongoluu baikon komo kubaiyo aki napandoy?

¹⁰Silakamokai komian mobantile doi naorangtua, “Bulaando yaku mosinuung mobuno naiya?”

¹¹Ko TEMENENO, Israel na Mian Bisa momoliyous nabantilano, “Posadaiyakukai mengenai loonu doi salaando. Bai inai momasadiakene tentang Daku pau-pau, kai sumbolii Yaku momokubai meeng kolangge.

¹²Yakumokai ko TEMENENO motealikene kodunia, tukon komo pasitakayo kobanggapi sulano nadungoliyo. Tukon Kukuasa Yaku bukayo bebelan kotimbu, tukon parentayo kooloyo matano, bituwon tukon bituwon-bituwon pauno.

¹³Yakumokai komo gerakanggene Kores sulano nalaksanakanggene Daku maksud tukon mokeenggele kokaadilan. Yaku naikon keseayo sasaibino kololoon molinoloy. Yana naikon bangune koidan Daku kota Yerusalem tukon bebaskanggene Daku umat motinaan, akiyo koposuab tukon akiyo kopebealo.” Ko TEMENENO Mobabasal Konakuasa lapamo basilingan.

¹⁴TEMENENO bantile doi Israel, “Pobakoonggukenemokai ko Mesir butano hasilo tukon laba Sudan. Ko Syeba miano motambongan tealimo koomu mumilik: Yanila ambakon doi tonggulumu tukon limanoila motoboboi. Yanila naikon somba tukon akuiyo, ‘Ko Mian Bisa tutuu daano doi komuyu; akiyo ko temeneno bailonggon bai tongo Yana!

¹⁵Ko Mian Bisa salamatene ko Israel daanokai ko Mian Bisa moseekene kodilino.

¹⁶Sasaibino komian mokubaiyo ko pilogot timbalango; naikon inakamaa tukon tinotulay.

¹⁷Bai ko TEMENENO salamatene ko Israel; kona kasalamatan naikon bataanggon. Aki naikon poinokimaa tukon tinotulay polong sidutu-posidutukon.’ ”

¹⁸TEMENENOkai komo pasitakayo kotimbu, Iyanamokai ko Mian Bisa! Iyanamokai komo tealikene tukon komo kubaiyo kodunia, Yana kubaiyo moonggol tukon tataap kokondong. Yana aki natealikene kotampat mokiis tuuno, bai tampat modinungoli. Iyanamokai komo bantile, “Yakumokai ko TEMENENO, tukon akiyo kobailonggon.

¹⁹Aki kuseseekene Daku silingan, kai buno rahasia. Aki kusumboliiyo Daku umat doi Israel naunggolii Yaku tukon palasuma. Yakumo ko TEMENENO, momabantil langge mobisa, tukon mapailukon oila komo tutuu.”

²⁰Ko TEMENENO bantile, “Popototongikai tukon polubat polaing-laing, komuyu sasaibino moluput luwedoi bangsa-bangsa! Longasokai komian moanggayo kotimbalang kayung, tukon sambeang doi pilogot-pilogot moaki namoola masalamaton.

²¹Lapuremokai komu ulusan, komukakenemo kona bukti-bukti, oode, sobiiyomo napopikili. Indeekai komo babulitakene dolanggedoo tukon komo pailukene salataa doi looluk? Bolikonkai Yaku, ko TEMENENO? Akiyo ko temeneno bailonggon bai tongo Iyaku. Yakumokai ko Mian Bisa moadil tukon Pasalamaton, akiyo kobailonggon tongo Yaku!

²²Eh, sasaibino kodunia tumbuno, poabalikai doiya-Ku sulano posinalamaton, sabab tongo Yaku ko Mian Bisa, akiyo kobailonggon!

²³ Yaku berjanjimo, tukon Daku perjanjian aki nabatal; luwedoi Yaku susuunggu Yaku batotopi. Sasamba komian naikon ladanggene kotuulo doi Salaanggu, tukon doi nasilingan lalomo susuungo yana berjanjimo tukon setia doiya-Ku.

²⁴Komian naikon bantile, ‘Kokaadilan tukon bukuanan tongo luwedoi TEMENENO!’ Sasaibino komian momosikitana-Ku naikon lubat doiya-Ku tukon malaat maa.

²⁵Bai Yakub nakaturunan naikon sinalamaton, tukon yanila nggaala-Ku, ko TEMENENO.