Read Banggai YESAYA 46 Bible Online

YESAYA 46 - Banggai bible

YESAYA 46

¹Naiyamo kona kabusan kopilogot-pilogot doi Babel; loolukon ko Bel tukon Nebo timbalango sinosubai, bai dia budodoo minuat doi iyayon bunggono, teali iyayon mopakadak natanggungan.

²Dotimbalang-timbalangoo aki namampu motulungiyo komo tanggunge, bai yanila susuungo inakut pokakana komian motinaan. Doiyamokai konapoo kabusan.

³Eh komuyu Yakub nakaturunan, pondongolii Yakukai, komuyu Daku umat labino. Yaku lapamo pialayo komuyu salataa doiposinuungan.

⁴Yaku tataap po Mian Bisa polong doi pomotuaan; tukon yaku tataap dagaiyo komuyu polong doi namoutean kopo buuk. Yaku komo tealikene komuyu tukon yaku tataap dagaiyo komuyu, Yaku tulungiyo komuyu tukon salamatonggonmuyu.

⁵Tukon indee kopo pinokakanakon tukon yaku? Kai daano komo moola pinookakanakon tukon yaku?

⁶Komian bukayo kona dompet tukon usekene kona mosoni, maka natimbange kona suasa tukon timbangan. Yana tamboyo kotukang mosoni sulano nakubaiyo kopilogot timbalango, maka nasombaiyo kona timbalang kinubai.

⁷Dotimbalangoo pinake tukon inabos doi natampat, yana kokondong idoo tukon aki namoola biyol. Kalu komian sambeang doiyana, yana aki namoola timbiliyo, tukon aki nasalamatene iyana doi susaan lalomo.

⁸Neneekekai tukon potimbongiiyokai, komuyu komian molokis!

⁹Neneekekai kokajadian-kajadian doi loonu loolukon; akuiyokai baikon Yakumo ko Mian Bisa, tukon akiyo kobailonggon, Yakumokai ko Mian Bisa, tukon akiyo komo pokakana Yaku.

¹⁰Luwedoi tumbe-tumbeno Yaku popitoikenggenemo kolangge-langge moteali doibundu, salataa doi looluk lapamo Yaku tantukanggene oila naikon komo teali. Dakubantilano: Daku kaputusan pasti naikon teali, Daku mongiasan sio Kulakukanggene!

¹¹Yaku uwange komeeng koponguasa doi tolopot yana lubat pokakana komeeng kotomisi mobarani sulano nalakukanggene Daku kaputusan. Oilamo Daku binantil sio Kulakukanggene, tukon oilamo Daku tinetelikon sio Kulakukanggene.

¹²Komuyu komian mobangga-banggaal, pondongoliiyakukai, komuyu moanggene komanaangan daanoon mododoon.

¹³Yaku naikon loolanikenemo kooloyo bangoluputan, kokasalamatan Yaku mobeekene doi komuyu akimo kutundayo koidan. Yaku naikon salamatenemo ko Yerusalem, tukon Yaku beena natongodotiiyan ko Israel.”