Read Banggai YESAYA 63 Bible Online

YESAYA 63 - Banggai bible

YESAYA 63

¹ “Indeekai komiano domo lubatoo luwedoi Bozra doi Edom? Kona kalambi memela, kona pakean tambongan; kona ambakonan tambongan barani.” “Yakumokai ko Temeneno momampu nasalamatonggon tukon yaku lubat mababa bilita kamanangan.”

²“Bulaando komu pakean momemela tuuno, pokakana kokalambi popiik anggur saono?”

³ “Tolongo susuunggu Komo usok doi tampat bapiisan anggur mau nabaino meeng Daku umat akiyo komo tulunga-Ku. Kobangsa-bangsa Yaku pipiikiyo doi Kunggimalan lalomo, pokakana Yaku momopiik anggur saono. Kosaunoila palapias mbetokiiyo Daku kalambi, posaapon Daku kalambi tealimo memela.

⁴Kooloyo kubabasalan lapamo Kutantukene, tukon doi tempo kubebakangganano Daku umat.

⁵ Yaku mounggolii, bai akiyo komo tulungiya-Ku, Yaku masainding baikon moakiyo komo tomboniiyaku. Jadi baimo Kubukuanan susuunggu Daku binalaanggon, komo tomboniiya-Ku baimo Kunggimalan.

⁶Daku nggimalan kolot-kolot, sampe Yaku pipiikiyo kobangsa-bangsa; Yaku akateyo kabus yanila, tukon kosaunoila Yaku keudange doi buta.”

⁷Yaku yase mopopitoikene ko TEMENENO namaasi tukon yaku nggaale Yana sabab sasaibino Kona kokubai. Yana balakaatiyo Kona umat tukon lobi-lobian konaseang, sabab Yana daano konaseang tukon maasi tukon Kona maasi akiyo kona pupusan.

⁸Ko TEMENENO bantile, “Tutuu, doi yaniladookai Kuumat, pau-pau moaki nakubaiyaku susa.” Tukon koidan Yana salamatene yanila,

⁹Kona pokosusahan kinonoikon yanila. Ko TEMENENO aki namongutus bito-bito kai duta; bai tongo Iyanakai susuungo komo bebaskanggene yanila sabab naseang tukon Namaasi molobi-lobian. Yana sidutu pialayo yanila salataa doi lounu momalumbito.

¹⁰Bai yanila tataap momalawan tukon kubaiyo susa ko TEMENENO noano. Tobikon doiya Yana abalimo teali napomusuh Yanamo susuungo komo poolobosi molawane yanila.

¹¹Doibundu yanila neneekemo doi loonu momalumbito, TEMENENO napeleleani, Musa naloonu. Yanila mansadai, “Inaandokai ko TEMENENO motaaniyo sasaibino komo katuaiyo Daku umat doitempo napololoiyano kotobun? Inaandokai ko TEMENENO mobeena kuasa doi yanila?

¹² Inaandokai ko TEMENENO modampingiyo Musa tukon limano mobukuan barani, tukon mobatayo kopaisu doi salaanoila sulano kosambuno natololongol posidutu-sidutukon?

¹³Inaandokai ko TEMENENO motaaniyo yanila doi ambakonan mololoiyo kopaisu moatean? Pokakana koadalan mololoiyo kopadang gurun, bai aki nabiasa takait.”

¹⁴Ko TEMENENO babayo yanila doi tampat tadean, pokakana koiyayon mopiniala motinandan sulano namakaan bulung doipadang. Bunomo doiyakai ko TEMENENO naandano Kona umat, sulano Kosambuno nakinabasal.

¹⁵Oh TEMENENO, mbalengekai luwedoi surgaa, luwedoi mundoongan momoliyous tukon mulia. Inaandokai Komu seang tukon Komu baranian? Inaandokai Komu monondokan tukon seang maka Mumaasi? Inaikai motaane luwedoi kami.

¹⁶Bolikon Ikookai ko Tamanggami? Abraham tukon Yakub aki natingoniiyo kami. Bai Ikoo oh TEMENENO, Ikoomokai ko Tamanggami, Mosalamatene kami salataa doi looluk.

¹⁷Oh TEMENENO, bulaando Ikoo mopataikanggamo motapa? Bulaando Ikoo mokubaiyo bukuan konoanggami sampe aki mai Matakutonggon? Abalimokai luwedoi Muata-ata, luwedoi umat, koomumo Mupusaka.

¹⁸Bulaando Ikoo mopataikene komusuh napipiike Komu Bonua, tukon komian kubaiyomo lokis Komu bunggul-bunggulo momoliyous?

¹⁹Ikoo kubaikami sulano mai malaat maa seolah-olah aki mubiasa kuasaikami; tukon seolah-olah kami nia aki mai biasa teali Muumat.