Read Banggai YESAYA 50 Bible Online

YESAYA 50 - Banggai bible

YESAYA 50

¹Ko TEMENENO bantile doi Israel, “Eh komuyu Daku umat, komuyu anggene Yaku siikayo komuyu pokakana komeeng kolangkai mosiikayo konaboloki? Kalu buno doiya, inaando konasurat potinggalan? Ikoo anggene Yaku balukene ikoo, pokakana komeeng kotama mobalukene konapau doi mian mobatagih samaya? Bolikon! Ikoo tongo tinaan tukon sinakukon, sabab mudosa tukon mukulokisan susuumu!

²Bulaando luwedoi kuumat moakiyokai komeeng komian momotimbili, doitempo Kulubatan mouwange yanila? Uga-ugaate yanila tongo batingaakon tolong sabab yanila anggene aki Kumampu mobebaskanggene tukon mosalamatene yanila? Konatutuuwan, luwedoi Kuparentah kotobun teali mooti, kopaisu-paisu batango moola Kutealikene padang mokindolon, tobikon doiya koikan-ikan kabus mate tukon boowan mabutot.

³Kotimbu Yaku tealikene mopook tukon aki namadialan tuuno, Yaku tutupiyo pokakana kotoik susaan doi matean.”

⁴Ko TEMENENO Moinakatandak Tuuno lolongganaku mobasalita, sulano dakubantilan namoola ekeenggele komian momuyuk konoano. Sasamba kododowa Yana bangune konoanggu sulano kundongoliiyo Kona otunggul doiyaku.

⁵Ko TEMENENO beenggu pangalatian; bai aki kumalawan kai abali luwedoi Yana.

⁶ Yaku beekene kotonggulunggu doi mian monanalaku; tukon kopapainggu doi mian mobubute daku simbil. Aki kupalesene kodudusonggu doitempo kutinotulaiyan tukon kutinupeiyan.

⁷Sabab ko TEMENENO Mian Bisa tulungiyaku, tobikon doiya aki kukinubai teali mammaa. Yaku ekeenggele konoanggu sulano namoonggol; sabab yaku toiyo aki naikon kukinubai mamaa.

⁸ Sabab ko Mian Bisa loolani, Yana buktikanggene baikon aki kusalah. Indee komoiyase ponggeeleki tukon yaku? Mai ndatobuat posinggat-singgat. Indee komo lawanaku? Sumboliiyokai naloolani doiyaku.

⁹Tutuukai, ko TEMENENO Moinakatandak Tuuno yana belaaku, jadi indee komo barani buktikanggene baikon yaku mosalah? Sasaibino komo tuduwaku naikon kabus lapus pokakana kotoik momotuamo eaka mokaane.

¹⁰Eh komuyu moodotiiyo ko TEMENENO, tukon mondongoliiyo kona peleleani nabantilan, kololoon komuyu mololoiyo uga-ugaate kalipookan, tukon akiyono kolaango mokadiyoloniikon; bai anggayokai ko TEMENENO; posokongimokai tukon komu Mian Bisa.

¹¹Eh komuyu moiyase silakayo komian bailonggon, komuyu naikon silaka luwedoi potetel susuumuyu. TEMENENOkai komo kubaiyo doiya nateali, tukon komuyu naikon sinakisaa tuuno.