Read Banggai YESAYA 54 Bible Online

YESAYA 54 - Banggai bible

YESAYA 54

¹ Yerusalem, doi looluk ikoo pokakana koboine mokomba moaki nabiasa mosuung. Bai diabudodoo ikoo wookon kambakkan, tukon pomanyanyimokai laba-laba! Sabab badaang tuuno komupau-pau, tukon kona badaangan lobiyoniiyo koboine modaanoon kona langkai.

²Kabasalekai komu sandung-sandung dungolan; kobulusane koalo-aloso tukon keenggele kopapa-papasoko!

³Ikoo naikon tosuungi luas doi bakalinga tukon bobo, komupenduduk naikon dungoliyo kobangsa-bangsa nabuta tukon naikon ndongiyo kokota-kota diabudodoo mokiiso tuuno.

⁴Inai momatakut, ikoo aki naikon muinakamaa; aki naikon mutinotulai tukon inakamaa. Ikoo naikon toliminggene kona akiyan musetia doitempo mumongulaan; akimo muneneeke koidan doi mukiisan salaku balu.

⁵Komo pasitakakon pokakana mulangkai, Israel miano na Mian Bisa moliyous doiyamo komo pasalamat. TEMENENO Mobabasal Konakuasa, doiyamokai Kosambuno, Yanamo ko Mian Bisa mokuasaiyo posaapon kodunia.

⁶Israel, ikoo pokakana komeeng koboloki mongula mosusa sabab nalangkai motinggale. Bai ko Mian Bisa uange ikoo koikoidan tukon bantile,

⁷“Tongo soisik kotempono daku tinggalano ikoo; bai diabudodoo tukon maasi maka seang Yaku alayo tukon abalinggene koikoidan ikoo.

⁸Tongo kikidikkee Yaku abalimo doikoo sabab Daku nggimalan molobi-lobiano. Bai tukon seang moakiyo kona pupusan Yaku mamaasikene ikoo.” Bunomokai doiya ko Mian Bisa Mupasalamat nabantilano.

⁹ “Pokakana doi tempo Nuh Yaku berjanjimo baikon kopaisu lomba akiyono, bunomo koidan diabudodoo Yaku berjanjimo baikon akimo koidan Kunggimolii komuyu kai moancame komuyu koidan.

¹⁰Maukai kobunggul-bunggul tukon kobunggul bunggo-bunggono naunggot, bai aki Kutade momamaasikonggonmuyu. Daku perjanjian damean Yaku taaniyo sidutu,” bunomo doiya ko TEMENENO moseseange ikoo nabantilano.

¹¹ Ko TEMENENO bantile, “Eh Yerusalem, kota mosoe, akiyono komu daya tukon akiyo komu hiburan. Komu dasar-dasar naikon Yaku abesemo koikoidan, tukon batu-batu modaano koolino.

¹²Kobenteng-bentengo Yaku bangune luwedoi batu delima, komu tataapon-tataapon mobabasal luwedoi batu permata, komu tembok-tembok luwedoi ratna mutu manikam.

¹³ Sasaibino komo dungolikon tealimo Kumurid, konapo tuboan sukup kokinaan tukon aman.

¹⁴Ikoo binangun luwedoi kaadilan, dinodoonggon doi batipuan tukon doi pipiikano komian.

¹⁵Kalukai ikoo linobosi, bolikonkai Yaku komo sumboliiyo, indeemokai komo seraange ikoo naikon tuwong.

¹⁶Yakumokai komo ciptakanggene kotolotuk besi mopoiliyo kobilat sulano namotutuk senjata. Yakumokai komo tealikene sasaibino kosuludadu mopakeyo dosenjatadoo sulano namangakate.

¹⁷Bai sasamba kosenjata motinutuk sulano nalawane ikoo, aki naikon nateali akatekon. Tukon sasamba kotuduhan doi pengadilan lalomo Yaku naikon buktikanggene salah. Yaku naikon tealikene tambo kokamanangan doi Kupeleleani-peleleani,” bunomokai doiya ko TEMENENO nabantilano.