Read Banggai YESAYA 49 Bible Online

YESAYA 49 - Banggai bible

YESAYA 49

¹ Ndongoliiyakukai, eh kotano-tano moodoon palatikanggenekai daku bantilan-bantilan. Ko TEMENENO uwangaku akiyoon kusinuung, Yana piliyakumo salataa doi kutiniananggonan.

² Yana kubaiyo daku bantilan-bantilan kona mamanganan pokakana kosabel, tukon limano susuungo komo lindungiyaku. Yana tealikanaku pokakana kopanah matano motobilas, tukon Yana abese doi salungo tukon siap napinake.

³Kona bantilano doiyaku, “Ikoomokai Daku peleleani; Yaku naikon inakabasal sabab ikoo.”

⁴Bai yaku bantile, “Daku pakadakan palasuma; yaku akabuse kobukunggu tongo sia-sia!” Baikai yaku yakiniyo ko TEMENENO belayo daku hak, baanggokai ko Mian Bisa tongo balasaku sosuai tukon daku kokubai.

⁵Akiyoon kusinuung, ko TEMENENO uwangakumo moteali napeleleani, sulano kupototongikene ko Israel miano, sulano napo abali doiya-Na. Ko TEMENENO tealikananku mian moinodotii, tobikon doiya ko Mian Bisa teali kumonggolan.

⁶ Ko TEMENENO bantile doiyaku, “Kotugas molobian kona motoongan totiiliyo ikoo, eh ikoo Daku peleleani; ikoo aki natongo ikoo mulekene Yakub nakaturunan labino tukon olupute kona babasalan ko Israel bense-benseno, bai Yaku tealikene contoh doi bangsa-bangsa, sulano doi posaapon kodunia nasinalamaton.”

⁷Ko Mian Bisa moliyous pasalamaton Israel bantile doi mian motinotulai tuuno, tukon kobangsa-bangsa momosikitene tukon koidan sasaibino koponguasa tealikene ata, “Kotomundo-tomundo kitayo Daku kokubai; yanila naikon abali moodotiiyaku. Sasaibino koponguasa naikon kitayo koidan, maka napo somba mososubaiyaku.” Doiya teali sabab ko TEMENENO piliyaku-Mo; ko Israel miano na Mian Bisa moliyous setia doi Naperjanjian.

⁸ Ko TEMENENO bantile doi Naumat, “Doi tempo Kuiyasano, Yaku naikon timbiliyo; doi oloyo Kumasalamatonan, Yaku tulungiyo komuyu. Yaku lindungiyo tukon dagaiyo komuyu, tukon koidan Yaku tealikene koperjanjian doi bangsa-bangsa. Yaku abalinggene kotano mokiis tuuno teali buta pusaka modinungoli.

⁹Komian motinalunggu Yaku sumboliiyo natobuat; komo daano doi lipu nakalipookanan Yaku babayo doi namadialanan. Maukai napo daano doi bunggul bunggono mokindondolon bai aki napo kakurangan oioila, doi popupuson kololoon tasadia kokinaan.

¹⁰ Akikai napo molou kai malaal, tukon aki napo kinonoi pintal onaso doi padang mokindolon. Sabab Yaku, seseange yanila, tukon Yaku loolainge yanila, tukon andane yanila doi paisu matano.

¹¹Yaku naikon mokubai loloon mololoiyo kolipu mobunggukon, sasaibino Daku loloon mobabasal naikon Yaku keseayo.

¹²Luwedoi naodoonan Daku umat pakallubat, luwedoi lembet, talise tukon Sinim doi lalom.”

¹³Manyanyimokai eh ikoo kotimbu, kokuweiskai ikoo kodunia, pokokuweis labakai, eh komuyu ko bunggul-bunggul! Sabab ko TEMENENO lubat hibure Konaumat, Yana mamaasikene Kona umat mo linai-lainggon.

¹⁴Bai ko Yerusalem tumbuno bantile, “Ko TEMENENO tinggalemo kita! Konda TEMENENO tomilinggenemo kita.”

¹⁵Ko TEMENENO timbiliyo, tukon bantile, “Moolakai komeeng kopau tinano natomilinggene konapau, tukon akikai naseseange konapau susuungo? Maukai natomilinggene, bai Yaku aki naikon kutomilinggonggon!

¹⁶Yerusalem, Yaku sidutu neneeke ikoo; Yaku botike kosambumu doi limanggu salaano.

¹⁷Komian mobangunggon pakallubato, tukon komo manason naikon tauso.

¹⁸Kitayokai tukon pombalengekai potikunggon komuyu, komu rayat pototongimo tukon lubat doikoo. Luwedoi Yaku, Mian Bisa motubo, Yaku bantile, tutuu, ikoo naikon babanggaal sabab badaang tuuno komu mian, pokakana kobabaabu boine babanggaal sabab badaang tuuno konahiasan.

¹⁹Komutano mokindolon tukon kiis tuuno, diabudodoo teali madipot tuuno, doi mian moiyase dungoliyo. Tukon komian mosilakaiyo ikoo, yanila tauso odoon luwedoi ikoo.

²⁰Kolabuk-labuk mosinuung doi balausalaan naikon bantile doikoo, ‘Natanonia todudul madipot doiyaku, beenggukai tampat sulano kumoola dungol naimbaa.’

²¹Tukon ikoo naikon bantile doi noamu lalomo, ‘Indeekai komo suunge dolabuk-labukoo doiyaku? Sadangkan daku labuk-labuk akiyono, tukon akimo kumoola koidan momosuung? Yaku biningkat doi bangaisonan lalomo maka kusinaakon maka kutinggal susuunggu. Jadi luwedoi doiyaa dolabuk-labukoo, tukon indee komo pialayo sampe yanila teali babasal?’ ”

²²Ko TEMENENO Moinakatandak Tuuno bantile doi Naumat, “Yaku naikon mebee paloosan doi bangsa-bangsa tukon yanila naikon abalinggene komupau-pau; komupau mala-malaneno naikon inuba, tukon komupau boi-boineno naikon tinuutuuk!

²³Kotomundo-tomundo naikon tealimo tamamu, tukon kotomundo boi-boine tealimo tinamu. Yanila somba mososubaikon tukon yanila rasaiyo kodilinoila poipoisiko doikoo. Maka naikon mutoiyo baikon Yaku ko TEMENENO; komian momoini doiya-Ku aki nakecewa konoano.”

²⁴Komuyu mansadai, “Kai moola kobarang morinampas luwedoi talenga limano, kai mian motinaan moola narinampas doi mian mobarani limano?”

²⁵Ko TEMENENO timbiliyo, “Doiyamokai naikon komo teali. Sasaibino kotalenga motinaan naikon rinobut koidan. Komian molokis nalangge ndinikuk naikon rinampas koidan. Sabab komu musu Yakumo komo lawane; tukon Yakumo komo salamatene kopopau-pau.

²⁶Yaku naikon kubaiyo komu musuh namalangukene kosau sampe yanila teali poakate. Maka sasaibino komanusia naikon toiyo, baikon Yakumo, ko TEMENENO, Mupasalamat. Mobukuan Tuuno, Yakub Na Mian Bisa, moteali Mupotolos.”