Read Banggai YESAYA 7 Bible Online

YESAYA 7 - Banggai bible

YESAYA 7

¹ Tomundo Ahas doiyamo Yotam namalane tukon Uzia natumbu. Salataa nabamaparentaan doi Yehuda, tealimo kopolobosian. Rezin tomundo Siria, tukon Pekah Remalya tomundo Israel namalane, yanila lubat molobosiyo ko Yerusalem. Bai aki napo lungguiyo dokotadoo.

²Sambuno kotomundo Yehuda lengele baikon ko Siria nasuludadu usokiyomo ko Israel nawilayah salaku musuh, yana tukon konamian matakuto tuuno, tobikon doiya yanila busako pokakana kokayung batango mbombuul mounggete.

³Ko TEMENENO bantile koidan doi Yesaya, “Babayomokai komupau Syear Yasyub tukon pakonokai mupososuung tukon Tomundo Ahas. Ikoo naikon pososuunggene yana doi kolam tondonano taalikon doi babo, doi mian mobabusoi pakean natampat balimangan.

⁴Bontiikenemokai dotomundodoo baikon yana sio nabatotobomo bai sio nakeenggele konoano. Yana sio naaki namatakut kai pusing. Kona nggimalan Tomundo Pekah tukon Tomundo Rezim maka konapo suludadu do Siriadoo miano aki naliisiyo kona bahayaan luwedoi lua kokayung labino motibolungan.

⁵Ko Siria maka Israel tukon kotomundono yanila pomeenggono.

⁶Yanila yase molubotiiyo tukon lobosiyo ko Yehuda maka napo toku-tokutiyo kotumbuno sulano napo ala doi yanila, maka napo angkate Tabeel namalane nateali tomundo.

⁷Bai Yaku, TEMENENO, nyatakanggene baikon dolanggedoo aki naikon nateali,

⁸sabab ko Siria aki nalobiyoniiyo konabukuanan konapo ibukota doi Damsyik, tukon ko Damsyik aki nalobiyoniiyo konabukuanan tukon ko Tomundo Rezin. Sabeakai doi tempo nom kolono lima kotaun, ko Israel natasabulan sampe aki napo moola bataanggon salaku meeng kobangsa.

⁹Ko Israel aki nalobiyoniiyo konabukuanan ko Samaria, naibukota, tukon ko Samaria aki nalobiyoniiyo kona bukuanan tukon kotomundo moluwedoi Pekah. Kalu aki potutuu momaangga doiya-Ku, pasti aki pomoola bataanggon.”

¹⁰Ko TEMENENO pelenggene koteteba bailonggon doi Ahas:

¹¹doiyamo, “Makabikai sulano ko TEMENENO mu Mian Bisa namebee meeng kopaloosan doikoo, kai luwedoi momate nadunia taalikon doi bilit kai luwedoi timbu taalikon doi babo.”

¹²Maka Ahas natimbiliyo, “Yaku aki kuiyase momakabi paloosan. Tukon aki Kuiyase mosobaiyo ko TEMENENO.”

¹³Maka Nabi Yesaya bantile koidan, “Kalu buno doiya, eh ikoo Tomundo Daud nakaturunan sobakai lengele! Akiyonkai nasukup kopo ujiano kobanggapi nakasabaran, sampe komuyu ujiyo koidan daku Mian Bisa nakasabaran?

¹⁴ Budodoiya, ko TEMENENO naikon beenggomon paloosan: Meeng kopau boine naikon tianan tukon suunge komeeng kopau malaneno mosinombuikon Imanuel.

¹⁵Tukon kalu laatemo konababasalan tukon moolamo mangala kaputusan susuungo, maka natano nia naikon sukup kona monondokan.

¹⁶Sabab mau naakiyoon nalaate dotempodoo, dotanodoo molua komo parentayo doiyamo dotomundo-tomundodoo komuyu momatakutene naikon tininggalo kosong.

¹⁷Ko TEMENENO naikon lubatene kotomundo doi Asyur, maka ikoo tukon sasaibino komu kaluarga tukon komu rayat naikon toupiyo kosusaan mo kulokis tuuno tukon lobian kona susaan konapo tinoupi doi tempo kobatomundoan doi Israel tukon Yehuda natongobosan.

¹⁸Doi tempodoo ko TEMENENO naikon uange ko Mesir miano tukon Asyur miano, maka dobangsadoo molua tumbuno lubat pokakana kopoos tukon ani tumbuno mobadaang maka natokuuniyo kopepe-pepelako tukon kobatu-batu karang anga-angato. Yanila naikon tutupiyo sasamba kosumolot mopalasoniton tukon sasamba kotampat modaano kobulungo.

²⁰Ko TEMENENO naikon tamboyo ko Asyur tomundono sulano nalakukanggene ko Israel miano sulano nabaimo pokakana komeeng komian konalimang motongo badalus modaluse kabus kobuuk tukon onuwang doi dilinggita.

²¹Doitempodoo, kalukai daano komeeng komian motongo mopiala meeng kosapi mongula tukon lua kombembe,

²²doiyayamo kosusuno hasilo lobian doi nasukupan kalu domian-mianoo labino doi tanodoo napo pakeyo. Tutuu yanila monginum susu tukon dokot.

²³Doitempodoo koanggur asi-asino suwe-suwele sinakai sololoon koanggur batango tinuboi tukon bulung maka sonit.

²⁴Komian moampakon doi asidoo namababa busur tukon panah, sabab dotanodoo moonomo bulung tukon sonit.

²⁵Tukon kolipu mobunggukon mobiasa inala tukon sinakai, koidan moonomo bulung tukon sonit, sampe akiyono komian mobarani taus indaa. Butadoo konaguna baino tuuk sapi tukon domba nakaanan.”