Read Banggai YESAYA 58 Bible Online

YESAYA 58 - Banggai bible

YESAYA 58

¹Ko TEMENENO bantile, “Powookonai kokobukuan! Popopitoikenekai Daku umat nadosa-dosa.

²Yanila sosubaiya-Ku sasamba kooloyo, tukon yanila yase toiyo Daku mongiasan buno adukon yanila lakukanggene komo monondok, tukon taat doi Kuhukum. Yanila bantile baikon sanaang komo sosubaiyo Yaku tukon yanila yase Daku hukum moadil.”

³Dobangsadoo mansadai, “Oila kogunano mobapuasa kalu ko TEMENENO aki nakitayo? Oila kogunano kita morendahkanggene kodilinggita kalu Yana aki napalatikanggene?” Ko TEMENENO bantile, “Kona tutuuwan, kalu komuyu daanoon mopuasa, komuyu mounggolii kountungan suwe-suwele tukon pookoliiyo kopo mian tinambo.

⁴Daanoon komuyu mopuasa, sio poponggeeleki tukon poponggimakon tukon pomokubai tindakan mokaraas. Komu pangaanggon tukon dopobapuasaanoo kubaiyo Konoanggu tatarik molengele kopo sambeang-sambeangan?

⁵Kalukai komuyu bapuasa, tongo komuyu tealikene kodilimuyu nasakisaa; komuyu tootukukene koololumuyu pokakana kobulung loono. Komuyu belekayo kotoik karung tukon tiposiiyo abu, maka pobanggolinggon doi bungkono. Doiyamokai kopo binantil puasa? Komu panganggon Yaku sanaang tukon domu kokubaidoo?

⁶Naiyamo kopuasa Yaku moiyase: Potadeiyo kopo lailaingganano komian bailon tukon kona akiyan poadil, tukon pobebaskanggene komian komuyu molailianggene.

⁷ Beenakai kinaan doi mian momalaal, talimayokai komian mobaino dombaa dombulo doi mubonua. Beenakai pakean doi mian mobalalau, tukon inai motolake koutusomu mopalaluu tinulung.

⁸Maka komadialan naikon sumbot pokakana kooloyo matano panano, tukon komu pakol-pakol mosobit tangalin. Yaku loolainge komuyu sulano kusalamatene komuyu. Daku daanoan naikon lindungiyo komuyu luwedoi sasaibino kodunia pasuno.

⁹Kalukai komuyu sambeang, Yakukai talimayo. Kalukai komuyu uang doiya-Ku, Yaku naikon timbiliyo. Inaimokai molailainggene kotulamu, tadeiyomokai kopomusuan tukon bapitanawan.

¹⁰Beenakai kaan komian momalaal tukon tulungiyokai komian molinailainggon. Kalu kopokokubai buno doiya, maka kokalipookan doi muloolanikonan naikon teali madialan pokakana kooloyo.

¹¹Yaku naikon sidutu andane komuyu tukon Yaku beemuyu kaan bobosul doi buta momotuul; Yaku tataap dagaiyo komuyu sulano posehat tukon pobukuan. Pokakana kobubunga kombungo mosabe kopaisuno, pokakana kopaisu matano moakiyo konamootian.

¹²Kokota momalumbito kona tabaakan naikon komuyu bangune koikoidan doi tampatoo momalumbito. Komuyu naikon binantil, ‘Bangsa mobangune koikoidan kokota sasanggalo mobinetoon tukon kindendeke kobonua-bonua momanaso.’ ”

¹³Ko TEMENENO bantile, “Odotiiyokai kooloyo Tadean salaku oloyo motuuk doi TEMENENO. Inai momongulus komu kapalaluuwan susuumu doi oloyodoo. Lamekenekai dooloyodoo sabab dooloyodoo oloyo momonondok; odotiiyokai ko TEMENENO naooloyo tukon inai potaus doiyayaa; tukon inai koidanpobalimang kai mabantilan-bantilan mokulokis.

¹⁴Jadi komuyu naikon laba sabab komuyu taat doiya-Ku. Yaku tealikene komuyu inodotii doi posaapon kodunia. Komuyu naikon tubo sanaang tukon pobuta pusaka hasilo moluwedoi Yakub, pombumbu. Yakumo ko TEMENENO mobasalitamo.”