Read Banggai YESAYA 53 Bible Online

YESAYA 53 - Banggai bible

YESAYA 53

¹ Dobangsadoo timbiliyo, “Indee komo maangga oila komo lapamo kami ndongoliiyo? Doi indee komian komo lapamo binuktikanggon ko TEMENENO nakuasa?

²Ko TEMENENO yase sulano Dona peleleanidoo napokakana kokayung sopiino motubo doi buta mokindolon. Kalu kita kitayo aki natambongan; akiyo konda iniyas doiyana.

³Tongo kita totulaiyo tukon kita dodoonggon luwedoi yana, sabab yana mian mosakisaa tuuno tukon biasa mombolosokiton. Akiyo komeeng komian moiyase mbalenge iyana, tukon kitakai aki nda posusakon iyana.

⁴ Kona tutuuwan nda seselkai kona tinanggung, nda sakisaawanai kona rinasakanggon, padahal kita anggene dona sakisaawanoo Mian Bisa nahukuman doiyana.

⁵ Bai yana pinokoloni sabab luwedoi nda dosa-dosa, tukon ninanal sabab nda kulokisan. Banggonkai iyana hinukum sulano nda sinalamaton, tukon koidan sabab napakol-pakol mobulusan kita tinangalinggon.

⁶ Kita sasaibino tapamo pokakana kodomba, suwe-suwele mounggolii loloon susuungo. Ko TEMENENO lapamo biyolikene doiyana sasaibino konda kulokisan.

⁷ Yana linakukanggon tukon kokubai molokis tuuno, bai yana tanggunge tukon sabar. Aki nabukayo kobabano pokakana kodomba pauno mobinaba doi bakolotan kai domba tinano moginunting kobulono.

⁸Yana tinaan tukon pinalesa, maka natinandan tukon hinukum mate. Akiyo komo posusakon kona nasib; yana mate sabab nda bangsa nadosa.

⁹ Kona tinadinan doi mian molokis natinadianan; kokibulo doi mian mokaasa tanga-tangano, maukai naaki namokubai langge-langge molokis, tukon koidan aki nabiasa batipu.”

¹⁰Ko TEMENENO iyasemo sulano nasakisaa, tukon yana sio nasalakanggene kodilino teali sosuba pangapus dosa. Maka yana naikon bulusan kona umur tukon daanoon momokita nakaturunan lolo doi yana maka ko TEMENENO namongiasan naikon tealimo.

¹¹Tobikon doiya ko TEMENENO bantile, “Salataa lapamo motoupiyo kosakisaawan, yana naikon sanaang tukon laba. Daku peleleanidoo, komo kubaiyo sanaang konoanggu, lapamo tanggunge komian badaang nahukuman; luwedoi yana Yaku naikon ompuniyo yanila.

¹² Tukon sanaang konoano yana salakanggene kona tuboan tukon tangait mian molokis. Yana tanggunge komian badaang nadosa, tukon sambeang sulano napo inampuni. Yaku beekene yana doi mian mobadaang salaku tambo, bai yana koidan malaat obos pokakana komian motalakana.”