Read Banggai YESAYA 48 Bible Online

YESAYA 48 - Banggai bible

YESAYA 48

¹Eh Yakub nakaturunan, lengelekai, Yahuda nakaturunan mosombuikene kosambuno Israel, komubantilano ikoo akuiyo ko Israel na Mian Bisa, tukon batotopi luwedoi TEMENENO sambuno. Bai domu bantilan-bantilanoo aki natutuu.

²Maukai nabuno doiya, ikoo moakuiyo tukon bangga-banggaal baikon ikoo kota moliyous tumbuno; tukon baikon ikoo sosingkalang doi Israel miano na Mian Bisa mobinantil TEMENENO Mobabasal Konakuasa.

³Ko TEMENENO bantile, “Pondongoliiyokai, eh Israel miano! Oilamo komo teali doilooluk, malumbito Daku popitoikanano; oilamo Daku binantil, tongo sosinggot Yaku lakukanggene tukon Yaku tealikene meeng kobuktii.

⁴Yaku toiyo baikon ikoo motikas konoamu, tukon komu pikiran matikas maka mukapala batu.

⁵Tukon salataa doi looluk Yaku tantukanggenemo; akiyoon nateali, Yaku popitoikenemo, sulano naaki mubantile, baikon doiya mupilogot timba-timbalango.

⁶Sasaibino Daku nubuat ikoo molengelemo doiya tealimo; ikoo sio muakuiyo baikon Daku bantilanoo tutuu. Diabudodoo Yaku popitoikene kolangge-langge moboolu, korahasia-rahasia moakiyoon mutoiyo.

⁷Sodo diabudodoo Yaku motealikene, tukon bolikon looluk; akiyoon mubiasa ndongoliiyo tentang dolanggedoo, sulano naaki mumoola bantile, baikon ikoo toiyomo sasaibino.

⁸Yaku toiyo baikon ikoo aki mumoola inangga, salataa doi looluk ikoo toiyomo komian mopamalawan. Tobikon doiya ikoo akikai mutoiyo, akiyokai komeeng kobantilan mopolong doi tolingaimu.

⁹Yaku taane Daku liitan sulano Kosambunggu natololongol. Yaku taane tuuk doikoo, sulano naaki musinilaka.

¹⁰Yaku ujikon doi bilat sakisaawan, pokakana kosuasa mosinopu doio basopuan lalomo.

¹¹Doiya Yaku lakukanggene tuuk doi dilinggu susuunggu, sabab aki Kupataikene Kosambunggu nabinantil lokis; Daku tongodotiian akikai Kuebese mau doi indee komiano.”

¹² Ko TEMENENO bantile, “Israel miano pondongoliiyokai, komuyu Daku umat Yaku mouange, Yaku tataap mu Mian Bisa. Yakumokai komo tumbe-tumbeno, tukon Yakumo koidan kobunduno.

¹³Kolimanggu komo abese kodunia uuno tukon mobukayo luas kotimbu aino. Kalukai kuuwange kosambuno, yanila mosobit lubat.

¹⁴Popototongikai sasaibinggomuyu tukon pondongoliiyakukai! Doi sasaibino kopilogot-pilogot akiyo komo moola matantukon baikon daku mian pinilih naikon lubotiiyo tukon lobosiyo ko Babel; yana naikon lakukanggene oila Daku mongiasan.

¹⁵Yakumokai komo bantile tukon komo uwange iyana, komo loolainge iyana sampe namanaang.

¹⁶Lubatokai loolanikon doiya-Ku tukon ndongoliiyokai, salataa doi looluk Yaku basalita terus terang; tukon Dakubantilan sidutu teali bukutii.” Diabudodoo ko Temeneno Mian Bisa utusaku tukon beenggu nakuasa susuungo.

¹⁷Ko Israel miano na Mian Bisa moliyous nabantilano, Mupasalamat, “Yakumokai ko TEMENENO mu Mian Bisa, mootunggulon oila komo daano kogunano doikoo, tukon komo taanikon doi loloon ikoo mololoiyo.

¹⁸Kalukai ikoo palatikanggene daku parenta-parentah, maka komu sanaangan pokakana kopaisu batango moaki nabiasa mooti, tukon komu mujuran pokakana kobokol doi tobun moaki nabiasa tade.

¹⁹Komu katurunan pokakana kobone batu-batuno kona badaangan; tukon Yaku dagaiyo naaki napo silaka.”

²⁰ Potausokai tukon pobuleno luwedoi Babel, pobabilitakenemookai nabilita nia doiyayaa. Pobabilitakenekai tukon kokuweisan laba: “Ko TEMENENO salamatenemo ko Israel, Dona umatoo!

²¹Doitempo Naloolaingano yanila mololoiyo kopadang mokindolon, yanila aki napo sakisaa molouwan. Ko TEMENENO batayo kobunggo batu maka natobuat kopaisu, luwedoi batu yana sumbot kopaisu tuuk doiyanila.

²² Doi mian molokis akiyo kokasalamatan,” bunomokai doiya ko TEMENENO nabantilano.