Read Banggai YESAYA 57 Bible Online

YESAYA 57 - Banggai bible

YESAYA 57

¹Komian momonondok tukon motaat mate, tukon akiyo komo mangalati kai mopalatikanggene. Salataa yanila mate, yanila luputo doi balaa tukon yanila tademo tukon sanaang.

³Bai komuyu komian mobaladosa, polubatokai sulano poinadili! Komuyu pokakana kotukang sihir, komian moiyase basindua tukon mobaladosa!

⁴Indeekai kopo kinokumbit? Indeekai kopo tinotulai? Baanggon bolikonkai komuyu nia katurunan mian mokala-kala tukon moiyase malawan?

⁵Komuyu sosubaiyo kopilogot-pilogot doi nasuburan tukon ikoo pataikenemo kodilimu nanafsu nalungguiyo maka nababayo doi kayung-kayung uuno doi mutampat karamat. Komuyu tadine kopau-pau doi paisubatango pepelako, tukon doi batu-batu leengo.

⁶Jadi pantas pomokombul batu momolindal idoo. Doiyamokai komu obos! Doi batu-batudoo koidan komuyu kundongiiyo anggur tukon mososubakon gandum. Ikoo anggene Yaku sanaang tukon domu kokubaidoo?

⁷Komuyu taus doi bunggul-bunggulo sulano pomososubakon sosuba tukon poakambambule kopomoot.

⁸Komuyu pasayo kopo timbalang-timbalang molokis doi mubonua tataapono salaano. Komuyu tinggala-Kumo. Komuyu liate kopo pakean maka poliba doi tampat mooloan motausono mubibiyan sadiayo tukon komuyu tamboyomo sulano popokoloy, maka muakambambule komu moot.

⁹Komuyu mapake minyak tukon minyak-minyak mo babangi, maka potaus sosubaiyo kopilogot Molok. Komuyu makapatu bito-bito doi tano-tano moodoon, tukon koidan mian momate nadunia.

¹⁰Aki polunggu-lungguwon tukon aki porasayo mopakapakadak kopo unggoliiyano kopilogot-pilogot. Komuyu anggene moola napo beenggomuyu semangat moboolu, sampe aki poteali iyus.

¹¹Ko TEMENENO bantile, “Indeekai dopilogot-pilogotoo mokubaiyo komuyu matakut, sampe komuyu kala-kala tukon akimo poingata-Ku? Akimokai pososubaiya-Ku koidan sabab malumbito Dakubatingaakonan?

¹²Bai Yaku pailukene doi komuyu; komu tataanoo palsu, tukon sasaibino komu kokubai akiyo kogunano doikoo.

¹³Kalukai komuyu nggeleamon, pataikenemo dotimbalang-timbalangoo nasalamatene komuyu! Yanila naikon lapus mbombuul mobengakene tukon lapus tongo meeng koansaangan! Bai komian mosoop doiya-Ku naikon warisiyo dotanodoo tukon sosubaiya-Ku doi Kubonua.”

¹⁴Daano komo bantile, “Kubaiyomokai tukon sadiayomokai kololoon doi Kuumat, dedeenggenekai kohalangan.”

¹⁵Sabab buno naiyakai ko Mian Bisa Moinakatandak Tuuno tukon momoliyous nabantilano, moberkuasa polong sidutu-posidutukon. “Yaku ndoong doi tampat motatandak tukon moliyous, bai koidan Yaku ndoong doi mian morendah konoano tukon momanasakene kona dosa-dosa, sulano kuabalinggene konapo semangat tukon napo moinian.

¹⁶Aki nasidutu-posidutukon Daku asalakanano Daku umat, aki namomeenggon Daku nggimalan, sulano naaki namoloto konapo semangat, padahal Yakukai komo otuboiyo yanila.

¹⁷Konapo dosa molokis kubaiya-Ku nggimal, tobikon doiya Yaku hukume yanila tukon Yaku tinggalemo yanila. Bai motikas konoanoila tukon tataap yanila mopiliyo konapo loloon susuungo.

¹⁸Yaku kitayomo konapoo kalakuan, bai Yaku naikon tangalinggene yanila koidan. Yaku naikon andane tukon tulungiyo yanila tukon Yaku hibure komian mosusah konoano.

¹⁹ Yaku naikon beena kaamanan doi sasaibino komian, mau komo loolani maukai komo odoon. Yaku naikon tangalinggene Daku umat.

²⁰Bai komian molokis yanila pokakana kotobun mobabokolan tukon aki nabiasa molino. Kosoloko babayo kolembut tukon lokutak.

²¹ Doi mian mobaladosa akiyo koamanan,” ko TEMENENO nabantilano.