Read Banggai YESAYA 61 Bible Online

YESAYA 61 - Banggai bible

YESAYA 61

¹ Ko TEMENENO Nakuasa Moinakatandak Tuuno daano doiyaku; Yana piliyaku tukon utusaku sulano kubabayo kobilita momonondok doi mian motalalais tukon kubaiyo sanaang komian mosusah konoano; tukon koidan yaku umumkanggene doi mian motinaan baikon mosobito napo binebaskanggon, tukon komian modaanoon doi talunggu lalomo baikon yanila koidan tinobuatono.

² Yana utusaku sulano kubabilitakene baikon laatemo kotempono ko TEMENENO nasalamatanano yanila; tukon koidan sulano komo susah konoano namoola tohibur, tukon yana balase kona pomusuh-musuh;

³sulano napolaba-laba tukon kambakan doi mian mosusa tukon mosusa sabab matean; sulano natobolii kona posusaan teali lagu nggaalano ko Temeneno. Yanila naikon pokakana kokayung batango TEMENENO susuungo komo sakakene. Yanila naikon lakukene komo monondok tukon mobisa, tobikon doiya ko TEMENENO kinabasalo.

⁴Yanila naikon bangune kokota-kota momalumbito kona tabaakan tukon kotampat-tampat momalumbito kona kiisan yanila kekendenge koidan.

⁵Eh daku bangsa, komian naikon leleaniyo komuyu; yanila naikon totooliyo kopoiyayon piniala tukon yanila naikon limange kokombung tukon muanggur asino.

⁶Komuyu naikon sinombuikon Mian Bisa napeleleani tukon koidan sinombuikon nda TEMENENO naimam. Kobangsa-bangsa nabuat naikon komuyu rasakanggene tukon komuyu rasayo babanggaal sabab dona pobuatoo.

⁷Sabab komuyu malaato maa lua luunggon paku, tukon noda tukon pototulay tealimo mubagian, bai komuyu malaat obos lua luunggon paku doi mutano tukon komuyu malaat laba-labaan moposidutukon.

⁸Ko TEMENENO bantile, “Yaku yase kokaadilan tukon mosikitene kobalailainggonan tukon kulokisan. Yaku setia mobeenggon tambo, tukon mokubai perjanjian moposidutukon tukon komuyu.

⁹Komu katurunan totoy doiyayaa, tololongoldoi sasaibino kobangsa-bangsa. Maka sasaibino komian mokitayo yanila akuiyomo, baikon nabangsa nia Yaku balakaatiyomo.”

¹⁰ Yerusalem bantile, “Yaku laba-laba sabab TEMENENO, konoanggu tukon tedes sabab Mian Bisa. Pokakana kobabaabu malane tukon boine momapake hiasan motambongan, bunomo doiyakai ko TEMENENO nakonoikanano doiyaku kokalambi kasalamatan tukon kamanangan.

¹¹Pokakana kolibuang motinipas naikon tubo teali tanaman, bunomo doiyakai ko TEMENENO Mian Bisa nalubatanano kokasalamatan tukon sasaibino kobangsa nggaale Yana.”