Read Banggai YESAYA 52 Bible Online

YESAYA 52 - Banggai bible

YESAYA 52

¹ Bangunokai, eh Yerusalem, bangunokai! Keenggelekai konoamu! Konoikenekai komo pakean batomundoan! Eh Yerusalem, kota momoliyous, komian momanggilit akimo nausok loloiyo komu tataapon mobabasal.

²Bangunokai luwedoi ambata, eh Yerusalem, tipasekai koabu molambot doikoo. Liatemokai korante motokooton doi bulumu, eh ko Sion podungolino motinaan!

³Ko TEMENENO bantile doi Naumat, “Komuyu binalukon tukon akiyo koolino, jadi diabudodoo komuyu binebaskanggon koidan tukon akiyo koulusano koidan.

⁴Doi looluk komuyu taus doi Mesir tukon andangal idoo salaku mian lulubaton. Diabudodoo koidan ko Asyur lailainggene komuyu.

⁵ Diabudodoo oila Doku urusan naimbaa? Ko Babel miano taane komuyu tukon lailainggene komuyu bai komuyu tongo babanggaal tukon banggadudul momeenggon mototulaiyaku.

⁶Tobikon doiya siopo akuiyo baikon yaku ko Mian Bisa, tukon doi tempodoo komuyu naikon toiyomo baikon yakumokai komo basalita doikoo.”

⁷ Bukan main kona sanaangan momokita dobito-bitodoo nalubatan; yana ambakon loloiyo kolipu mobunggukon tukon mababa bilita monondok, bilita kasalamatan, bilita kokasalamatan motuuk doi Sion; konabantilano, “Komu Mian Bisa Tomundo!”

⁸Polengelekai kopengawal kota nawookonan laba, yanila toloukon kambakkan posinggat-singgat! Sabab yanila kitayomo tukon sakisiiyomo baikon ko TEMENENO abalimo doi Sion.

⁹Polaba kambakanai, eh kokota-kota Yerusalem tumbuno sabab ko TEMENENO hiburemo Kona umat tukon bebaskanggenemo ko Yerusalem.

¹⁰Ko TEMENENO okitakene Kona kakuasaan doi sasaibino kobangsa matano. Maka posaapon kodunia naikon saksikanggenemo kokasalamatan moluwedoi nda Mian Bisa.

¹¹ Potausokai! Tinggalemokai kokota Babel, eh komuyu mobabayo ko Mian Bisa nabonua pakakaso! Inaikai posinggile kolangge momanggilit: koliyousiokai kobutomu moakiyoon mulengget.

¹²Komuyu aki pondia-dia kopo tausan, tukon aki napokakana komian mobulenggene kodilino. Sabab ko TEMENENO tataap andane komuyu; ko Israel miano na Mian Bisa tataap lindungiyo komuyu luwedoi posaapon kodunia.

¹³Ko TEMENENO bantile, “Konatutuuwan, Daku peleleani naikon malaat hasil; yana naikon inodotii tukon inakatandak.

¹⁴Doi looluk badaang komian momasainding kalu nakitayo iyana, kondondoongo rinusako tobikon doiya akimo napokakana kobangkapi koidan.

¹⁵ Bai diabudodoo badaango kobangsa moteali masainding, kotomundo-tomundo pokakanamo komian moponga sabab napomasaindingan. Tobikon doiya yanila kitayomo tukon mangalatimo, sabab doi loolukonoo akiyoon napo toiyo.”