Read Banggai YESAYA 60 Bible Online

YESAYA 60 - Banggai bible

YESAYA 60

¹Bangunokai tukon tealimo kai madialan, eh Yerusalem, sabab komu kasalamatan Namadialan lubato; ko Mian Bisa talaangiyo ikoo tukon Nakemuliaan.

²Kodunia tinombuki kalipookan, kobangsa-bangsa tinutupi koidan kalipookanan; bai ko TEMENENO Naterang sumbot doikoo koidan, kolaango Nadaanoan teali nyata doikoo.

³Kobangsa-bangsa lubat potoi-toindun doi mumadialanoo, kotomundo-tomundo tatarik luwedoi madialanoo laango mosumbot doikoo.

⁴Kitayokai oila komo teali doi mupotikunggonan; korayat pototongi sulano namule doikoo. Komupau-pau malaneno lubat luwedoi naodoonan, komupau-pau boineno inuba.

⁵Kalu ikoo kitayo doiya ikoo masainding; tukon kodudusomu nakinita tambongan, ikoo tatarik tukon babasal konoamu. Kobangsa-bangsa nabuat binabakon doikoo, kokaasaan moluwedoi tobun sembeleng badaang komo teali koomu.

⁶Komu tano badaang kounta motokuuniyo, konapo lubatan luwedoi Midian tukon doi Efa. Luwedoi Syeba komian mababa mosoni tukon kamangian, maka napo nggaale ko TEMENENO nakokubai.

⁷Kombembe, domba tukon Kedar binaba doikoo kodomba langgilo moluwedoi Nebayot tasadia tuuk doi mukaledaan. Dososubakonoo sananggene ko TEMENENO noano Yana kubaiyo lame Kona Bonua momoono tukon nababasalan.

⁸Oilakai doiyamo komo malayang pokakana kobunom tukon koidan buno malapatiing mobenga abali?

⁹Ndaiyakai kokapal-kapal molubat tukon balabu babayo ko Mian Bisa Naumat moabali luwedoi moodoon. Yanila mababa suasa tukon mosoni tuuk nggaalano ko TEMENENO mu Mian Bisa; doi Israel miano na Mian Bisa Momoliyous tuuno, motealikene inodotii Kona umat.

¹⁰Ko TEMENENO bantile doi Yerusalem, “Komian molulubaton naikon bangune koikoidan komu kota sasanggalo mobinetoon, tukon kotomundo-tomundo leleanikon. Loolukonoo Yaku hukume ikoo doi Kunggimalan lalomo, bai diabudodoo Yaku iyasemo momamaasikonggon.

¹¹ Oloyo popook komu tataapon mobabasal naikon tobuka, sulano kobangsa-bangsa nakaasaan namoola inantokon doikoo, tukon koidan konapo tomundo-tomundo salaku mian motinaan.

¹²Kobangsa tukon batomundoan moaki naiyase taat doikoo, naikon lapus kabus.

¹³Nabinanggaakonan ko Libanon mosoloto naikon inakut binaba doikoo kokayung berangan batango, kauwalu tukon eru doiya tealikene Daku Bonua tambongan, tukon kubaiyo tambongan Daku tampat bapiikan.

¹⁴ Komu pau-pau mobalai-lainggon lubat somba, mobiasa totulaikon naikon somba, ikoo naikon binantil ‘TEMENENO Nakota’, ‘Sion, Israel miano na Mian Bisa Moliyous Nakota’.

¹⁵Ikoo aki naikon mutininggal tukon minosikiton, tukon aki mupinataikon moteali kiis tuuno. Yaku tealikene ikoo balaanan moposidutukon, tampat laba-labaan tuuk sidutu-posidutukon.

¹⁶Kobangsa-bangsa tukon kotomundo-tomundo naikon pialakon, pokakana komeeng koboloki mopialayo konapau. Tobikon doiya sio mutoiyo baikon Yakumokai ko TEMENENO komu Pasalamat, tukon baikon Israel miano na Mian Bisa nabukuanan doiyamo komu Pembebas.

¹⁷Yaku babayo komosoni salaku posoboli kotambaga, tukon suasa posoboli besi. Yaku beenggon tambaga salaku posoboli kayung, tukon besi salaku posoboli batu. Komu tano yaku tealikene aman tukon dame, tukon pinarenta doi naadilan.

¹⁸Akiyokai kobilita koidan tentang paksaan doi mutano, tentang namanasan tukon natabaakan doi mulipu nia. Yaku buno sasanggal molindungiyo ikoo, tukon ikoo nggaalaku salaku mupasalamat.

¹⁹ Ikoo aki napalaluu kanakon oloyo matano laango doitempo oloyo, tukon aki napalaluu mutinaraangi bituwon doitempo popook. Sabab Yakumo ko TEMENENO moteali pokodiolonii ikoo moposidutukon, kai Yaku taraangikon tukon Kubabasalan.

²⁰Tuuk doikoo daano kooloyo matano moaki nabiasa sopok, tukon bituwon moaki nabiasa sosoop. Sabab Yakumo ko TEMENENO moteali pokodiolonii ikoo moposidutukon, komu susaan tempono naikon pupuso.

²¹Komo dungolikon naikon mokubai tindakan tukon talakana, yanila naikon malaat tano tuuk sidutu posidutukon. Yanila pokakana kocangkokan Yaku mosakakene susuunggu, sulano kubuktikanggene Daku babasalan.

²²Tukon koidan kaluarga mopoipoisik tukon mohina naikon teali bangsa mobabasal tukon mobukuan. Yakumokai ko TEMENENO naikon momosobit mokubai tindakan, doi tempo motapaat.”