Read Banggai YESAYA 5 Bible Online

YESAYA 5 - Banggai bible

YESAYA 5

¹ Lengelekai daku nyanyian tentang daku sobat naanggur asino. Daku sobat daano kona anggur asino doi bunggul eyakono momolumbang.

²Yana pacele kobutano tukon sakukene kobatu-batuno. Kona sinakakon anggur momonondok mopinilimo tukon kekendenge komenara batotoliyan. Yana makali meeng kobitu tampat napiisano konaanggur, maka natotiiliyo kosaono namotua, bai kohasilo anggur saono momeele.

³Jadi budodoiya Daku sobat bantile, “Komuyu sasaibino, Yerusalem tukon Yehuda tumbuno, adiliyakumo antara Yaku tukon Daku anggur asino.

⁴Oilamo koidan Daku kinubai, bai akiyoon Kulakukanggene komo tuuk doi Kuanggur asinodoo? Bulaando motongo saono momeele kohasilo, tukon bolikon saono momonondok molapamo Yaku moinikene?

⁵Bunonaiya naikon Daku lakukangganano Daku angguroo asino: Yaku naikon bubute sasaibino kopagaro potikunggon, Yaku naikon manase komeselo moekeenggele, maka Kuosobiiyo koiyayon mobuas namanase tukon napipiikiyo.

⁶Yaku batadikenemo kobulung natuboiyo. Kona anggur batango aki naikon Kupangkase, tukon aki naikon Kukadioloniiyo. Bai tongo Yaku batadikene kosonit tukon bulung notombukiyo, tukon Yaku pantane kobunom-bunom nalubatene koudan sulano naudoniiyo.”

⁷Sabab ko TEMENENO Mobabasal Konakuasa kona anggur asino doiyamo umat Israel, tukon ko Yehuda miano yanilamokai koanggur batango mosinakakon. Luwedoi yanila Yana moinikene kokaadilan, bai tongo daano kokulokisan. Yana moinikene napo ekeenggele kolangge nabisa-bisaan, bai tongo daano konggeleamonan makabian kaadilan.

⁸Silakamokai komuyu momongoli bonua-bonua tukon motipuwo komian nakombung-kombung sulano natosuungi kopoo buat! Akimo namalumbit naikon kabusokai kotampat motuuk doi mian bailon tukon naikon baino komuyu komo dungol doi tano nia.

⁹Kulengele ko TEMENENO Mobabasal Konakuasa batotopimo, “Kobonua-bonua mobabasal tukon momonondok nia sasaibino naikon kosongo akiyono komo dungoliyo.

¹⁰Kolangge mosinakakon akiyo kohasilo, koanggur asino kona kebelan songulo kohektar kohasilo tongo songulo koliter kopaisuno. Sakat koliter kolibuang gandum komo tiniduk tongo songulo koliter kogandum!”

¹¹Komuyu naikon silakamo! Kopo limang luwedoi dowa-dowa polong popook tongo moinum suka maka pomala-malangu.

¹²Doi polame-lamean daano kokasapi alalo, gambus, rebana tukon suling maka pomoinum anggur. Bai aki popusinggene ko TEMENENO nalimang tukon oila Kona linakukanggon.

¹³Tobikon doiya Daku umat moakiyo kona tinoy oioila yana tinandan pokakana komian motinaan. Sasaibino kokatua tukon rayat naikon mate malaal tukon molou.

¹⁴Komatean babano tobuka bebelan sulano nalemese kokatua-katua doi Yerusalem polaing-laing korayat morame-rame doi lamean lalomo.

¹⁵Sasamba komian naikon inakamaa, tukon komo babanggaal inekepende.

¹⁶Bai ko TEMENENO Mobabasal Konakuasa otudoikene Kona babasalan tukon lakukene oila komo bisa. Yana naikon okitakene Kona moliyousan tukon doi naadiliyano Kona bangsa.

¹⁷Bai kokota mototimbunimo buta kombembe tukon domba pauno bobosul momakaan bulung tukon aki napo malaal.

¹⁸Silakamokai komuyu mobaladosa momeenggon!

¹⁹Komu bantilano, “Batadikenemokai ko TEMENENO Israel miano na Mian Bisa momoliyous namosobit kubaiyo kona tindakan! Batadikenemokai nalakukanggene Konatetel, sulano nda kitayo tukon nda toiyo.”

²⁰Silakamokai komuyu moputarbalikanggene komo monondok tukon molokis, mokalipookan tukon momadialan, momosopot tukon momaamis!

²¹Silakamokai komuyu moanggene kodilimiyu pandoy tuuno!

²²Silakamokai komuyu mojago monginum anggur! Komuyu teali barani tukon hebat kalu komuyu monginumo suka!

²³Bai doiya tongo pokokubai sulano pomalaat doy tambo, tukon komuyu bebaskanggene komian mosalah, tukon komuyu pantane komian moakiyo konasalah namalaat kaadilan.

²⁴Komuyu tolakemo ko TEMENENO Mobabasal Konakuasa naotunggul, tukon komuyu totulaiyomo ko Israel miano na Mian Bisa naparentah. Tobikon doiya, pokakana kolaing tukon bulung momotuul kabus tosua doi aung lalomo, bunomo lakon doiya komu katurunan naikon teali boowan, komu bubunga teali motuul tukon kabus benga kalu mbombuul puulemo.

²⁵Ko TEMENENO nggimoliiyo Kona bangsa. Yana batotobomo mohukume yanila. Kobunggul-bunggul unggot; ko mian momate bajan-bajano tasabul pokakana kolembut doi loloon. Bai ko TEMENENO daanoon monggimal tukon tataap naikon mohukume Kona umat.

²⁶Ko TEMENENO naikon uange kobangsa bailon moodoon tukon yanila naikon lubat doi tempo nasoi-soibitan!

²⁷Yanila sidutu batotobo mopolobosi tukon aki napo toiyo mopakadak. Yanila aki napo biasa moolo tukon piit.

²⁸Konapoo panah matano mamangan tuuno tukon konapo panah batango tataap tasadia sulano batembak. Konapo adalan lungguno motikas tuuno pokakana kobatu aung, tukon konapo kereta rodano kona baputaran pokakana kombeyus.

²⁹Sasaibino konapo suludadu wowookon pokakana kosinga mosodo namosoku iyayon bailon, maka nabulenggene, tukon akiyono komo moola osobiiyo.

³⁰Doi oloyodoo posaapon ko Israel tololongol kosinapan alalo doi polobosian lalomo pokakana kobokol alalo doi tobun. Pokitayokai, posaapon dotanodoo kalipookano tukon moonomo kasulitan. Komadialan tealimo kalipookan.