Read Banggai YESAYA 55 Bible Online

YESAYA 55 - Banggai bible

YESAYA 55

¹ Ko TEMENENO bantile, “Maimokai komuyu sasaibino momolou, monginum, paisu motasadia. Komuyu moakiyo kopodoy polubat, pomatalima gandum maunaaki pobeale, tukon pokaane! Anggur tukon susu tasadia, potalimayokai tukon aki pobeale.

²Oila kogunano kita momongoli meeng kolangge tukon moakiyo kogunano, tukon kita balimang bai aki nda bobosul? Turutiyo Daku parentah, maka komuyu naikon makaan momonondok, tukon rasaiyo kokinaan mamaamis.

³ Polengelekai, komuyu Daku bangsa, polubatokai doiya-Ku, sabab Yaku beenggomuyu tuboan moposidutukon. Luwedoi maasi tukon kosetiaan Yaku mojanjikenemo doi Daud, tobikon doiya Yaku makabi perjanjian moposidutukon tukon komuyu.

⁴Konatutuuwan, Yaku tealikene yana katua tukon talenga, sakisii moluwedoi Kukuasa tuuk doi bangsa-bangsa.

⁵Komuyu naikon uwange kobangsa-bangsa molulubaton, tukon yanila mosobit lubat doi komuyu, luwedoi Yaku, TEMENENO mu Mian Bisa, Israel miano na Mian Bisa moliyous, lapamo Yaku akabasale komuyu.”

⁶Poabalimokai doi TEMENENO nia budodoo nia; pouwangekai Yana modaanoon moloolani.

⁷Siokai komian molokis nakindendeke konatuboan, tukon sio naboliiyo kona pikiran naloloon. Sobiiyomokai naabali doi TEMENENO, sulano namalaat TEMENENO Namaasi. Siokai naabali doi nda Mian Bisa, sabab ko TEMENENO ompuniyo kita tukon sanaang konoano.

⁸Ko TEMENENO bantile, “Daku pikiran aki nabuno mupikiran, tukon Daku loloon aki nabuno muloloon.

⁹Pokakana konatatandakan kotimbu luwedoi dunia, bunomo doiyakai kona tatandakan konapo sasalaan Daku pikiran tukon komu pikiran, tukon daku loloon maka muloloon.

¹⁰ Pokakana koudan molubat doi timbu, tukon akimo naabali, bai mbetokiiyo kodunia, tealikene subur kobuta tukon tealikene tubo kotanaman-tanaman, tukon badaang kohasilo maka natinipason tukon nakinaan,

¹¹bunomokai doiya koidan kobantilan Yaku mobantilemo akimo naabali doiya-Ku tukon palasumo, oila Daku mongiasan ikoo molakukene sio nadaano kohasilo, tukon sio nalaate sasaibino Daku minakisuuti.

¹²Salataa potinggalano ko Babel komuyu laba-laba, sabab komuyu inatokon tobuat tukon salamat. Kobunggul tukon bunggul bunggono naikon laba tukon wookon kambakan, kokayung-kayung batango doi kombung balaup-laup.

¹³Ko Kauwalu batango naikon soboliyo kosumolot mosoniton, kobunga kombungo soboliyo kosumolot. Doiya teali sulano kutololongol; salaku paloosan moposidutukon moaki naikon nalapus.”