Read Banggai YESAYA 66 Bible Online

YESAYA 66 - Banggai bible

YESAYA 66

¹ Ko TEMENENO bantile, “Kotimbu doiya Kukulusii batomundoan, tukon kodunia Ainggu nabanggaulangan. Jadi bulaando kondondoongo kobonua ikoo mobangune motuuk doiya-Ku, tukon oilakai kotampato ikoo moiyase tealikene Kudungolan?

²Kodunia tukon sasaibino koantoko Limanggu komo kubaiyo, jadi doiya sasaibino tinealikon. Bai Daku iniyas tolongo mian momoliyous konoano, momanasekene kona dosa-dosa, momatakut tukon taat doiya-Ku.

³Bai dobangsadoo mokubai langge-langge tukon suka-suka; yanila sanaang mokaleda tukon kokubai mominosikiton. Kalu doi yanila akiyo kona posasalaan: mangakate sapi langgilo mangakatean banggapi, mangakate domba pauno tukon momoloto asu bulungo; mososubakon gandum tukon mososubakonan babung sauno, mosua kamangian tukon mososubaiyan timbalang.

⁴Tobikon doiya mau Yaku bai mokubai langge-langge tukon suka-suka tukon Yaku tepakene doi yanila kobalaa-balaa yanila momatakutene. Sabab salataa Yaku uwange yanila, bai akiyo komo motimbili; salataa Yaku basalita, akiyo komoiyase mondongolii. Bai yanila tolongo yase molawana-Ku tukon lakukanggene kolangge-langge molokis.”

⁵Ndongoliiyokai oila ko TEMENENO nabinantil, eh komuyu momatakut tukon motaat doiya-Na. “Sabab komuyu taat doiya-Ku, daano kobangsa bailon momosikitene komuyu, tukon aki napoiyase bergaul tukon komuyu. Yanila totu-totulaiyo komuyu tukon bantile, ‘Sobiiyomokai ko TEMENENO naotudoikene Kona babasalan, sulano mai kitayo kopo laba-labaa.’ Baikai yanilamo komo malaat maa.

⁶Pondongoliiyo! Daano koduluk alalo doi kota; daano komian alalo moluwedoi Kubonua; doiyamokai Koalalonggu mobalase komusuh!

⁷ Daku kota moliyous pokakana komeeng koibu momosuung akiyoon namosuung yana makaluatek sabab masakit; momosuung pau mala-malaneno akiyoon namosuung yana rasayomo momasakit.

⁸Indee komo biasamo momondongolii dolanggedoo pokakana doiya? Indee komo biasa kitayo dokejadianoo mobuno doiya? Bai kobangsa Israel susuungo doi tempo ko Sion natambuunan morasayo mosuung pau.

⁹Indee komo anggene Yaku babayo Daku umat polong doi mosuungan tukon aki napataikene naposinuung.” Bunomokai doiya ko TEMENENO nabantilano.

¹⁰Pokambakanai polaing-laing ko Yerusalem, eh sasaibino komian mokilakene. Komuyu mosusah sabab iyana, diabudodoo moola polaba kambakan.

¹¹Komuyu rasakanggene kona sanaangan, pokakana komeeng kopau mosusu doi tinano.

¹²Sabab ko TEMENENO bantile, “Yaku naikon beekene komuyu kokaamanan pokakana kopaisu batango molomba; kobangsa-bangsa nabuat naikon binabakon doikoo pokakana kopaisubatango motoku-tokumbe. Komuyu pokakana kopau mosinusu tukon kotinano ubayo, maka nasapu-sapuwo doi naabinano.

¹³Yaku naikon hibure komuyu doi Yerusalem, pokakana komeeng kotina mohibure konapau.

¹⁴Kalu komuyu kitayo doiya, komuyu naikon laba-laba, tukon teali bukuan tukon sehat pokakana kobulung momongula. Jadi Daku pele-peleleani toupiyo Daku labaan bai Daku musuh-musuh naikon rasakanggene Daku nggimalan.”

¹⁵Tutuu, ko TEMENENO naikon lubat tukon bilat; Yana naikon lokitiyo kona kereta pokakana kosokoy, sabab Yana sobiiyo kona nggimalan, tukon Yana siikayo nadambas.

¹⁶Sabab sasaibino komian molinaat daano kona salah naikon hinukum tukon bilat tukon sabel, tukon badaangkai komo hinukum mate.

¹⁷Ko TEMENENO bantile, “Sasaibino komian mokoliyousiyo kodilino mopasial doi kombung-kombung tuuk doi pilogot-pilogot maka napo somba doi yanila, naikon lapus polaing-laing tukon komian mokaane kobabung sailo tukon bukoti sailo maka kinaan bailonggon mokinuukuutanggon.

¹⁸Yaku toiyo konapo pikiran tukon kona pokokubai. Yaku lubat pototongikene komian moluwedoi sasaibino kobangsa. Salataa yanila pototongi, pasti yanila kitayo Daku kuasa.

¹⁹Yaku naikon mangabos komeeng kopaloosan doi yaniladoo. Daano kosoobos mopoipoisik doi yaniladoo naikon Yaku salamatene. Yaku naikon utuse yanila doi bangsa-bangsa doi tano-tano moodoon moakiyoon napo biasa lengele tentang Yaku kai momokita kona babasalan Daku kuasa: doi Tarsis, Libia, tukon Lidia tukon napapana-pana mopandoi, doi Tubal tukon Yunani. Yanila naikon babotilanggene Daku babasalan doi antara dobangsa-bangsadoo.

²⁰Luwedoi tano-tanodoo yanila naikon babayo abali koutus-utusomu momeeng kobangsa salaku tambo doiya-Ku. Yanila naikon babayo domian-mianoo doi Kubunggul-bunggulo momoliyous doi Yerusalem tukon molokiti adalan, keledai tukon unta, tukon koidan kereta maka pedati, pokakana ko Israel miano nakabiasaan momababa sosubakon gandum doi TEMENENO Na Bonua doitempo mobilisii.

²¹Daano kosoobos doi yaniladoo naikon Yaku tealikene imam tukon Lewi miano.

²² Pokakana kotimbu moboolu tukon dunia moboolu naikon bataanggon sabab Kukuasa, bunomo lakon komu katurunan tukon sambumu naikon tataap totinggal.

²³Sasamba Kobituwon Boolu tukon sasamba kooloyo Tadean sobiiyomokai kobanggapi nalubat sulano napososubaiyaku doi Yerusalem.

²⁴ Doitempo napoluwean, pasti yanila kitayo komian molawana-Ku bajano. Kobesuk mokaane kobajanoila aki naikon namate, tukon kobilat mosuayo yanila aki naikon naposo; tukon doiya meeng kolangge mokubaiyo matakut doi sasaibino komian.”