Read Banggai YESAYA 65 Bible Online

YESAYA 65 - Banggai bible

YESAYA 65

¹ Ko TEMENENO bantile, “Yaku siap motimbiliyo Daku umat, bai aki naposambayang doiya-Ku. Yaku basadia sulano napososuunggana-Ku, bai aki napounggoliiya-Ku. Dobangsadoo aki napo uwanga-Ku, maukai kusiap motimbiliyo yanila: Naiyamokai Iyaku!

² Yaku siap mosambute Daku umat, bai yanila tongo yase momalawan. Dobangsadoo tongo lakukene kokokubai molokis tukon tolongo loingiyo kona mongiasan susuungo.

³Yanila momeenggon tolongo kubaiya-Ku nggimal sabab yanila tolongo mososubakon sosuba doi kombung-kombung tuuk doi pilogot-pilogot tukon yanila mosua kamangian doi nabalabaan-balabaan.

⁴Kalu popook yanila taus doi leng-leeng tukon doi kubur-kubur sulano napo makabi otunggul moluwedoi mian momate uliko. Yanila kaane kobabung sailo tukon monginum sail boulono moharam.

⁵Yanila bantile, ‘Potausokai tukon pododonggoniyo, inai posinggilami sabab kami nia moliyous tukon topoalaason komuyu!’ Aki kutaane momokita napo kalakuan! Daku nggimoliiyano yanila pokakana kobilat moaki naposo.

⁶Konapo hukuman totuliso doi Salaanggu. Tutuu, aki nabaimo Yaku ndoong batingaakon! Sio kubalase konapo kulokisan,

⁷sabab napo dosa tukon napo mbumbu nadosa. Yanila totulaiya-Ku tukon mosua kamangian motuuk doi pilogot-pilogot doi napo tampat sosubaan doi bunggul-bunggulo. Yaku balase yanila pokokonoy tukon napo kokubai doi loonu momalumbito.”

⁸Ko TEMENENO bantile, “Koanggur saono modaano kopaisuno aki nasinakakon, bai kinubai anggur paisuno. Bunomo koidan Daku bangsa aki naikon Kuakateyo kabus, sabab doi yaniladoo daano komo taat doiya-Ku.

⁹Kona badaangan ko Israel miano moluwedoi Yehuda benseno naikon Yaku balakaatiyo, tukon naikon kona pokaturunan alayo Daku buta doi lipu bunggulo. Daku mian pinilih motaat doiya-Ku naikon ndoong indaa.

¹⁰ Daku umat naikon sosubaiya-Ku, konapo domba, tukon sapi naikon bakoikaan bulung doi Saron Seanono tukon Akhor Pepelako.

¹¹Bai aki nabuno doiya kona nasib komian-mian mootinggala-Ku, moaki napusinggene ko Sion, Daku bukit momoliyous, mososubakene kokinaan doi Gad tukon Neni, sulano napo binee kauntungan moluwedoi nasib.

¹²Komuyu sasaibino naikon mate salaku sosubakon mopinakisaa. Sabab, salataa Kuuwangano komuyu, aki pomotimbili, tukon salataa Yaku basalita, aki pomondongolii. Komuyu tolongo yase lawana-Ku tukon lakukene kokokubai molokis.

¹³Kona tutuuwan, komian mososubaiya-Ku naikon kaan, bai komuyu tataap malaal. Yanila naikon monginum paisu, bai komuyu tataap molou. Yanila naikon laba-laba, bai komuyu tolongo malaat mamaa.

¹⁴Kona tutuuwan, yanila naikon kokuweis kambakan, bai komuyu tolongo kokiil tukon susa.

¹⁵Daku mian-mian pinilih naikon pakeyo kosambumu salaku kutuk: Boliisi ko TEMENENO Moinakatandak Tuuno naakateyo pokakana yanila! Bai komian motaat doiya-Ku naikon Yaku beena sambu moboolu.

¹⁶Sasamba komian doi tanodoo momakabi balakaat, naikon kabiyo ko Mian Bisa mosetia nabalakaatiyo. Sasamba komian moiyase batotopi, naikon batotopi luwedoi Mian Bisa mosetia sambuno. Sabab kosakisaawan doi looluk lapuso tukon tinoliminggono.”

¹⁷ Ko TEMENENO bantile, “Yaku naikon mokubai timbu moboolu tukon dunia moboolu. Kekejadian-kejadian doi looluk naikon tinoliminggono tukon akimo naninonook koidan.

¹⁸Polaba-labakai tukon pokambakanai polong sidutu-posidutukon sabab oila Daku tinealikon. Yaku tealikene ko Yerusalem moboolu momoono laba-labaan, tukon kotumbuno laba kambakan.

¹⁹ Sabab ko Yerusalem mau yakukai laba-laba, tukon tedes sabab kotumbuno. Doi kotadoo akiyono koidan kokokiilan, tukon akiyono konggeleamonan momakabi tulung.

²⁰Konapau-pau akiyo komo mate doi tempo napoipoisikan, tukon komian modewasa bulusan kona umur. Komian kona umur mosakato kotaun tolongo inaanggon daanoon momongula, tukon komo loolukonoo mate inaanggon kanakon hukuman.

²¹Komian naikon mabangun bonua tukon dungoliyo susuungo; komian bailon aki naikon nadungoliyo. Yanila naikon masakai anggur kombungo tukon naikon yanila rasakanggene konapo anggur paisuno; komian bailon aki naikon namonginum. Daku umat naikon bulusan kona umur pokakana kokayung, tukon yanila rasaiyo konapolimang hasilo.

²³Sasaibino konapo linakukon daano kohasilo, tukon konapau-pau aki naikon namate sosinggot. Yanila tukon konapo katurunan naikon Yaku balakaatiyo sidutu-posidutukon.

²⁴Akiyoon napo makabi, bai Yaku timbiliyomo; akiyoon napolapa mosambeang, Yaku daanekenomo konaposambeang.

²⁵ Koserigala tukon domba pauno polaing-laing momakaan bulung; kosinga makaan bulung pokakana kosapi, tukon kobinda akimo namosoku koidan. Doi sasaibino Daku bunggul-bunggulo momoliyous, akiyono koidan komo kubaiyo rugi kai momokubai kokubai molakis.”