Read Banggai YESAYA 51 Bible Online

YESAYA 51 - Banggai bible

YESAYA 51

¹Ko TEMENENO bantile, “Pondongolii Yakukai, eh komuyu moiyase nasinalamaton tukon polubat doiya-Ku pomakabi tulung. Neneekekai kobunggo batu luwedoi naando kopo pinaatonan, tukon kobakalian batu luwedoi naando kopo kinaliyan.

²Neneekekai komu mbumbu Abraham tukon Sarah; doitempo Kuuangano Abraham, akiyo konapau; bai Yaku balakaatiyo yana tukon Yaku beena katurunan mobadaang.

³Yerusalem, Yaku naikon hibure ikoo, tukon sasaibino komo dungol doi kota lapono. Komu padang-padang mokindolon Yaku tealikene taman, pokakana ko Eden, Daku taman mosubur. Ikoo komian naikon kambakan tukon laba-laba tukon yanila nggaale ko TEMENENO lolo luwedoi nyanyian-nyanyian.

⁴Palaatikanggenekai Koalalonggu, eh Daku bangsa, eh Daku umat, ndongoliiyokai Daku bantilan-bantilan. Yaku beena otunggul doi Kubangsa-bangsa, tukon Daku hukum-hukum naikon kadiyoloniiyo yanila.

⁵Kokasalamatan Yaku mobeekene doi yanila loolanimo; Daku manaangan tempono naikon loolanimo. Kobangsa-bangsa yakumo komo parentahyo. Kotano-tano moodoon yanila totiiliya-Ku tukon yanila moinikene Daku kokubai motambongan tuuno.

⁶Mbalengekai kotimbu tukon kitayokai kodunia; kotimbu naikon lapus pokakana kotibolung tukon kodunia naikon mbules pokana kokalambi momotuamo, sasaibino kotumbuno naikon mate pokakana kopipil. Bai kokasalamatan Yaku mobeekonggonmuyu tataap posidutukon, tukon Daku manaangan akiyo konapupusan.

⁷Eh komuyu Daku bangsa, pondongolii Yakukai, komuyu toiyo oila komo bisa; tukon Daku otunggul natangabos doi noamuyu lalomo. Kalu kobangkapi pia-piyadayo komuyu inaikai pomatakutene, inai mokhawatir kalu yanila totulaikon.

⁸Yanila naikon mate kabus tukon lapus, pokakana kotoik mokinaan ngengat tukon toik moluwedoi domba buluno ngengaat mokaane. Bai kokasalamatan Yaku mobeekonggonmuyu tataap posidutukon Daku kamanangan bangggadudul polong paisoboli kokaturunan.”

⁹Oh TEMENENO bangunokai, tulungikamikai, luwedoi Mukuasa salamatanggamimokai. Bangunokai pokakana doi loonu loolukon, doi tempo Mumanasano Rahab tukon domu tobokano donaga tobunoo sampe mate.

¹⁰Ikoomo koidan komo kotiyo kotobun, tukon paisu doi dapang moatean. Ikoo kubaiyo kololoon lolo doi paisudoo, sulano komian mosinalamaton namoola pintas.

¹¹Tobikon doiya komian TEMENENO mobebaskanggene naikon mule tukon yanila usoko doi Yerusalem tukon laba-laba kodudusoila tokita monondok sabab napo laba-labaan mosidutu-posidutukon. Yanila laba-laba tukon kambakkan, susah tukon sakisaawan lapamo lapus.

¹²Ko TEMENENO bantile, “Yakumokai komo hibure komuyu. Bulaando komuyu momatakutene kobangkapi kona tuboan moaki nakekal, doi bangkapi mosinakukon pokakana kobulung?

¹³Masakan ikoo motoliminggene naikon ko TEMENENO Mopasitakayo ikoo mobelekayo luas kotimbu tukon moabese kodunia nadasar? Bulaando posopokon kooloyo ikoo motongo busak sabab matakut sabab penindas nanggimalan mobato-batotobomo momangakate? Konatutuuwan, donapoo nggimalanoo akiyo kotakoso doi komuyu.

¹⁴Sasaibino komian motinaan naikon binebaskanggono; tukon yanila sukup konapo kinaan, tukon aki napo mate tukon tinadin.

¹⁵Sabab Yakumokai ko TEMENENO mu Mian Bisa, mokubaiyo loliyokon kotobun sampe kobokolo tolindungan. Komo Babasal Konakuasa doiyamokai Kosambunggu.

¹⁶Yakumokai komo beleatene bebelan kotimbu tukon komo abese kodunia nadasar-dasar. Yaku bantile doi Sion: Ikoomokai Daku umat; Yaku beenggon otunggul doikoo tukon koidan Yaku lindungikon tukon Kukuasa.”

¹⁷ Bangunokai, eh Yerusalem, bangunokai! Kohukuman TEMENENO mootuwenge sabab nanggimalan lapamo Yaku loloiyo sampe kabus.

¹⁸Luwedoi modungolikon akiyono komo andanggon, luwedoi mian modungolikon akiyono komo loolainggon.

¹⁹Lua kokaliangano kobalaa motepakon; akibat polobosian sampe komu tano manas kabus tukon komu rayat mate malaal. Akiyo komo seseange tukon mohibure ikoo.

²⁰Doi sasamba kololoon bunduno komu mian tolubang sabab muyuko kobukunoila buno jonga mokana doi talong. Yanila tinepak Temeneno nanggimalan, tukon kanakon mu Mian Bisa nabantilan momotoong.

²¹Polengelekai komuyu komian molinai-lainggon, motodu-toduwokon pokakana komian momalangu!

²²Buno naiyakai komu TEMENENO nabantilan, TEMENENO mu Mian Bisa komo belayo komuyu, “Kosakisaawan Yaku mobeekene doi kunggimalan lalomo, naikon Yaku alayo abali luwedoi komuyu. Daku nggimalan naikon tademo, tukon akimo koidan potanggunge.

²³Dosakisaawanoo Yaku beekene doi polinai-lainggonan, doitempo posinumboliiyan mouba-ubanggon doi buta, maka napipiike komuyu, tukon komuyu pokakana kololoon mian mololoiyo.”